|
استفسار: ابي اسوي مؤسسة مقاولات مالمطلوب؟؟
بسم الله الرحمن الرحيم كل عام وانتم بخير بارك الله لكم في رمضان وجعله عامراً بالطاعة.. باختصار قررت افتحح مؤسسة مقاولات بس ما أعرف إلا أشياء بسيطة عن احتياجات المشروع فقررت سؤال الأعضاء لمن لديه خبره أو جرب التعامل مع أحد المؤسسات إخباري بالمتطلبات والسلبيات والايجابيات للمشروع وشكراً لكم |
حبوب ضغط وسكر وقومه من الفجريه ..
|
الأحتياجات :
1- محل و لوحة تبين النشاط ويكون المحل بطريق رسمي . 2- سجل تجاري بأسم المحل أذا كان الأسم مو أسمك الشخصي . 3- حبوب ضغط و سكر على قولة واحد من الأعضاء . 4 - استصدار الفيز على حسب ومزاج مكتب العمل وأن حصل تدور لك واحد يأخذ نسبه (رشوهـ) من كل فيزا من مكتب العمل نفسه علشان يضبطك بعدد الفيز اللي تبي . 5- الضاهر يبون حساب بأحد البنوك علشان يشوفون كم رصيدك وهل يساعد على أفتتاح مؤسسة . تقبل مروري . |
اقتباس:
أي مشروع يحتاج لصبر وطولة بال وهذا أحلى ما في التجارة إنه على قد ما تعطيها على قد ما تاخذ منها. على عكس الوظيفة الحكومية اللي يشتغل واللي قاعد آخر الشهر كلن يجيه الراتب بالحساب نهاية الشهر. اقتباس:
على العين والراس مرورك ومشكور على الإيضاح كفيت ووفيت. بس نقطة إنهم يبون كشف حساب ضرورية هذه وإلا كيف؟ لأنه لو فرضنا الواحد بالقوة دبر فيز وجاب خمس عمال بقرابة 25000 ريال وكانت هي راس ماله بس , ما يوافقون على المشروع بدون كشف الحساب؟ بس لو تأكذ لي يالذيب. ويعطيك العافية |
اقتباس:
مستحيل يعطونك هذا العدد .. اتمنى لك التوفيق والإعانه .. اقترح عليك ان تستعين بالله ولا تلتفت لكن في البداية (( شوي شوي )) ! |
اقتباس:
2000x5 عمال رآح يكون عشرة الألف ريال فقط . وبالنسبه لكشف الحساب بشوفه لك وأعلمك اليوم ان شاء الله . |
خطوات فتح مؤسسه
1- استخراج سجل تجاري( وعشان تطلع سجل تجاري الله يعينك على الشروط وتسديد رسوم السجل1000 ريال) 2- عمل اشتراك بالغرفه التجاريه ( تدفع 900 ريال كل سنه ) 3-استخراج رخصة محل (( الشروط محل تجاري + باب المنيوم +مكتب وخلافه+ سماح من الدفاع المدني بعد الكشف عليه والدفاع المدني له طلاباته كطفايات ووووو+ لوحة محل + مطبوعات + ختم )وتسديد360 ريال للرخصه في البلديه بعد دوخة الراس . 4-التقديم على مكتب العمل لطلب عمال وشروطهم - شهاده من الزكاة > -شهادة من التأمينات الاجتماعيه -موعد مع المفتش لمعاينة المحل - احضار كشف حساب من البنك الذي تتعامل معه - احضار فسوح بناء وهذه النقطه الصعبه (( شبه مستحيل تجد هذه الايام فسوح )) ............... 5- المؤسسه الجديده تعطى عامل والحد الاقصى عاملين فقط . ......................... الدوائر التي تمر عليها وانتبه كل دائره تفتح ملف عندهم ولهم شروط تخصهم : 1- وزارة التجاره 2- الغرفه التجاريه 3-الزكاه والدخل 4-التأمينات الاجتماعيه 5-البلديه 6- الدفاع المدني 7- بنكك لكشف الحساب 8-بنك الرياض للتسديد التأشيرات ................................................ وايضاء الجهات الاهليه التي لابد المرور عليها 9- تشوف لك مكتب عقاري لايجاد مكتب لك 10- خطـــــاط لعمل لوحــة مكتب وتركيبها 11- مطابع لعمل الختم والمطبوعات بعد استصدار السجل 12- محل السلامه كالعطيشان وغيره لشراء طفايات حريق وبعض طلبات الدفاع المدني 13-محل اثاث لشراء مكتب وطاولات وكراسي .................................................. .. 100- وبعد تجهيز المؤسسه : يبقى البحث عن عمل وهي النقطه الفاصله فمن يثق في مؤسسه جديده ماحد يعرفها والله يعينك على مضايقة المقاولين الاجانب لك كسعودي ، وايضا ستواجه ان اخوانك السعوديين يصدووون عنك ويذهبوا الى الاجنبي ليش ؟؟ ليس لدي اجابه مقنعه !!!!!!! .................................................. ..................... نصيحه ياخيي مالك ومال وجع الراس |
^^
^ المواطن شكل الرجال بيصد عن المؤسسة خله يترزق الله بدون ما تحبط به . والله أني ضحكت من جد على الطلبات اللي أنت كاتب مع أنه هذآ النطام :) بس عندنا ما فيه نظام يعني يقدر يشوف له أشخاص يدبرون له عشر فيز لو بغى بس أهم شي يدهن السير :) |
المواطن والله انك صادق
Mr_legend تبي اتعذب والله لكن دورلك شغله غيرها اسئلني لكن تدري وشلون اذا قصدك فيز ابداء وما جاك عندي ابشر بالفلوس والله اسئلني انا |
ياجماع ماكتبت هي الحقيقه وليس قصدي احباط له
اما الاحباط سيصيبه لا محاله بعد ان تعمل مؤسسته وقد نصحته لانني صادق وله حريت التصرف |
مصالاة خلق الله كايدة
|
ماقول الا الله يعينك عليهم
|
الله يوفقك اذا كانت جاازم استخيرر الله وتوكل
مافيه شغله تبي تجيك من البداايه بلووشي بس اهم شي البدايه تكوون قويه وشد حيلك بالتوفيق وماعليك من بعض الحتسي اللي ما يجيب الا التحطيم وهدم الرووح المعنوويه شد حييلك يالذيب وتوكل على الله وشوي شوي % حتى تكوون من اكبر موؤسسات المقولات بالديره اخلص النيه والعمل بكل مصداقيه وامانه وانا اضمن لك الفايده موووفق |
انا ابنصحك نصيحه كانك معاك فلوس عطهن معقب وريح بالك لان بيطلع عليك اشاء ماحسبتهن وكل شي بالمعارف
فيه معقبين يجلس شهر ماجاب الرخصه دورلك معقب شاطر واهم شي احرص على الشمال لان البلاديه الشمال سريع سريع بلاديت الجنوب عليها ضغط بس لايمسكها السالم في بلديت الشمال ماتطلع لو انت نضامي الله يهديه خسرنا خساير والمشكله كلمت سوري ههههههههههههه علشان يكلمه المشكله ان السوري يمشي اشغاله عند السالم واكلمه ابي الرخصه طلب من السوري ازيله معامله من مكتب العمل ورفضت قالي زين لي المعامله اوقعه من عند السالم لانه قبل موقعين معامله من عنده عن طريق السوري والله حرام واسطنا سوري وراح المحل بلوشي انواع الخساير لاكن الله لايوفقه |
أذا تبي أوراقك كلها تضبط خلال شهر وتفتك من وجع الرأس و أصدار (( أربع فيز )) أو خمس فيز
أذا أمكن أرسلي بالخاص ولا عليك من الهرج الزايد .. لقيت لك الحل :) وأذا أنت تبي تخلصها بروحك ما راح يصدر لك الإ فيزا وحدهـ وتخب بعد غير وجع الرأس والأمراض المستعصيه والوسوسه قبل تنهي أوراقك ويمكن يبي لك ثلاثة أشهر على بال ما تخلصهن . تقبل مروري . |
بسم الله الرحمن الرحيم آسف على التأخير ونستلم الردود واحد واحد اقتباس:
عندي خبر وشكراً لك على المرور اقتباس:
اقتباس:
اشكرك على توضيح الخطوات أما وجع الراس فهذا شي لابد منه في هذه الحياة. المواطن , النمس أنا , بريدة sun , متوهق , أبو نجود , ramy شكراً لكم جميعاً على الردود المثلجة للصدر وتفاعلكم مع الموضوع بشكل كبير. بس عندي تعقيب بسيط على بعض الكلام اللي قيل: كان أغلب الكلام عبارة عن : تحذير من الفشل بتوضيح عقبات معروفة لكل مشروع. يعني نظرة ليس فيها أمل بل خوف وتردد. ولا ألوم الشخص اللي يحذر لأنه بالتأكيد ذاق تجربه مرّة ولا يبي غيره يمر بنفس التجربة. وهذا دليل على نبل أخلاقه. لكن السؤال اللي يطرح نفسه؟ ليش حنا دايم خايفين من الفشل قبل ما نخوض التجربة؟ ما تدري يمكن تصيب معك وتصير حققت لو جزء بسيط من أحلامك. وليش دايم تفكيرينا حول الوظيفية وحنا نشوف اليوم شلون إن اصحاب الوظايف ما يمتلكون بيوت (البعض منهم) وإذا امتلك الواحد بيت امتلكه بعد ما يصير عمره على أقل تقدير 35 سنة -كلامي عن المتوسط من الناس- والموظف كل سنة يزود راتبه على المتوسط كذلك 200 ريال. واللي يشتغل حر خصوصاً في العقار أو المقاولات أو أي عمل حر متمكن منه (وما راح يتمكن منه إلا بعد خبرة وممارسة وخسارة وربح مرة ومرتين) تلاقيه لو طور مؤسسته من جزء من أرباح السنة اللي راحت , جابت له دبل الربح حق السنة اللي قبله. وإذا فتح لها فروع زادت الارباح كذلك ضعفين. أيضاً لا تنسى إنه بيكون سبب لرزق ناس يشتغلون عنده ويصرفون على بيوتهم من عمال من مهندسين أو غيرهم. يعني الله سخره ليكون سبب رزقهم. وقس على ذلك ما تشاء. يمكن طولت شوي.. ويمكن بالغت في أحلامي.. بس من الجميل إن الواحد يحلم ولا يحرم نفسه من الأحلام لأنه ببلاش. ولا ننسى قصة أديسون (مخترح المصباح الكهربائي) بعد ما فشل في تشغيل المصباح أكثر من 1800 مرة وقيل 1000 مرة , وقيل أكثر وقيل أقل لكن الشاهد هو إنه يوم أجرو معه مقابله صحفية قالو له : كيف تسمي نفسك ناجح وانت فشلت في تشغيل المصباح أكثر من 1800 مرة . رد أديسون على الصحافة وقال: على العكس بل أنا الآن عرفت 1800 طريقة لايمكن يشتغل معه المصباح الكهربائي. فالتجربة تعلمك أشياء تستفيد منها في حياتك. سيلمان الراجحي التاجر المعروف اللي له بنك الراجحي والمشاريع الخيرية الأخرى والوطنية وغيرها , تدرون إنه كان فقير وطلع من بيته يوم كان عمره 18 سنة تقريباً رايح لبيت واحد غني يبي يشتغل عنده طباخ. وشف الآن من كبار التجار ليس في المملكة ولكن في العالم بأسره , وهذه القصة على لسانة من شريط قصص الناجحين. وأنا أعلم أن زماننا يختلف عن زمانه لكن الفرق الذي من أجله أتحدث هو: أنه حاول ووصل ولم يخشى الفشل ولا العيب , وكثير في زماننا يخشى الفشل ولا يحاول ويستسلمون للخوف. وقليل هم الذين على شاكلة أديسون وسليمان الراجحي. اعذروني فهي وجهة نظر من محب. |
الله يوفقنا وياك ,,,, تبي شريك يالذيب
|
على القوة
|
السلام عليكم
انا من رأيي انك تقك رويحك وتسلم المعاملة حدى مكاتب الخدمات العامة وما يأخذون كثير على اللي بتطلعه من الفيز واذا قررت فعليك بمكتب يقاله عاجل مقابل الجوازات الجديدة أنا رحت لمه وسويت عنده كمن اقامة وررررخيييص من الحين الى بكرى انت أسال ومب ضارك السؤال تقبل مروري |
دام ماعندك الخبرة الكافية في المقاولات من الأفضل أن تفتح بقالة في البداية وإذا تطورت افتح مؤسسة مقاولات
|
اقتباس:
شكراً لك على النصيحة ومرورك مقبول |
| الساعة الآن +4: 08:42 AM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.