|
قراءة الروايات ,, حينما تتجاوز المعقول !!
السلام عليكم ورحمة الله وبركاته صباح _ مساء الخير للجميع مشكلتي الجديدة في الحياة تكمن عند ذهابي للنوم , فلست كغيري ممّن يذهب لعالم النائمين مباشرة عبر ضغطة زر ( تف عليكم ماشاء الله عليكم ) أعاني معاناة لاتوصف عند كلّ مرّة أذهب فيها للنوم ( يالله إن الشكوى لك ) يعني أجلس ساعتين أتقلّب على السرير هذي مايبيلها كلام , والقهر إن أخوي يدخل علي بعد ساعه ويسمع له محاضرة بجوّاله وينام قبل مايبدأ الشيخ بموضوعه ولا تسمع إلا شخيره ويزيد الطين بلّة , ( برضه تف عليك , ماشاء الله عليك ) مرّة من المرّات استشرت ولد العم الراحل : أبو سعود ,, عن هالمشكلة فقال : قلّ النوم وكثر الحبوب اللي بوجهك أساسهن وسادتك اللي ماعمرك غسلته طلّعت فراشي بالحوش , وشبكت الدينمو ولايهون صابون التايد ,, ولاجديد في الحكاية ! قرّرت أستشير العمّة منيرة فقالت : ماودّي أتفلفس عليك , لكن لاتروح للسرير إلا إذا جاك النوم ( ماعقب أتفلفس شئ ) يوم ضاقت بي الحيلة قلت مالك إلا أبو خالد لبى قلبه , فقالي : ياجنيني أنت , مالك إلا تقرأ لك جريدة قبل ماتنام , وراح تنام دايركت والجريدة على وجهك , واسأل مجرّب بصراحة جازت لي الفكرة وجرّبته , وما أخفيكم إنه وحده بوحده , لكن مشكلته إذا قمت أسكّر نور الغرفة يطير النوم عاد فكّرت إني ألزم القراءة قبل النوم وبنفس الوقت تكون الغرفة مظلمة على الآخر , فقلت مالك إلا تقرأ من هالروايات , وحالك حال الناس ياعمّو كريّم ( الله يمسّيك بالخير ياعزّام ) ومن حسن حظّي إن أول رواية قريته ,, بشروه إنّي أبرحل ,, ( أنواع وأشكال الصياح والبكبكة وسيلان الدموع ) ومع مرور الوقت أدمنت قراءة الروايات لدرجة إني أنتظر متى يجي وقت النوم عشان أكمّل الرواية اللي موب راضيه تنتهي !! وأغلب الروايات عاطفيّة , لأن مجتمعنا مايدهن سيره إلا إشعال قضيّة الحب وعلى قولة محمد عبدالجواد , مافيه شكك ,, إن الإنسان عبارة عن كتلة إحساس ( الشرهه على قناة الجزيرة ) والقهر إن كلّ الروايات متشابهات إلى حدّ كبير ,, كلّها خيانة ,, وإن ماصارت فيها خيانة ومشت الأمور تمام قبل الزواج كالعاده , تموت ليلى بمرض خبيث ,, أو يموت قيس بحادث مروري مروّع وحنّا هالمساكين ندخل جو ونحزّن ويسيّر علينا هالقولون على الفاضي , واللي فينا مكفّينا وموفّينا !! مع كثرة قراءتي للروايات ,, بدأت دموعي تنزل بإستمرار بسبب قرب العين من الجوّال والتركيز الشديد بوقت طويل ! فلاحظ هالشئ حبيب ألبي أبو ريان,, فقال : عندي لك علاج وحده بوحده ,, فقلت : يقولون إن الدموع تغسل العين يالله من فضلك ( ماله داعي ناكل حبوب حمل ,, ولاننام ولانحمل ) أختم موضوعي بقصّة حصلت لي ,, بطّلت من بعده قراءة الروايات أذكر مرّة من المرّات طلعت ألعب كورة مع شلّتي الموقّرة ,, فيوم خلّصت من اللعب ركبت السيارة راجع للبيت ,, شفت جوّالي لعلّه مليان مكالمات من أفراد العائلة صغيرهم وكبيرهم ,, ذكرهم وأنثاهم بصراحه يوم شفت هالمكالمات خفق قلبي على أهلي ,, ودّي أكلّم عليهم لكن للأسف مقطوع ,, حاولت أرسل لهم كولمي ,, لكن للأسف مخلّصهن على الشلّة دخلت البيت ,, إستقبلن أبو خالد بوجهن عبوس ,, وزعل علي ليش ماردّيت على المكالمات فأقنعته بالسبب ,, فقال : والرسائل ؟! مافيه شئ يمنعك من قراءة الرسائل ؟ ولكن تبريري إني ما أقدر اقرأ هالرسائل ,, لأني واقف على رواية مجنونة !! وختاما : لن أقف ضدّ من يقرأ الروايات ,, ولكن الشئ إذا زاد عن حدّه ينقلب لضدّه أعتذر عن الإطالة ,, وكلّي أمل أن تقبلوا عذري همسة : القصّة من نسج الخيال ,, ولا تمت لواقعي بأيّة صلة أرق التحايا والتقدير مجنون بريدة |
,,, |
اقتباس:
يا كثر ماصارت مع أختي ،، بالروايه الوحدة يجنه حوالي 10 رسايل ماتفتحهن .. وأغلبهن من الاتصالاات شيكرن لك |
هههههههه
صدق لازم حل أنا كنت أول عايشه على الروايات وأقوم وأنام عليهن بس الحين الحمدلله قدرت أسيطر على نفسي بديت أذا فرغت قريت ومازلت أمر بحالات نفسية مع الرواية هع هع |
الصراحه قريت مره روايه..............وياليتي ماقريته
بس أخذت وضيعت وقتي..وليت له فايده ماله أي فايده بدال قراية الروايات نقرأ كتب نأفعه |
ياقدمة الروايات
الحمدالله تركتها |
أول رواية قرأتها كانت باللغة الإنجليزية كدرس في القراءة في معهد لغة (فرض ..!) ..
لم أستمتع بها لأني كنت أعلم بأن أحداثها ضرب من الخيال .. شكراً لك |
؛ اقتباس:
اسلوبكـ ممتع .. الله يرحم حالنا قصدي بعضنا .. عادي تصير الرواية 200 صفحة نقرآهآ أحيآنآ بيوم ..مآودنآ نفوت الأخبار واذا قرينا قرآن عسآنآ نكمل حزب .. شيكرن ؛ |
شكرا يا أخي لكن
بالنسبة للقصة اللي من نسج الخيال فتقدر تحفظ الرسالة في الملاحظات مع أنه بطيء بالنزول شوي و بالنسبة للرواية المذكورة : بشروه أني أبرحل الصراحة رواية تجيب الهم و النكد و نهاية تجيب القولون المعوي |
ومن حسن حظّي إن أول رواية قريته ,, بشروه إنّي أبرحل ,, ( أنواع وأشكال الصياح والبكبكة وسيلان الدموع )
ياااالروعه سطورك كانت اول روايه قريتهااا بس الحمدلله الله رفع عن هذااا الداء بصراااحه وجع قلب وهم مايتلم...... لكم دعواتي بحياة هادئه يارب ألهمني................كي ترضى |
يا قدم الروايات أذكر أختي كانت مدمنة عليها عاد شف أنواع الصياح والنكد ههههه
مشكور أخوي على موضوعك الأكثر من رائع |
أنت مبدع في السرد وفي الخيال .
أسلوبك رائع وسلس وجميل وأنت مشروع كتابي قادم لو أوليت ماتبدعه هنا مزيدا من الإهتمام والتنسيق . من أمس وأنا أنعث في ملفك الشخصي وأقرأ موضوعاتك :) تمنيت فقط لو غيرت معرفك من " مجنون بريدة " إلى " مبدع بريدة " :) تقبل مني تحية تليق بإبداع قلمك يارجل :) |
انا بالماضي كنت مثلك يوم كنت ببداية عمر 15 سنه دايم اخوي بجنبي بالسرير ينام على طول وانا مانام المشكله مابراسي تفكير ولا هم توي صغير خصوصا لاسافرنا ماعرف انا بفراش مهب فراشي ولا اعرف انام الا بصوت المكيف واخوي الثاني بدأ ينام معي مايحب صوت المكيف ولا هواه اقوله انت طالعن على عمتي مزينه ماتحب المكيف
لكن الحمد لله يجين اليوم الحين اول ماحط راسي خصوصا ان راسي عنيد مانام الا بمشقه طحت بالشيشه اخر الليل اشيش وانحر الفارش ماتتم دقيقه الا وانا نيم وياحلو النومه بس لاحد يشيش تراه متعبه جدا وتوجع الصدر هههه حبيت اعلق على سالفة النوم ولا داري ان الموضوع له مغزى آخر خخ |
اقتباس:
حياك الله أختي الكساندرا الله يديم عليك الضحكة والوناسه والطهبله :d من يبكي عند قراءة الروايات فهو إمّا أنه يعيش عيشهم من الحب العفيف فيتألم بألم ماحوته السطور أو أنه يدخل الجو سريعا ويصدّق هذه الخزعبلات ,, مثله مثل من يبكي عند مشاهدة المسلسلات ,, وقليل ماهم ! لا أخفيك بأنّي قرأت رواية ( بشروه إني أبرحل ) قبل سنوات ,, ولم أواصل السير ليقيني بأنّها أحرف متكرّرة ! ولكن ماجاء في محتوى الموضوع من قصّة خيالية ماهي إلا دخول لصلب الفكرة شكرا لك |
اقتباس:
حياك الله أخي العزيز برنس قل لأختك تقرأ من الملاحظات عشان تقدر تقرأ الرسائل متى ما أرادت ولن يضيرها شئ ,, ولكن لتجعل القراءة في أوقات الفراغ ومامثل القراءة قبل النوم شكرا لك |
اقتباس:
حياك الله أختي ( إسمك توصيف ) :d لنقلّل من القراءة على قدر المستطاع ,, ولنقرأ كلام الله عن طريق الجوّال حتى لانبرّر إهمالنا ,, ولكي نبدّل حالاتنا النفسية إلى طمأنينه وسكينة ! شكرا لك |
اقتباس:
حياك الله أختي غالية الثمن ليس منها فائدة إلا قضاء وقت الفراغ لا أقل ولا أكثر ,, ويغلب مضارها على فوائدها ,, ومع ذلك نقرأها في اليوم ساعات طوال ! كلام سليم وكلام دهب شكرا لك |
لكل شخص طريقة بالنوم فأخي مستحيل ينام إلا وهو مشغل المسجل .
أنا كنت مثلك وبس أنا شريت من أخوي جوال الدمعة وكان خربان بس يشتغل وبديت أحط القصص بوووه . |
اقتباس:
الله يبشّرك الخير :41 شكرا لك |
اقتباس:
حياك الله أخي العزيز بندر لايهم الإستمتاع بوجود الفائدة ,, والعكس خاطئ ! شكرا لك |
اقتباس:
حياك الله أختي بريداويه أعيدي قراءة الموضوع حتى يتسنّى لك الإجابة على تساؤلك :d بضعف الهمم ,, لاتستغرب الأشياء للأسف ! شكرا لك |
الف شكر لك على الموضوع |
سخافه هالروايات
|
انا كنت اقرى روايات لكن الأن حسيت انهن يغيرن مزاجي احيانن ..
فصرت اقراهن بين وقت واخر اذا فضيت وما اقرى الا روايات احس انه مستواها حلو موب حب وخرابيط .. << بصراحه احسهن سخيفات بعض الكاتبات انهن ما يكتبن الا عن الحب اما فيه روايات بالعكس انا من ناحيتي << استفدت كثير بعض الكاتبات تكتب عن مشاكل المجتمع وقد تجد حب لكن لا يكون كل الروايه حب أعوذ بالله .. جزاكـ الله خير ... |
اقتباس:
حياك الله أخي العزيز سحابة بالفعل أخي لم يخفى عليّ وضعها بالملاحظات ,, ولكن جاءت القصّة هكذا لنبيّن بعضا من أضرارها :d وأغلب الروايات مضيعة للوقت ومنهكة للجسد والذهن وبلاوي متلتله اللهم ياكافي :d شكرا لك |
اقتباس:
حياك الله أختي الله يبشّرك بالخير ويديم عليك النعمه ولك بمثل مادعوتي وأكثر شكرا لك |
اقتباس:
حياك الله أخي العزيز فديت القصيم الله يشغل أختك بطاعته والبكاء لأجل الله ! شكرا لك |
اقتباس:
حياك الله أخي العزيز كرمع الروعه تتجلّى في مرورك وبإذن الله سنستفيد من أمثالك ! يتشرّف ملفّي الشخصي بك أخي العزيز من جنّ بالحب فهو عاقل ,, ومن جنّ بغيره فهو مجنون :d أشكر لك إطرائك الكريم |
هههههههههههههههههههههههههههه :090: أوووه يامجنون وينك ياشيخ؟
من مبطي ما قريت لواحد وجلست أضحك كذا :d. ليتي دارين عنك، عاد الحين بديت أدور بملفك الشخصي << يقلد كرمع :113:. أدوخ على كلماتك وهمساتك، راق لي بوحك :d. لا تبطي علينا من هالزين :f:. |
اقتباس:
حياك الله أخي العزيز خواش ينبغي أن تعي خطورة المجاهرة بالمعصية أسأل الرب أن يعافيك مما ابتلاك فيه ,, وأن يثبّت الجميع على صراطه المستقيم شكرا لك |
اقتباس:
شكرا لك أخي العزيز وبكم شريت جوال الدمعه ؟ :d |
اقتباس:
حياك الله أخي العزيز أبو رزان والعفو ,, وشكرا لمرورك |
اقتباس:
بالحيل ,, بالحيل :d شكرا لك |
القصة من الخيال.. إذن فأنا محقة عندما استغربت من وجود رجل يملك إحساسا عاليا إلى درجة البكاء والتأثر!! استغربت وفرحت أن هناك (قصيمي) مثل هذا.. فواها لخيبتي.. يظل النجدي نجديا.. وما أظن الفتيات أدمنَّ على ذلك إلا سدا للنقص الحاصل في واقعهن.. فليتك لاتسخر منهن.. شكرا لك.. أسلوب رائع.. على فكرة.. أنا لاأبكي عند قراءتها إلا بنسبة 2من 1000000 |
وعليكم السلام ورحمة الله وبركاته
كنت قبل فترة أود الحديث عن الروايات ولكن ماشاء الله وجدت في هذه القصه كُل ماأود قوله وباأسلوب ذكي بارك الله فيكم وزادكم الله للفائدة الروايات لاتجوز لقول أحد المشائخ الثقات .. |
اقتباس:
حياك الله أخي العزيز الصباخ موجود ياقلبي ,, بس جالسن أتابع بصمت وأقرأ المواضيع والردود اللي تجيب الغلقة :d الله يديم عليك الضحكة ,, وشرّفت الملف بتوعي ولايهمك وابشر باللي أقدر عليه شكرا لك |
اقتباس:
حياك الله أختي إنبثاق لعلّك ربطتي الحابل بالنابل مهما كان الإنسان بجنسيه يحمل إحساسا عاليا ,, فإنه لن يبكي على الخزعبلات ! ولافرق بين النجدي وغيره ,, فالبشر بكامل أطيافهم يحملون بين حشاياهم قلبا ينبض بالحب والحنان أما عن تطرّقك على سبب إدمان الفتيات لقراءة الروايات ,, فهذه تحتاج لموضوع كامل وليس من خلال التعقيب عليك ولعلّي أسردها في موضوع قادم إن تيسّر لي ذلك وسخريّتي بهنّ بنسبة 2 من 1000000 فقط لاغير شكرا لمرورك |
اقتباس:
حياك الله أختي تباشير المطر لعلّي قصرت العنوة عنك ! :d أمّا بالنسبه لحكمها الشرعي ,, فلست أهلا للحديث عنها ! شكرا لك |
| الساعة الآن +4: 11:06 AM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.