بريدة ستي - صَـدّقـنِـيْ : 1 + 1 = 2 .. .. !! ( المَشهد الأخير : الرسَـالـة )

الحُـلـم ..

وليد : يوم الأربعاء الساعة 7 المغرب اتصل عليّ وقال ترى واعدناهن الساعة 11 بملاهي .. وإنه لازم أكون معه من الساعة 10 عشان نطلع جميع للموعد .. انتظرت حتى الساعة 10 ورحت لبيتهم ووقفت سيارة الآجار وطلعنا بسيارته أنا وهو وصديقه .. لقينا البنات بسيارة مع سواق هندي مدري بنقلاديشي بمواقف الملاهي ونزل صديقي وسلم عليهن ونزلنا وسلمنا عليهن ودخلنا جميع للملاهي على أنهم أهلنا يعني .. جلسنا تقريبا نصف ساعة وتم اللي اتفقنا عليه .. طلعنا وتفرقنا برى الملاهي ورحت للبيت .. وأنا مازلت أفكر.. !!
عاصم : بأيش كنت تفكر .. ؟!
وليد : أفكر كيف سويت هالشيء وكأني مُنقاد انقياد لهالعمل .. !

عاصم : ماعليه .. واصل
وليد : حاولت أنام ما قدرت .. نمت تقريبا ساعتين الصباح أو ثلاث صحيت من النوم فَزِع من حلم شفته أو رؤيا .. قمت خايف ما دري وين أروح أفكر بهاللي بنسويه وبالرؤيا وبزميلي لأني شفت بالمنام شيء عظيم .. قبل صلاة الظهر تقريبا اتصلت على زميلي وماكان يرد .. كررت الاتصال عليه حتى رد .. فاجئني بأنه شايف نفس الحلم بالضبط بعد ماحكيت له السالفة .. وإن الشخص اللي من طرفه شاف الحلم نفسه ...
عاصم : عجيب والله !!! نفس الحلم ؟
وليد : نفسه بالضبط حتى بالتفصيل اللي أنا شفت .. قلت ياخي أنا خايف يصير لنا شيء ولا تمسكنا هيئة ولا نتمشكل .. قال يا بن الحلال ماعليك الأمر عادي وش خايف منه ؟! كل شيء مرتب ومنسّق .. قلت طيب وش لون كلنا يالثلاثة نشوف نفس الحلم !! قال ياخي صدفة مثل أي صدفة ، ما ارتحت لرده أبداً .. لما صليت الظهر دورت رقم مفسر أحلام وحصلته اتصلت اتصلت حتى رد عليّ .. حكيت له الرؤيا من وإلى وإنه الثلاثة كلنا شفنا الحلم وماكان يدري عن السالفة .. قلت وش التفسير ؟ قال فيه شيء يبي يحدث أو حدث بيصيبك فضيحة وعار بالدنيا والآخرة بسببه .. قلت تأكد قال أنا فسرت لك على حسب ما أعطاني الله .. ولو سألتك يا أخ وليد وأنا أدور لك الخير وش الموضوع ؟؟ قلت الموضوع كيت وكيت وكيت وحكيت له السالفة كله من أوله لآخره .. جلس يدعي لي وقال احمد الله إنك تمكّنت من الموضوع .. سألته وش الحل طيب وش أسوي .. ؟؟ اتفقت أنا وإياه أني أدق على الهيئة وأشرح لهم الموضوع .. وفعلاً اتصلت وتكلمت مع واحد الله يجزاه خير وبيّنت له الأمر .. وقلت له إني أنا بأترك كل عمل سيء وكل معصية أقوم به قبل بسبب اللي صار ولكن أبي حل للمشكلة قال الله يوفقك .. ماعليك الأمور هذي عارفين حلها قلت وش بيكون ؟ قال أنتم خلكم على نفس الموعد مع البنات .. حنا نبي نكون بمكانكم وأنتم خلكم برى الموضوع .. قلت كيف ؟ وشرح لي الوضع ..
عاصم : تمام دام الهيئة تدخلوا .. حلو حلو .. وبعدين ؟؟
وليد : حددنا موعد الاجتماع معهم قبل موعد البنات .. وبنفس يوم الخميس راحوا للشقة اللي بتكون فيها السهرة ..
عاصم : وخويك وافق ؟
وليد : على إيش ..؟ قصدك على الهيئة إنهم يتدخلون ؟
عاصم : إيه ؟؟
وليد : أصلا ما أخذت رأيه باتصالي عليهم .. شرحت لهم كل شيء حتى رده علي لما اتصلت عليه عشان الحلم .. تعرف الموضوع خطير
عاصم : تمام واصل ..
وليد : بالموعد المحدد اتصلوا البنات .. وكلمناهم وقلنا حنا بالمكان الفلاني .. جَن للشقة ولما دخلن تفاجئوا بالهيئة منتشرين .. أكثر من واحد .. لأن البنات هذولي سيئات لأبعد حد .. مسكوهن الهيئة وتصرفوا معهن بالطريقة اللي يتعاملون به بمثل هالمواقف .. أعتقد إن البنات يتوقّعن إن هذا كمين لهن ومسوينه حنا وهالإعتقاد اختلاف ما يفكرن فيه هن ..
عاصم : صح لأنكم واعدتوهن وعطيتوهن كلمة وبالاخير يحصلون مكانكم الهيئة متواجده ..
وليد : هذا هو .. انتهى الموقف بكلام الهيئة لنا إننا نروح والقضية معهم وبيتصلون بنا .. أخذوا أسمائنا ومعلوماتنا ، رحت للبيت وأنا تعبان نفسياً صح إني فرحت إن المشكلة انحلت ولكن تعرف الموقف ككل ذاك الوقت متضايق منه بالحيل ..
عاصم : طيب وانتهى الأمر كله على إنهم قالوا بندق عليك ؟!!
وليد : لا .. من بكرى تقريبا بالمساء اتصلوا ورحت لمّهم وعلموني بالطامة والفاجعة والمصيبة ..
عاصم : لا حول ولا قوة إلا بالله .. وش اللي صار ؟؟!!!

لنعلم جميعاً .. أن تلك الدروب والطرق المظلمة .. آخر خطوة تقف عندها : هي هاويتها وآلامها .. ما حصل لوليد من رغبة في العلاقة الساذجة .. يحصل لكثير من الشباب ولكن !! .. البعض ينجو من الوقوع بهاوية تلك الشوارع المتسخة بفضل الله سبحانه .. شباباً وفتيات .. ولكن البعض الآخر .. تبقى أوجاع تلك الملذات لا تزال تتربص في قاع قلوبهم .. وفي كل لحظة يتلقونها في الحياة ..! يتذكرون ذلك الماضي الحزين المؤلم .. ويتذكرون أن تلك الشهوات الشيطانية ما هي إلا لحظة من الوقت ولذة .. تنقلب يوم القيامة إلى جحيم وعذاب .. يستحوذ الشيطان على عقل الإنسان بعد أن يجمّل له القاذورات .. ويصبح لهُ كمقود السيارة .. يتجه بهِ كما يريد .. ويسلك الطريق الذي يهوى .. ثم يتخلى عنه ويتركه في حَال خروج روحه ..

{ وَقَالَ الشَّيْطَانُ لَمَّا قُضِيَ الأَمْرُ إِنَّ اللّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ وَمَا كَانَ لِيَ عَلَيْكُم مِّن سُلْطَانٍ إِلاَّ أَن دَعَوْتُكُمْ فَاسْتَجَبْتُمْ لِي فَلاَ تَلُومُونِي وَلُومُواْ أَنفُسَكُم مَّا أَنَاْ بِمُصْرِخِكُمْ وَمَا أَنتُمْ بِمُصْرِخِيَّ إِنِّي كَفَرْتُ بِمَا أَشْرَكْتُمُونِ مِن قَبْلُ إِنَّ الظَّالِمِينَ لَهُمْ عَذَابٌ أَلِيمٌ }

أما وليد .. !!
فما حصل له غريب وعجيب ..
سنعرفه في المَشهد الثالث بعُنوان :
( الطَامّة الكبرى )

طِبتُم ..