|
وانكسرت الأماني .. شهامة رجالنا .. وعزيمة نسائنا .. لكِ الله يا (بريدة)
السلام عليكم ورحمة الله وبركاته ,,
وانكسرت أماني الحسّاد على بريدة :41 للأسف الشديد لن أضع مقدمة أبن خلدون :d سوف أدخل بالموضوع ,, بما أن بعض الأعضاء للأسف الشديد .. يحاول دس السم بالعسل ومحاولات إحباط لكل من الطرفين فقد ظهر علينا أسلوب جديد في هذا المجال ,, ومنظمة فرديه :d .. يحاولون التغرير برجال أهالي بريدة الكرماء والنجباء فالكل يحسد أهل ديرتي .. لأن لهم عدة صفات يغبطه بها .. جميع من حوله سواء بالداخل او الخارج فرجالنا ولله الحمد محافضين على سنة الله ورسوله ,, وعلى شريعتنا الغراء .. فلم يسمحوا بمظاهر الغرب او حتى أفكارهم أن تغرر بهم .. ووقفوا وصمدوا أمامها فكل من كان خارج بريدة ودخل بريدة قال .. هذه أرض سلف صالح .. المجتمعات تغيرت وأصبحوا يحلون الحرير .. ويحلون ماحرم الله ,, إلا من رحم ربي .. فإن دخلت في البيوت فهي أسرار..فتجد المشاكل .. بينهم لا ثالث لهم وحتى أولادهم يكبروا ولم يعروف ولو بمشكلة قد حصلت في بيتهم .. ولله الحمد فرجال هذا الزمان .. قد فقهوا وعرفوا مالهم وماعليهم ,, فنجد الزوج .. غالباً يبحث عن أهل ديرته ايضاً نجد من هم خارج هذه الديرة المباركة,, يقولون سنتزوج من بناتها , وشرف لنا ولهم .. وإذا يستاهل ونعم الرجل ,, فالبعض يقول ,, لا اريد من ديرتي أريد تحديداً من (بريده) طبعاً هذه الكلمة لم تأتي من فراغ فمجتمعها المحافظ ,, قد وصل صداه أرجاء مملكتنا الغالية فلا تجد من بناتهم إلا كل حنيه ورق واريحيه ,, ونجد الشعر والنثر قد انطلق من هذه المدينه المحافظة (أنا لا أتكلم على الشواذ) والشاعر لم يأتي بشعره من فراغ ,, فقد صاغ الكلمات من ماء الذهب على مدينتي الغالية ,, لكل الله يامدينتي ويا أهل مدينتي كم كثر الحسّاد في وقتنا ,, فنسائنا يرغدن بأفضل عيش وأفضل بيئة وليس كما يضن البعض انهن محجورات محجورات كما يسمعن من الغرب ,, رجالنا لم يقصروا على زوجاتهم ,, فهن أميرات في بيوتهن .. عفيفات مع أزواجهن إن طلبت .. لبى لها عيونه وإن اشتكت .. استمع لها بكل أريحيه وإن غضبت .. راضاها اما عن ,, نساء مدينتي فلا تسل فالكلام يكثر ويطول في مديحهن جمال واخلاق .. وحسن تربيه .. وعفاف .. وحفاظ لبيت زوجها واولادها واهني يـ اللي من بنات بريدة نصيبه يعيش مابقى من عمرهـ في سعادة بنات العز والجمال والطيبة بنات الدين ومجروحه فيهن الشهادة ويقول الشاعر جمال رباني والملح والله بزيادة بنات تلاقيها دوم في الظروف الصعيبة ثم يقول .. ويضرب المثل بينها وبين الأجنبيه ماهي طبع بنت أجنبيه تجيبه مظهرها دلع وبالخفى تبين أحقاده عقرب تبن وعلومها دايم مريبه ماجت من أهلها لعيونك وسوادهـ هذه أحدى مميزات هذه المدينه المعطاء ,, والمثل يقول (لكل بارز أعداء) ولكننا ولله الحمد لانبالي بكل حاقد وحاسد ومنافق .. فطريقنا واحد .. وحبلنا بالله وفي الله لم ولن ينقطع بإذن الله فنحن معتصمون به إلى يوم القيامه ..إن شاءا لله كلمات خرجت من صدري لتلامس هدب عيونكم بكل رقه خلجات محب :41 وش رايكم بأسلوبي ..؟ :d بدايه قوية صح لأن أكتب شعراً وخواطر ==>>> راح وطي بقايا ذكريات :d |
وعليكم السلام ورحمة الله، أهلاً بالتسذوب أبوفهد :d..
قريت الموضوع ثلاث مرات أوليتهن بالتراب وبتلت أضحك عجزت أصدق كلمتين على بعض :113:.. التسذب يقطر من لسانك كما يقطر العسل من خلية النحل ooo1.. اقتباس:
أحس إنك فاتحن كتاب المطالعه وجالسن تختار الكلمات ماخبرتك تسذا راعي هرج قوي!!! :d بعدين أي لم يسمحوا بمظاهر الغرب أن تغرر بهم! نسينا ماكلينا! نسينا اللي شفناهم بالمطعم :rolleyes:.. ذاك وخويّه ooo1.. اقتباس:
اقتباس:
يابطنىىىىىىىىىى أوجعن من كثر الضحك أيوه يابوفهد وش غيره!! اقتباس:
الله أكبر ولله الحمد، الله أكبر هذه هي حياة السلف رضوان الله عليهم. إنني أرى لمحاتها على مدينتنا العزيزه :d. أقول بوفهد من اللي معلمك التسذب! :113:. اقتباس:
خابرك أنا منتب فيد هالأمور :rolleyes:.. بمان الله ياحلو، ولا بغيت تتسذب تعلم أصول التسذب زين.. قال إيش! قال أرض السلف الصالح :113:.. أقول ماتبي توت بس!!!! |
... يسلملي هالاسلوب واللهـ ,, تشكيرات لكـ يالمنخرش والله من بداية قوية وجاده ماشاء الله ... |
مشكوور
|
ههههههههههه << توه يفهم أجل إنكسرت الأماني ههههههههه :d..! |
(وانكسرت أماني الحسّاد على بريدة )
صدقت أخوي |
اظنك تقصد (يثرب) وليس بريدة ..!
لا بريدة |
موضوعك رااائع وأسلوبك كذلك ((ودقة قوية)) أجل انكسرت الأماني خخخخخخ ",", ولي تعليق على( الصباخ) ترا اللي شفتهم بالمطعم من الشواذ اللي استثناهم المنخرش حفظه الله من كلامه",", |
تسلم والله على هالحتسي الصراحة يهيل العقل ياليتك ماقلت اسم المدينه (فالبيب بالاشارة يفهمو :d لأن الحقد والحسد والتوليف راح تشوفه بام عينك (وش جانا منكم ياهل بريدة الا التشدد :mad: < مثال إلا يابو فهد شكل أم فهد مرضيتك هاليومين . . وقلت خلن الزخله هالموضوع لعيونه < هذا أكبر دليل على الوفاء تراوه :113: |
والله ماعرفنالكم يارجال بريدهـ!! مـرّهـ تـسـبـون الـبـنـات ومـرّهـ تـمـدحـونـهـن!! اســكـــتـوا بـس لا تــــسـبـون ولا تـمـــدحـــــون.. ,,,,,,,, |
والله لو انها المدينه المنوره المباركه
:) |
ززين مره مدح ومره سب
عموما اهل بريده ماينفع فيهم شي ..اذامدحهم الواحد قاموا قالوا لا حنى مابنا المدح الزايد:( واذا سبهم الواحد واااوك مايخلون له فررصه بالحتسي ويأدبونه تأديب يااويله يتكلم المره الثانيه:( وشكراا لكم |
هههههههههههههههههههههه يافتى المنابر .. كنت في السابق فتى سياكل . فكيف جئت هنا لتخاطبنا بلغة صارمة . وكأني أرى عينك تقدح شرراً على الحاسدين أيا منخرش هلاّ قلت لي من أين أتيت بعنوانك الزهيد وانكسر الأماني .. فإنني أراك فوق أكتاف الأدباء .. فرفقاً بهم يافتى العرب .. وإني أرى بقايا ذكريات جف قلمه لقراءة أديب الأدباء المنخرش الفتى النجيب .. -- >> أقووول يالمنخرش شكلك عقب الكهرب والاتصالات وحالك حالة .بديت تكتب صح صح تذكرت . أنا ما ألومك من قبل لأنك تعاني من شركة الكهرباء والاتصالات ما عطوك فرصة الله يخسهم تكتب لنا من العبارات الجميلة .. لكن يبدوا أنك في رااحة تاامة .. فبدأت تنثر مداد قلمك كما تتناثر الأسنان من اللكمة .. |
اقتباس:
هذا أحسن بيت سمعته بحياتي .. :113: المنخرش .... والله عرفت تجيبه .... خاطرة لم أسمع بها قط ... |
تسلم على الموضوع الجميل جدا
يابوفهد والله نفعك السفره والغه انت درست اقلينزي والا عربي |
تسلم يابقايا منخرش على هذا الطرح :d
|
وانكسرت الأمآآني..آآ.. . . |
هههههههههههههههههههههههههه أبوك يالأسلوب :d لكن تبقى بريدة عامرة بأهلها موب بحاجة أحد يدافع عنها |
^^^ ياويل تسبديه بعد . . أبو محمد ماتسد سمعت اللي يقول (اسأل مجرب ولا تسأل ولاف:113: والحق لازم ينقال ولا بوه عيب .. بس العيب بهالقلوب المليانة غيره .. |
اقتباس:
|
ابو محمد النجدي
لاتجيب طبلونك هههههههههه |
.
أعتقد أن من مقاصدِ مقال أبي فَهد مغثة ومعَاندة بعض الأراء والأطراف .. فعنوان الموضوع يوحي بذلك ;) وكلاالرأيين على طرفي نقيض .. فمجتمعنا ليس مجتمع سافل ومنحط وفاشل. . ولا هو ملائكي منزهُ ملهم . بل فيه وفيه . ولايجرمنكم شنئان قوم على ألا تعدلوا .. وكذلك أقول / لايجرمنكم حبُ قوم على ألا تعدلوا وتنصفوا . الإنصاف .. الإنصاف بورك فيكم .. . |
أعتقد أن المنخرش وقاه الله من الفتن ماظهر منها ومابطن .
أنه كتب المضوع كردة فعل تجاه أمر ما في وقت ما في عراكٍ ما . ويبدو أنه استحضر حريم أول وهو في ذلك معه كل الصدق فيما طرحه . أما الوقت الحالي فكما قال أبو محمد اتضحت المبالغة قليلا في تنزيه مجتمعنا . بناتنا وألف نعم ولكن لايخلو الواقع من المشاهد التي يندى لها الجبين في الأسواق والحدائق وحتى إذا ذهبن إلى مكة الشريفة فنجد البعض ( البعض ) منهن هداهن الله ماغير تمتير بشركة مكة وأبراج زمزم فأصبحن مطمع لكل من هب ودب . وإذا رجعت ... هاه يابنيتي وينك ؟ والله كنت بالحرم !! |
اقتباس:
صحيح كلامك يا قانون السيطرة ..... بارك الله فيك ... وييييييييين حريم أول الله يرحم ذيك الأيام ..... أما هالحين ...... بعضهن الله يخلف زي ما قلت في مكة ..... !!!! |
.
من بالغ بالمديح سقط ومن عمم اهلك ولاكن بين هذا وذاك ... ابوقرون اقتباس:
اين قوامتك؟؟ . |
^^
ولكنه التمرد .... !!! |
انكسااااار أماني ؟!! هههههههههههههه ترى أبو فهد مهب يقصد بعض ناس :045: والله إن حريمنا مااااا هنا زينهن . . بس لو يشيلن من روسهن شي إسمه السوووووق تسان طلعن إكّه :41 |
^^^^^^^^^^^^ يروحن للسوق عشان يواكبن الموضة والكشخة تبيهن دايم عليهن قميص عصر القميص راح من غير رجعة :d |
^^ ^ خطأ خطأ للحين مانستغني عن القميص !! السوق مكان لقضاء الحاجات والحمد لله انه مو حراااام!! لكن المشكلة فيمن اتخذت السوق مرتعآ ومكانآ للتنفيس و(الدوران) بغير حآجة , وزود عل كذا تتبرج وتتعطر وطييييح فتنة بهالشباب (اللهم لاشماتة) .. بس الشرهه مو عليهن الشرهه على أولياء أمورهن >>>وأكثرمايقهركـ اذا كانوا هم اللي موصلينهن عند أبواب الأسواق !! التوعية مطلوبة والصنح بإسلوب لين مطلوب (مو بالغصب) , حاولوا مع منهن تحت أيديكم لأنكم مسؤولون عنهن , والطرق كثييييييرة وكل واحد وشطارته , بإمكانم (تكرّهون) بناتكم على هالعابايات , وذلكـ بمعرفة طرق تفكيرهن ونقاااااط الضعف .. <<<كل هالكلاااااااااام مجرب ونجح .. تحيتي للجميع .. ومع شكري لكاتب الموضوع .. |
اقتباس:
عفواً يبدو إنك فهمتيني غلط مقصدي إن البنت تختلف عن الرجل باللبس البنت ضروري تهتم بشراء الملابس والاكسسوارات ووووو......الخ وحتماً ستطلب السوق بين فترة وأخرى لقصد هذا الغرض |
الكلام يطووول .. وسأحاول الاختصار إن شاء الله :
أولا : المنخرش : أيها الفاضل .. بريدة تاج المدن ولله الحمد.. ومعروفة إنها ديرة الحمايل وكثير اللي من برا القصيم يبون يتزوجون منهن .. وفيهن الزين ما يخفى ...ولكن لا تعمم.. بريدة الآن مثلها مثل أي ديرة ثانية.. فيها الصالح وفيها الطالح.. وكل هذا ما أقول شيء .. لكن تجي وتدوس على طرف الأجانب فهذا يخليني أقول لك : ليش!!!!!! أنا الأجانب والأعاجم اللي أعرفهم يرفعون الراس .. ويا ما وياما أجانب وأعاجم لهم دوووووور في نهضة المملكة وخاصة بريدة.. منت مصدقني أجل إسأل الشيخ الغضية.. وأسأل آل الحميد .. إسأل الشيخ الربيش والفايزي والفوزان وكل كبارية بريدة يشهدون بأن لهم دوور في نهضة بريدة.. حتى الشيخ السديس من اللي درسه القرآن !!!! جد البلوشي الله يرحمه.. وكل مسلم.. ولا تنسى القراء الأربعة عشر اللي جابهم الشيخ الحميد الله يرحمه .. ليش جابهم ..!!! مهب علشان يعلمون القرآن لعيالنا وعيال بريدة!!! إذا أنت تسب كل أجنبية فاعلم أن بنات هالقراء اللي جاؤا هنا تزوجوهم حمايل بريدة .. مو نقص ببنات بريدة .. لكن هذا النصيب .. لو أنت قايل بعض الأجنبيات كان أقول صح .. لكن التعميم بالخير وبالشر ما يصلح يا جماعة متى راح تفهمون!!!! والله لولا الستر على المسلمين والمسلمات لأسرد لك قصص بعض بنات اللي ما يخافن الله بالرغم من إنهن بنات الديرة... ملخص كلامي : تبي تمدح يا أخوي امدح .. لكن لا تسب غيرك وأنا أختك .. والله ما بقلبي عليك شيء .. بس والله قهر ... إذا بعض الأجنبيات أخطأن فهل كل أجنبية غلط...!!! وإذا بنتنا المخطئة فهل ودك إن الأجانب يقومون ويقولون كل السعوديات غلط!!!! لا يا أخوي لا تعمم.. أسلم لنا ولك.. اللهم هل بلغت .. اللهم فاشهد.. أختك : غربة الخاطر.. |
^^^ رد بمنتهـى آلأدب وآلعقل ,, آلله يثبتك يآ خيتي ويرزق آلعقل بعض نـآس آلمنخرش ^^^ آسمحلي آقول عنوآن موضوعك ((إنكـسـآر آلأمآني )) مآكــآن له أي دآعي .. إذآ كآن قصدك تقهر بعض نـآس حآول تكبر عقلك شوي عن هآلتفآهـآت وترفع نفسك آسلم لك ,, وديـ ,, قصيميه كوول ,, |
تجعلون من بناتنا وجهةٌ مقدسه . وأغلبهن لا يعرفن تدابير البيت ومسؤلياته . لكل زمنٍ جيل . فكفانا زيفاً وخداعاً !
فلنتحدث بالمنطق والإعتدال والواقع . |
أنا ما أدري أضحك ولا أصيح من كلامك...!!!!!!!!!!!!!
والله يا أبو فهد أنا اللي حصل معي عكس اللي أنت تقوله تماما.. أنا سعودي ولد بريدة من أكبر حمايل بريدة ولله الحمد.. وما يعيبن شيء ولله الحمد لا بخلقي ولا بأخلاقي ولا بديني ولا شيء أبد ولله الحمد.. تزوجت بنت الديرة .. وورتني نجوم الظهر للأسف... أنا ما أسب بنات ديرتي .. بالعكس .. لو سبيتهن فأنا أسب أمي وخالاتي وعماتي وأخواتي وحريم اخوتي...وقريباتي.. لا .. والنعم في أهلي وبنات ديرتي .. بس أبدا ما أسمح لك تسب الأجانب .. زوجتي الأولى سعودية وبنت حمولة لكن للأسف طلعت بلا ذمة ولا ضمير.. ولا دين.. والله لولا أن المسلم مأمور بالستر لفضحتها إلى قبل .. لكن عمر أهلي ما دروا عن مشاكلها علشان أقولها لكم... لكن وربي يشهد صبرت عليها .. وقلت الأيام والعشرة الطيبة كفيلة بأن تقارب بيننا.. ولكن لا حياة لمن تنادي.. لقلت لها شرق قالت غرب .. ولقلت اطبخي قالت خل الشغالة تسويلك أندومي !!!!! وما بين النصح والموعظة الحسنة والمعاملة الطيبة عشت معها 3 سنين ذقت المر بأصوله.. ولا عمري شكيت لأهلها ولا أهلي .. حتى آخر شيء هجرتها بالفراش غديها تتوب عن سواياها .. ولكن أبد.. كل ما سويت لها خير تمادت بالطغيان..وتطالب بأشياء محرمة شرعا .. المهم طلقتها .. ورفضت الزواج وقلت كل البنات كذا .. يوم أصروا أهلي يزوجوني قلت مابي سعودية .. أبي أجنبية.. وقعدت أفكر .. إذا بنت ديرتي ما ضمنتها .. وشلون أضمن الأجنبية.. ضاقت بي الدنيا .. وعرفت الحل : الحل لقيته في قيام الليل .. كنت أصلي وأدعو ربي أن يرزقني واحدة تخاف الله أبيها لدينها وبس .. مابي البياض مابي الجمال مابي المال مابي الحسب ولا النسب .. بس أبي واحدة لدينها.. والحمدلله .. سخر الله لي زوجة .. أعجمية .. حافظة للقرآن..همها الجنة .. وهي التي غيرت نظرتي لبنات ديرتي وقالت لي : إذا أنت كرهت بنات ديرتك فكأنك تكره أمك وأختك.. الله لا يغير علينا نعمته.. ولكن إذا أنتم ذقتم الشر من الأجانب فهو بأعمالكم ونياتكم.. وعلى نياتكم ترزقون .. إذا أنت متزوجها ومطمعها بمالك وحلالك فليش تستغرب إذا استغلت المواقف معك..!!! أتحدى أحد يبي الستر ويطيح بواحدة نذلة .. أنا يوم كان همي الزواج وبس لقيت اللي ورتني نجوم الظهر.. لكن يوم صار همي الدين والجنة سخر الله لي اللي تساندني في طريقي للجنة.. والحمدلله الذي بنعمته تتم الصالحات.. ......... ساري الليل......... |
سيروا دقيقتين فقط ، في أسواق الموضة قليلاً .. وشاهدوا أعتقد من دافع الدفاع الكامل عن بريدة سيَعود لإضافةِ رد جديد.. غير ردّه الأول .. !! د / ماسنجر |
نصيحتي لكل شاب يبي الزواج :
خل همك الدين وربي يرزقك فوق ما تتمنى وتشوف بنفسك.. |
موضوع قوي على بريدة يابوفهد . |
؛ |
اقتباس:
اخي ساري الليل .. اولا الله يوفقك ويسعدك مع زوجتك ثانيا هل تضمن لكل رجل لو اخذ من ديرة زوجتك الاعجمية راح يسعد مثلك ؟؟ وهل تضمن ان كل رجل لو اخذ من بنت البلد وبنت الحمايل راح تكون مثل طليقتك ؟؟ من منطقك ارى رائحة انتقام في ردودك لزوجتك الاولى .. وخاصة موضوع الاندومي ..!!! هذا نصيبك يااخي .. ولاله دخل عربي اعجمي وغيره .. ــــــــــــــــــــــــــــــــــــــــــــــــــ ـــــــــــــــــــــ اما بالنسبة للاعضاء اللي هبو بسب البنات .. نحن معكم اخواني المماليح ان في بنات خربن السمعة وللاسف كلمالهن يكثرن .. بس لاننسى مماليح بريدة الشباب .. طبعا مو كلهم .. بس الاغلب دوران بالسيارات ومغازل وقل دراسة وسفريات للبحرين وسوريا واكبر همهم الحريم :eek: كان به خوف من الله بربس لي بالمصياف والمطياف اوكانه مايخاف الله بربس لي بالروسيات والمغربيات والنوريات . وهمق بالجوال وتبلي ببنات المسلمين .وبربسة بالشغالات ....وخيانات وجفاسة وتحكم وتسلط وبخل و و و ...... طبعا بعضهم مب كلهم .. فقط البعض .. يعني تقريبا كثر البنات اللي تحتسون بهم :d |
أكيـد عم تمزح مو هيــــــك ؟! ! |
اقتباس:
أولا : الله يجزاك خير لدعائك لي بالتوفيق.. ثانيا : أنا لم أدعوا الشباب للزواج من خارج الديرة اللي هم منها .. أنا قلت لو تخلي همك الدين والله راح يرزقك فوق ما تتمنى.. لأن رسولنا الكريم لم يأمرنا بأن نأخذ من بنات الديرة اللي حنا منها.. ولا قال خذوا من برا الديرة .. إنما قال : (( تزوجوا الودود الولود )) وقال بمعنى كلامه : (( .. إذا نظرت إليها سرتك .. وإذا غبت عنها حفظتك في نفسها ومالك)) وقال : (( فاظفر بذات الدين تربت يداك)) ولم يقل إلا ومن ديرتك وبنفس جنسيتك.. وأتمنى بارك الله فيك لو ترجعين لردودي وتقرين من جديد.. أنا ماسبيت بنات ديرتي وقلت : إذا سبيت فأنا أسب أمي وأختي ,وووووو.. وبالعكس الحمدلله كل اخواني ربي موفقهم مع حريمهم وهن بنات الديرة.. أنا ما سبيت .. بس انصدمت من طليقتي على تصرفاتها .. هداها الله .. ومن جد أتمنى لو تقرئين ردودي الماضية وتفهمين منطقي زين لأن اللي ذكرتيه من حقد وغيره هذا غير صحيح.. بالعكس لو تدرين وش سويت لها بعد ما طلقتها وقبل ما أطلقها ( بيني وبين الله ولا ودي أذكره للناس ) كان ما قلتي هالكلام.. إنما أنا ذكرت نموذج بسيط عن سالفة الأندومي وما خفي كان أعظم.. ولو كنت ناوي أفضحها كان ذكرت اسمها واصلها وفصلها علشان ما أحد يفكر يآآآآآخذ منهم.. لكن المسلم من سلم المسلمون من لسانه ويده.. ولقد ذكرت في ردي سابقا بأن هذا هو النصيب .. لكن الظاهر انك نطيت هالسطر أختي .. أتمنى لو قبل أن نرد على بعض المواضيع نفكر صح ولا نستعجل بالردود..ولا نخطئ بالفهم .. ولا نخطئ على بعض.. أسلم للجميع.. مع خالص تقديري : ساري الليل.. |
..
مجددا الله يوفقك ويسعدك .. لكن اذا ماتلاحظ مجرد عبارتك ( لاذمة ولاضمير ولادين ) هذي العبارة شاملة لكل ماهو سئ وقبيح ... يعني صراحة خليتها بلا ..............! ثم انك بداية تقول ماراح اتكلم ثم تقول تذكر سالفة الاندومي ! والان تتفضل بقول وش سويت قبل وبعد الطلاق ..!!! كل هالكلام ماله اي داعي .. صحيح محد يعرفك لو قلنا ان اقربائك مايعرفون معرفك .. لكن يكفي زوجتك الحاليه .. ارى من الاكرم للرجل والمراءة عدم التحدث عن الطليق نهايئا حتى مع زوجتك الحالية .. عشان تكبر بعين زوجتك .. اذكر واحد له بنت مطلقة . واذا خطبها احد يقول اعرف رجولته لما اسأله .. ليش طلقت زوجتك ؟ اذا جاوب (مااراد الله لنا شي والله يوفقها بنت الحلال ) فهو رجل فعلا ويبدأ بالسوال عنه . واما اذا قال ( حسرتبي .. كلش سويته ولافاد به .. او طماعة او ماتعرف للرجل ..) بمعنى اي كلمة تبين فيها نقص !! فهو ناقص ويكرشه طوالي .. وجهة نظري فقط ................ تحياتي وبالتوفيق .. |
اي والله انكسرت الأماني
|
اقتباس:
|
اقتباس:
شكر وبارك الله فيك لك مني اجمل تحية |
رموش
لو ربع اللي جاني .. جاك كان ما قلتي اللي قلتيه.. والرجل لو قال كمة الحق في شيء ولو على نفسه ما ينقص هذ |
رموش
لو ربع اللي جاني ، جاك كان ما قلتي اللي قلتيه والرجل لو قال كمة الحق في شيء ولو على نفسه ما ينقص هذا من قدره وكلماتي اللي قلتها ما قلتها إلا عن قناعة ثلاث سنين لأن اللي إيده في النار مهب مثل اللي إيده في الماء ولأن اللي شفته أنتي ما شفتيه علشان كذا قلت إن صدمتي كانت فيها كبيرة وأنا ما أحب أعيد وأزيد في كلامي لأن اللي قلته في ردودي السابقة فيها من التوضيح ما يكفي والزوجة اللي تبي تحافظ على زوجها تحافظ على دينها الأول ولا ينلام الرجل إذا طلق ، أو تزوج على زوجته خاصة لصارت هي مصدر القلق والمشاكل وبعدين ليش مكبرة السالفة أختي!!!!!!! بعض النساء لو زوجها يطالبها بأشياء محرمة شرعا ويبهدلها الليل والنهار والله ما ظنيت تصبر سنين معه وهي صابرة ولا تشكي إلا من ندر الحين لصار زوجها حاطها بعيونه سبته وتكلمت عليه بالشين والشواهد كثيرة ( كفارات العشير) أجل وشلون لو كان مبهدلها بعيشتها وما ظنيت إن معشر النساء تخفى عليهن هالسوالف وأعتقد إلى هنا ويكفي لأني ذقت اللي ما ذقتيه من الهم والغم والنكد 24ساعة لمدة سنين متواصلة والله يعطيك على قد نيتك أختي ساري الليل |
يابو فهد .. أنت تقول اللي بيعرس ياخذ بريداوية .. بس أبو محمد النجدي يقول اللي يعرس ياخذ جنوبية .. اللي بيعرس منين ياخذ يعني ؟! <=== بريء . والله يابعدي كلن به حقه ، و فيه ناس طلعوا من ديارهم سواء بريدة ولا غيره من مدن المملكة ، و جابوا العيد .. شكراً ليك . |
االغريب أن كاتب الموضوع شكله انخرش من الردود ولن يدخل _
والأغرب من ذلك أن بعض أصحاب الردود الظاهر عليهم بأنهم بلا تجربة.. والمستغرب أن البعض يرد على البعض الآخر بردود ليس لها أي داعي_ وما أقبح أن ترد الفتاة على الرجل بردود غير لائقة كأنها تحاول أن تبين للقاريء نقصه!!!! يمكن لغيرتها على بنت الديرة.. ويمكن لأمر شخصي بينها وبينه .. لكن لماذا ندع الجميع يتفرج على مهزلة الردود التي لا داعي لها.. والمرأة أنثى سواء كانت عربية أم لم تكن وأهم شيء دينها وأخلاقها _ والمرأة كالريحانة لم تخلق للمشاكل ووجع رااااس ومناطحة الرجال .. إنما من المفترض أن تحافظ على رقتها.. وأن لا تفقد أنوثتها_ ولكم جزيل الشكر.. |
اقتباس:
ما الظاهر ... أعتقد أنه أبو فهد يعني لو هو واحد ثاني أقول يمكن بس المنخرش لا لا أبداً ... ولكن يمكن الرجل مشغول ... أنتظروا ... وسترون كلامي ... |
أبو فهد ، بالله عليك أنت وش تبي بالضبط .؟
هي وحدة من ثنين .. يا أنت ما تعرف تكتب .. أو أنك ما تعرف تكتب . مش قادر أفهم المطلوب من الموضوع .! :) |
| الساعة الآن +4: 10:27 AM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.