عبيد : شف الناس يحطون قشّهم بشنطة الطيارة .. وأنا شايل هالشنطة طاحت ذرعاني
ريان : خلاص نبي نشرب لنا كوفي على بال ما نلقى لنا تاكسي يودينا
عبيد : وشو كوفي بعد أنا ما أبي إلا ببـس
ريان : يالببس هاللي ناشب بمعدتك .. غيّر إشرب كوفي خذ موكا خذ كبتشينو !
عبيد : كفي كشتينو ماكشتينو مادري وش تقول أنت طيب ببس وش به الببس يعني بارد وزين
ريان : خلاص لا تفضحنا إقعد بس .. وش تاكل ! تبي دونات ولا كروسان !
عبيد : وش الاسماء هذي تقل أسامي شغالات .. كروسان أجل !
ريان : أنت عمرك طالع من بيتكم !!
عبيد : إيه نسيت يوم أقول لك أول أيام بيت الجيران !
ريان : ليته واقفتن الأمور على بيتهم كان أبرك لنا .. دقيقة خل أجيب لك شيء يسد معدكّ
عبيد : كروسان .. كشتينو ومكا مدري وشو .. إلا يبي آكل غصب طيب وشوله ؟ .. دايم أقول له معدتك ولا معدتي معدتك ولا معدتي بس غصب يبي يتدخل بأكلي شيء ينزع الواحد .. لا هو وشوشته بعد .. لو أقص منه شوي وآخذه معي للديرة وألمّع به كفرات الكرسيدا كان أزين .. الكرسيدا يا حبي لقلبه بس .. وش تبي هذي تناظر !!!
ريان : خذ جبت لك دونات .. ياخي وش تناظر العالم طابن معهم أنت ؟
عبيد : ياخي هي من يوم تلف منّاك وهي تناظر وش تبي هالحمصا !
ريان : الحمصا والله الكرسيدا .. نعنبو دارك ذولي روسيات شقرْ ولا أسبانيات تلقاهن.. بعدين عادي ترى الناس يناظرون بعض ويبتسمون مهب مثلك لا ناظره أحد قال وش يبي !!
عبيد : طيب صادق أنا وش تبي تناظر .. تعرفن أنت قلبي رهيّف مهب يتحمل شي
ريان : رهيّف .. كل كل بس لا تبرد
عبيد : الحين دونات هذولي اللي تقول عنهن ! يشبهن مجاول بنت الجيران
ريان : وأنت وبنت الجيران دايم بمخك خلاص تبي تنساااه أذكرك
عبيد : الحين وشوله تاكل باللي معك ؟
ريان : شوكة هذي تمسكه بالشوكة وتقطع بالسكينة
عبيد : طيب وشوله تضرب مشوار .. اقطعه بايدك كذا هَه
ريان : ياخوي لا تفشلنا خلاص أنت حدك فيشار فشفاش وغندور وعصير تانج بعد ويخبّ عليك
عبيد : ياخي جوعان دايخ بطني فاضي وأنت تقول لا تاكل بالطياره تفشلنا وتفضحنا يالمدري وشو وكتكات أنت وكلامك وأنا من اليوم ما أكلت ولا شربت إلا الببس هذاك اللي من المضيفه يالله من فضلك
ريان : وش كتكات يا عبيد ؟ ياخي وش سالفكّ الحين أنت ؟ أقول لك إيتيكـيت .. خل عندك إيتيكيت يعني أسلوب تعامل راقي خلك عشان تصير من طبقة الـ هآي كلاس ولا ماتعرف الهآي كلاس ! قلي بس وش رايك بطعم هالدونات !
عبيد : نقضي من كشتينو ومدري وش هالكلمات هذي ونجي لبساس مدري كاس مدري منحاس عساك للحوسه حست مخي .. ما أفهم أنا شيء خلن آكل بس هالمدري وشّن هذولي
ريان : هآي كلاس يعني الطبقة الراقية عسى يرقى فوقك طيارة .. نعنبو دارك أنت إلى متى تبي تبتل على هالحال ! .. يبيلك بعثة تطيّرك لأستراليا ولا كندا تعدّل من مخّك وتصقلك صقلة إلاك متعدي العالم بالموضة والتطورات .. ونلقاك بايعن الكرسيدا الشهبا هذي اللي من سنة جدي وطاقن لك فيراري .. ومعلّق مجاول بنت جيرانكم مدري وشو على إيدينك وسيقانك بعد
عبيد : ياخي لا تتدخل بخصوصياتي .. بعدين ما خلاك تصير صح إلا كرسيداي اللي تطنز به ..
ريان : خلنا من هذا وش رايك بالدونات ؟
عبيد : الصراحة .. إنه رهيب بس مانقصه إلا شطة
ريان : مهب معده هذي الظاهر إنه خلاط
عبيد : حنا أول أي شي ناكل معه شطة .. كان به يوم أنا صغير فيشار نسمه نحطه بالصحن نتعازم حنا وفايز والله ذكريات ونصب شطه عليه لين يسبحن الفيشار .. والرز شطه وكل شي شطه ... ريان ريان شف هذا وش لابس الله ياخذه
ريان : هذا يقولون طيّحني ... وين وين تبي ؟
عبيد : يقول طيحني خل أخطرف له عشان يطيح على وجهه هالأجرب
ريان : إقعد بس وكمل أكلك
عبيد : طيب كمل يا ريان وش اللي تقول الخطة اللي تبي تخلين أنسى حبّي ؟
ريان : شف لازم تكون صادق بكل شيء تبي تسويه عشان توصل للي تبي .. وبعدين قبل أقول لازم تتبع الشروط
عبيد : وش شروطه !
ريان : أولاً تاكل بالشوكة ثانياً ما تتلفت تقل قاطعين عنك الماء وتنشب لهالعالم وتخلي عيونك لمّي وعلى هالكوفي وهالبلع
عبيد : طيب بس أحيانا ألتفت وأنا معك غصب ميخالف لا تقول شيء
ريان : التفت بس لا تكثر .. أهم شيء ركز معي
عبيد : أبركز أكيد وأنت تدري أني أبي أنسى مهب إني أكرهه بس عجزت قوه أفكر بكل وقت .. يالله قل
ريان : تتزوج
عبيد : أتزوجه ! .. أقول لك أبوه ضاربن جالدن مبطي ومقطعن جلدي تقطيع تقول أتزوجه !!
ريان : يا غبي ما أقول تزوجه أقول تزوّج يعني دوّر غيره ..
عبيد : وبعدين ؟
ريان : بعدين ! .. تعيش وترتاح وتستانس .. تلقى لك وحدتن سنافيتن يحبه مهب قلبك ! إلا الكرسيدا حقك تحبه كله بكبره
عبيد : لا لا ما أقدر .. والله لو تدري البنت كان تذبحن
ريان : الحين بنت جيرانكم هاللي ذابحنا عنده ما قد قالت لك عن شيء ولا جابت خبرك إلا تفتح لك تجيب كراث مدري بصل مدري وش قصة أكياسكم همن تصك الباب بوجهك
عبيد : كن الدنيا منصكه بوجهي ذيك الايام
ريان : خل أكمل .. وحدتن ما تدري عنك وش تبي به ؟!
عبيد : ياخي لا تدري عنّ هي بس أنا أدري عنه وكل شيء صعبه ياخي أعرس وش لون أبحب ؟؟
ريان : المسألة سهله ترى الواحد مع العرس ينسى .. وبعدين مهب أي وحده بتاخذ أنت !
عبيد : يبي لي أدور ومن ألقى وحده تصلح لي وأنا ما يعجبن كل شي
ريان : الكرسيدا اللي جايزتن لك له عشر سنين مدري كم وهي معك منتب عجز إنك تعرس على أي بنت شهبا حتى .. اسمع بس أنا لاقي لك وحده شي
عبيد : وش وحده شي وأنا ابشري سياره ؟ قل بنت أجوديه
ريان : طيب بنت أجوديه حتّوته يحبه آبو خراطيش قلبك .. وش قلت !
عبيد : من يقالهم ؟
ريان : انت خلك من يقالهم ومدري وشو هذولي .. بنت توّه بعز شبابه وردتن صغيرتن تلاعب الهوى !
عبيد : ياخي لا تقعد تقول وردتن وهوى وتوصف قل وش هي من لحيه
ريان : ماله لحيه يالغبي ..
عبيد : شفت إنك كتكاتك مانفعك مدري وشو . وش هي من لحيه يعني وش طبعه وش هي حرمه سنعه ولا مهب سنعه
ريان : طيب هي من لحية السكسوكا هههههههه ياخي مهب وقت استهبال لا تستهبل
عبيد : ياخي أنت تجر قلبي همن تستهبل .. اعقل تكفى وكمل ولا منب سامع
ريان : طيب .. اسمه ليَان ..
عبيد : وشو ليان !
ريان : ليان يعني عاد عبيد ما تعرف اسم بالدنيا اسمه ليان ؟؟
عبيد : إلا بس منصدم وش ليان من بنته طيب كم عمره وشو شكله . لالا مهب شكله قصدي هي مره ولالا
ريان : لا رجل .. إيه مره ماعليك .. ليان هذي أبوي له خوي سوري .. وخويّه من مبطي بالسعودية .. وزوّج بناته باقي بنت وحده اسمه ليان عمره 19 سنة .. آآآخ بس لو أنا مكانك كان أخذته
عبيد : شايفه يعني ؟؟!!
ريان : إيه شايفه ..
عبيد : لا أجل مابيه دوّر غيره
ريان : وش دوّر غيره بعد ؟ شايفن خطّابه عندك .. أمزح ما شفته وش أبي به
عبيد : إيه حصّل بنت زيه
ريان : أحلىىىى بدينا من هالحين ..
عبيد : طيب وراه ما تاخذه .. قصدي وراك ما تعرس طيب !
ريان : أنا منب معرس الحين وش أعرس ؟ خلك منّ وفكّر بليان ..
عبيد : بس لازم أتأكد ؟؟
ريان : من وشو ؟
عبيد : لازم أشوفه أخاف ما يجوز لي طبعه لا يهمك الزين
ريان : لا تخااااف تبي تقعد معه قبل العرس وتفل أم أمه
عبيد : طيب وش لون الحين أنا أروح لمهم ولا أخلي أمي تدق عليهم ؟؟
ريان : وش أمك تدق عليهم همن تبزع أميمك وتكز لهم كراث بعد ترى تسويه
عبيد : إيه ميخالف الكراث يحبنه الحريم
ريان : إيه حريمنا مهب حريمهم هذولي جب لهن بسبوسا .. ولا باشاميل ولا من هالسنع .. أجل كراث ! اسمع بس .. أنا أضبطك ماعليك وبدون ماحد يدري
عبيد : لالا وشو ماحد يدري ! لازم أعلم أمي وأهلي وراه مقطوع من شجرة أنا ؟
ريان : إييييه ياخي أنت شف الوضع الحين هي تجوز لك ولالا !! بعدين لا وافقت وكل شيء علم أمك وإنك جزمت وخلاص وأبوك مهب قايل لا أنت تقول إن أبوي يبي يزوجن بأي طريقه صح ولالا !
عبيد : صح بس أخاف أمي تقول لا ولا شي تعرف أمي تبي لي السنع
ريان : يعني أنا ما أبي لك السنع بعد ! ياخي أقل شي يجيك إنك تنسى بنت الجيران سندريلا
عبيد : إيه سندريلا انت بس تطنز علي .. ترى ما اسمح لك
ريان : خلاص طيب وش قلت ؟ .. أنا أبضبطك لااااا بعد هم بنفس الديرة هذي .. لو تبي اليوم نمرهم !
عبيد : وااااقلبييييه
ريان : وش واقلبيه هههه !
عبيد : ارتعت .. وش اليوم لالا خله بكرى أو بعده
ريان : ياخي اليوم يعني اليوم لو تبي هالحين من المطار سيدا هو يعرفن الأبو أبو رامي .. أهارجه أنا والله ما يقول لا على نياته مسيكين ياويلي والله إن يفرح بك عاد أنت تركب له بالضبط
عبيد : إيه دوّر لي هالمساكين ولصّقن بهم
ريان : نعنبو دارك هات المساكين أنت بس .. ها وش قلت نروح له الحين ؟؟
عبيد : بس أخافــ. ..
ريان : لااا تخاف من شيء نروح أنا وإياك نضبطك بالحلاق ونسوي لك سمكره وتضبيط ونكرب على الأذرعه وتطق لك ثوب وشماغ وتصير مطخطخ وتدخل عليهم ..
عبيد : وأنت منتب معي !
ريان : إلا معك بس أنت تصير مملوح ومتزين وكل شي ونروح لمه بالدكان له دكان يبيع زيتون ومدري وشو بضاعه شامية ..
عبيد : آآآآه .. وبنت الجيران طيب !
ريان : الحين تبي تعرس عشان تنساه ولا نكمل مشاويرنا ؟
عبيد : لا خلاص .. يالله مشينا

وذهب " عبيد " مع صاحبه إلى محلات الملابس بعد أن أقلهم صاحب أجرة وأوصلهم .. قضوا قرابة الساعة إلى الساعتين ثم إلى الحلاق حتى أقلّهم صاحب أجرة آخر وذهبوا إلى أبو رامي في دكّانهِ في وسط المدينة .

ريان : اضبط أسلوبك ولا تكثر مناظر
عبيد : طيب لا تطنز ولا تجيب طاري بنت الجيران
ريان : ليــان ... لالاليلو هههه وش بك استحيت .. اص اص هذا محله
ريان : السـلام عليكم
أبو رامي : وعليكم السلام يا أهلاً وسهلاً أخي
ريان : أفا ما عرفتني أبو رامي ؟!
أبو رامي : اهلا فيك لا واللـ .. ريان ؟؟ يا مِتّ أهلا وسهلا .. إي نورت والله تفدّل تفدّل .
ريان : الله يخليك والله ما تقصر وش لونك وش لون صحتك ؟
أبو رامي : بنحمد الله منيح بس عايشين على بركة الله .. وكيف أبوك إن شاء الله طيب ؟
ريان : الحمد لله بخير وطايح بالعقارات الحين ..
أبو رامي : إي الله يكرمو ويوفئو .. إي مين هَيْدا اللي معاك ؟!
عبيد : أنا عبيّد .. عبد الله عبد الله ..
ريان : هذا عبد الله صديقي رجال أجودي قلنا بنسلم على أبو رامي ونشوف وش أخبارك ..
أبو رامي : إي كيفك عبد الله يارب مبسوط !
عبيد : إي والله يالله من فضلك بخير مرتاحين .. انت وش لونك ؟
أبو رامي : أنا منيح والله مـ البيت لـ الدكان .. روتين يومي ما بنروح كبرنا والله
عبيد : الله يوفقك وييسر أمرك
ريان : إيه الله يطول عمرك ويخلي لك أولادك .. أبو رامي جايك والله عشان موضوع .. وموضوع دسم شوي
أبو رامي : عيوني إلاك بخصوص شو آمرني !
ريان : بخصوص هالنشمي عبد الله ..
أبو رامي : والله بيستاهل .. من شان شو !
ريان : من شان بنتك ليان
أبو رامي : بنتي ليان !! .. شو فيها صاير لها شِي !
ريان : لا بس نبي نخطب ليان للشاب الطيّب عبد الله
أبو رامي : .....

ماذا فعلت يا ريّان ! .. لقد أصبت " عبيد " بمرض لن يستطيع أن يتعالج منه إلا بقدرة الله .. أتريد أن تنسيه حبّه الأول والشاعر قال : نقّل فؤادك حيث شئت من الهوى .. ما الحب إلا للحبيبِ الأولِ ! ، أم أنك تريد الخلاص منه والفكاك ! ، دارت الدنيا برأس " عبيد " وارتمى في حظن الآه والأوجاع .. لعل الزواج يُنسيه ذلك الحب العُذري .. لعل الزواج يُنسيه وجدانه الذي تعلق في صورة منزل جيرانهم ، لعل ليلة الفرح تُمسك بذكرياته وترميها بعيداً .. تَقذف في قلبهِ حباً جديداً ونسيجاً من الغرامِ وبساتين يانعة الورد والزهر .

أبو رامي .. هل يوافق على زواج " عبيد " من ليان ؟ .. هل تظنون أن ليان ستقبل بهِ ؟ .. أم أن ذلك الموضوع " الدسم " كما يقول ريان سيطوى من ساعتهِ ؟ ، الأسئلة كما اعتدتوا عليها كثيرة والشكوك متفرّعة وحبل الهاجس لن ينقطع .. ولكن ما تقولون لـ " عبيد " هل توافقون على زواجه منها ؟ .. وما الذي تقولونه لـ ريان هل تؤيدونه على فكرته العجيبة ؟.

نحن جميعاً بالانتظار :)