|
همسة لبناتنا من محب
السلام عليكم ورحمة الله وبركاته
مساكم الله بالخيرات والمسرات والبركات أعضاء منتدانا الاكارم مدخل : عدم اهتمامي للبنات مو كله عقل وثقل , لا والله بس الحظ مخقول خقل أكتب لكم موضوعي المتواضع وأنا جالس في الجو العليل وبجانب الخليل ( الخليل : أمي فاطمة حفظها الله :) والجو يالله من فضلك قمة السموم , والشاهي والقهوة قدامي لهن ساعة أنتظر يجي أحد يقهوين لأن من ضمن هواياتي ( العجز ’ وجمع الطوابع) وأبوي الله يمسيه بالخير شكله خرمان قهوة بس يبين أفهمه وهي طايرة وأقوم أقهويه وبدون مايقولي قم صب ( لكن حلم ابليس بالجنة ) وكل ماحط عينه بعيني أنشغل بالكتابة عشان أضيع السالفة فيوم ضاقت بأبوي الحيلة قال : أنت الحين لك ساعة تكتب , وش عندك ؟ قلت : والله خبرك السفر بعد كم يوم , ولازم أكتب فوائد عن كيفية استغلال الإجازة بما ينفع عشان أقراها عليكم بالسفر , قال : الله يثيبك ياوليدي , وللمصادفة توني سمعت بالرادو حديث بعنوان ( صلة الأرحام ) قلت : والله موب منك , من خرمة القهوة عاد يوم طلعت أختي للحوش وجت تقهوينا , أخذ الوالد الجريدة وجلس يتصفحها وياصلة الأرحام راجعينا بكرى المهم مالكم بالطويلة موضوعي اليوم يتكلم عن بنات هالزمن الله يخليهن لعين ترجيهن ويقر عيوننا بصلاحهن قولوا ااااااااااااااامين مثلكم عارفين أوقات الإجازة تكثر فيها الطلعات والدخلات وأيضا مثلكم عارفين الأماكن اللي يطلع لها بديرتنا محدودة وبعنف عاد مرة من المرات طلعنا للحضاري اللي أزعجونا عنده الناس فيوم جينا ندخل عند البوابة بجنبي ( أخوي ) ويدف المامي فاطمة بالعربية عاد فيه بنتين من البنوتات يطيحن الطير وهو طايحن بالأرض ما أقول إلا اللهم صلي على محمد يوم شافن المامي بالعربية ورجلينه يسحبن بالأرض قالن لأخوي : إرفع رجلين أمك عن الأرض ( والله من اللقافة والجرأة عند بعض البنات ) كيف يتجرأن يكلمن الذئب البشري بهذه الطريقة ؟ ( حقوووووووووود) قالهن أخوي : وش تبون أسوي له ؟ ( دخل معهن بالخط على طول ) وأنا عندي قاعدة , إذا جيت أدخل أي مكان فيه تجمع بنوتات أخلي أخوي يدف المامي وأنا سلمكم الله أمسك أحسن بزاريننا وجها , وأصغرهم مبسما , وأوسعهم عينا , وأعدلهم خشما . وأشيله معي عشان البنات يطلطلن علي ( عليك أفكار مثل وجهك ) يوم جلسنا بالفرشة , عاد وش أقول ووش أخلي عن الزحمة اللهم ياكافي ( وراك قلبت عجوز) من قوة الزحمة وأنا جالس بالفرشة مع العائلة الكريمة عطست يوم قلت : الحمد لله سمعت صوت يقول : يرحمك الله أثر صاحب الصوت بنوتة بالفرشة اللي بجنبنا قسم بالله لو أصافحه , كان صافحته يدا بيد فاااااااااااصل : معا يدا بيد ضد أصحاب المشاكل في هذا المنتدى العزيز عدنا : أقولكم سلمكم الله عقب سالفة ( يرحمك الله )قلت للأهل : عن إذنكم بروح قالوا : على وين ؟ قلت : لدورة المياه الله يكرمكم , وأنا ناوي أفرفر بالمنتزه وأتأمل بمخلوقات الله ويوم رحت لقيت فيه خيمة ومليانة من مخلوقات الله اللي يتسوقون وأبصملكم بالعشرة إن اللي يشترون من اللي يتسوقن مايتعدون أصابع اليد الوحدة اللي مقطوع منه إصبعين , والباقي كلهن ماغير مسويات زحمة وزود فتنة ! يوم دخلت الخيمة حطيت عيني بعين وحدة يوم حمّرن خدودي من الفشيلة أبعدت عيني , وهي قسم بالله مانزلت عينه ( سبحان الله ,إنقلبت الأية , وصار دحين الرجال هو اللي يستحي) ! وحدّث ولا حرج , من رفع أصواتهن عند السواليف فيما بينهن , وأنا أفرفر بالخيمة شفت بنت تبي تشري غرض فقاله اللي يبيع السعر فقالت : الله يخليك نزل السعر شوي قسم بالله يوم سمعته تقول الله يخليك بغيت أدفع عنه السعر يوم مليت من الخيمة , وجيت أبطلع شفت قدامي مجموعة بنات وسمعتهن يقولن : وهن يأشرن علي شوفوا هذا لبى قليبه والله مزيون حيل , عاد أنا مافيه ثقة بنفسي يوم إلتفت ورى طلع شامي من اللي يبيعون بالخيمة , فرجعت للفرشة وأنا أفكر بالفرق بين بنات الأمس وبنات هالزمن فقلت : الله يرد بنا خير قبل ما أختم كلامي أهمس للبنات اللي يتكشخن ويتمكيجن ويطلعن زينتهن للناس نظرة الشباب لكم أقرب ماتكون للإستحقار وبعيدة كل البعد عن الإحترام حتى وإن كانت نظرتهم لكم متعة مؤقته ولو سألت الشباب : هل تريد أن تكون هذه زوجة لك ؟ فالجواب لايخفى على الجميع !!! أما نظرة الشباب للمحتشمات فمبنية على الإحترام والحب والتقدير همسة كالعادة : القصة ليست من واقعي بل من نسج الخيال أرق التحايا والتقدير مجنوووووووووون بريدة |
خيالك وااااااســـــــــــــع
لا عاد تتخيل |
أصلاً اللي يتكشخن بالسوق والأماكن العامه ..
ذولي قبيحات يجيبن البلا يبن يهتم لهن أحد بطبقة المكياج ذي اللي يقالهن يموهن ويخادعن ويعني ترانا جميلات .. ولا بالصدز يجيبن الطاعون علطول !! أما المحتشمه والله ماهمه الشباب مالتن من المدح اللي جايه من قبل البنات << دقة للعيال :113: شكرا على الموضوع الرائع .. والصرآحة الحين بوه موضة جديدة بعض العيال اللي مايستحون يضايقون اللي مازينت شي ومحتشمه .. إيييييييه ,, الله يعيننا بس على هالطحالب << :113: |
الله يهديهن ويردهن إلى صراطه القويم
|
شكرا لك على هذه الهمسه الله يستر علينا وعلى بنات المسلمين ويديم علينا الستر والحشمه وكل هالقصه خيال وانا داخلة جو من البدايه |
مااقول الا الله يهدينا ,,
|
ما نقــول اللهـ المستعـــان والله أتعجب من بعض البنات أين الحياء؟؟ ربـــي يهديهن ويستر عليهن الحمدللهـ على نعمة العقل لو فكرت بحكمهـ لم تفعل ذلكـ |
خيالـــــــــــــــــــــك فله
الله يستر علينا وعلى المسلميـــــــــــــــــــــن |
تجيك الوحدة عيونه تجننننننن ,, بس لا شفنا الوجه اللهم لك الحمد !! وهي اللي تجدع نفسه على الشباب ووجه مغسول بمرق !! أما المتحشمه تكسر عينه !! بس أشوف من تالي إن الشباب يلاحقون المتحشمات :confused: الله يهدي الجميع ,, |
الرجال بعد قليلين ادب قسم........مره جالسين بالحضاري أنا واهلي(( انا واختي فاتحين النقبات ))شفنا رجل مقبل يقزنا ذاك القززززززززززز قالت اختي تغطي وبسرعة البرق تغطينا مادرينا الا الرجل الحقيييير اخذ طرف شماغه وتغطى بووه عاد اختي طلع لها قرووووووووون قالت بصوت يسمعه حيوان وماتسمعين الا كركرته لو انا ولد كان عطيته بوكس ينثر سنونه بالثيييــــــــــــــــــــل خخخخخخخخخخخخ
|
قبل ما أختم كلامي أهمس للبنات اللي يتكشخن ويتمكيجن ويطلعن زينتهن للناس
نظرة الشباب لكم أقرب ماتكون للإستحقار وبعيدة كل البعد عن الإحترام حتى وإن كانت نظرتهم لكم متعة مؤقته ولو سألت الشباب : هل تريد أن تكون هذه زوجة لك ؟ فالجواب لايخفى على الجميع !!! أما نظرة الشباب للمحتشمات فمبنية على الإحترام والحب والتقدير همسة كالعادة : القصة ليست من واقعي بل من نسج الخيال أرق التحايا والتقدير مجنوووووووووون بريدة مجنون بريدة أنت جدا راااائع ومبدع تسلم |
..
كتبت فأبدعت ~ أوصلتها بإسلوب شيق ,, شكراً لك ~ .. |
اقتباس:
شاكر ومقدر مرورك |
اقتباس:
وأول مرة أسمع بمضايقة الشباب للمحتشمات بس للأسف كل شئ جائز بهالزمن شاكر ومقدر مرورك |
اقتباس:
شاكر ومقدر مرورك |
اقتباس:
إذا كانت قصتي خيال ولكن الواقع هو الواقع ! شاكر ومقدر مرورك الكريم |
اقتباس:
شاكر ومقدر مرورك الكريم |
اقتباس:
شاكر ومقدر مرورك |
اقتباس:
شاكر ومقدر مرورك |
اقتباس:
>> اللي على راسه بطحاء يتحسسه << سـلـمـت أنـامـلـك عـلـى الـطـرح الـمـميـز ,, خـيـالـك لامـس الـواقـع ,, *أنـا شـفـت أردى مـن كذا بالـحـضـاري* مـشـكـــووور "مجنون بريدة" وإلى الأمام وجزاك الله ألف خيـــــــــــر الله يهدي شباب وبنات المسلمين أجمعين.. |
كبرياء أنثى
الواقع والمشاهد لن يحجب بغربال ولن أتكلم من فراغ وأسأل الرب أن يستر على بناتنا وشبابنا وأن يردهم إليه ردا جميلا شاكر ومقدر |
أسلوووووب جميل و قصة ليست قريبة من الواقع .......!!!!! بل هي الواقع بعينة . هدا الله الجميع . |
| الساعة الآن +4: 01:23 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.