بهدوء وعقلانيه: هذا الطبع هل هو خاص ببريده أم في جميع لمناطق {رأيك يهمني}
 

.

بسم الله الرحمن الرحيم

السلام عليكم ورحمة الله وبركاته

مساكم الله بالخير ياغالين

حبيت أفتتح موضوع وهو { الجحد }

فكما تعلمون ياأحباب أن الكثير من اخواننا وأخواتنا تزوجو ولله الحمد
فيه من المواقف اللتي ترفع الظغط حين يتزوج قريبك وبعد كم يوم تجد أخوه وتسأله عن أخوه العريس وأخباره ووين راح يقولك بمكه وجده فتودعه وأنت تدعي للعريس بالتوفيق وبعد فتره تتفاجأ بأن أخوه لم يسافر لمكه وجده بل ذهب لماليزيا وللعلم فالعريس صديق الطفوله ولكن الأشغال أبعدتنا وبعد المسافه بيننا

هذه حادثه حصلت لي حيث أنه ابن خالتي ولا أعلم لماذا قال لي كذا هل بأمر العريس لايريد أن يدري الناس بأنه سافر لبلد خارج المملكه أم هذا الكلام موجه للأقارب

وحيث أنه حصل لي موقف أخر حيث أن قريبي تزوج وحنا نمون على بعض وقلت وين شهرالعسل يابو الشباب
قالي أبروح لماليزيا بس لا أحد يدري

والله مستغرب لماذا هذا الجحود هل وصل بنا لهذا الحد أم خوفا من العين أم خوفا من بريده بسرعة انتشار الخبر بين أهاليها

هل هذا الجحد موجود في بريده فقط أم في جميع مدن المملكه

أم هي خاصه بالأقارب

بانتظار آرائكم

الجحاده في اهل بريده وبس

من وجهة نظري..إن بريده والرياض وغيرهآ فيهم جحـآده..
مآآآ عدا أهل الحجآز بجد يمكن أحسن شئ فيهم مآ عندهم جحايد..كل شيء يقال وتمر سواليف..

يا خي من عذرهم
خايفين من العين
وبعض اهل بريدة مشهورين بالنحت

لاالحجد مو بس ببريده الحجد بكل دول العالم بمصر وسوريا ..تقريبا كل الدول العربيه فيها وغير العربيه

بس مسمى الحجد مدري وشلون جايبينه !!

انا اللي عندي اللي يخاف من العين متخلف عقلياً يعني مهو بجاي شي الا ان الله كاتبه لي



اما قريبك اللي سافر لماليزيا بكيفه اجعله ان شاء الله يروح لندن بس انا ما اواطن اللي يقول لاتعلمين احد يعلمن ويقول لاتعلمين احد

بكل بساطه لان سكان بريده نحوتين

قال عليه الصلاة والسلام :إقضوا حوائجكم با لكتمان.
ربما قد يكون خوفآ من العين يا رعاك الله

شر البلية ما يضحك , هههههه
الجحادة هذا طبع فيهم مايتغير مولود معهم
وحدة بالمدينة جيرانهم قصمان تقول مادرينا إن بنتهم انخطبت وتملكت إلا يوم بقي يوم على الزواج أرسلوا لهم
بطاقة.
مشكووور

اسمة الجحد مهب الحجد:d
هذي لك(f)

ياحبيبي شئ عادي الجحاده تعودنا ... خذ الموقف الصارووخي ... بنت خالتي خطبت وكلن دري ونسألهم متى يوم العرس يقولون تونا بعيد وأذكر اهلي لابسين عبيهم ابوديهم لبيت جدتي يوووم جو بيطلعون همر يرن التلفون ... ونسمع امي طلعت الله يوفقه مع السلامه .... هايدا خالتي تخبر امي ان بنته توه طالعه من بيتهم مع الزوج المصون .. وبعديييييييييييين حطوا عزيمه شبيهه بالعرس ,,,,,, عموما الله يوفقهم ويسعدهم ويديم عليهم المحبه والموده ’’’

العين مذكورة في القران
ومنتشرة واكثر شي في بريدة
نلاحظ اكثر اللي يبحثون عن راقي شرعي في بريدة
الناس شاقية في بعض--
هذا راح وهذا جاء وهذا اشترى
بيت وهذا عنده فلوس --
ماعمرنا سمعنا يقال عن هذا فقير او مريض او ماعنده بيت --
الله المستعان--

دامك طلبت رأيي بصراحة.......
بصراحة موجودة ببريدة
السبب ؟؟؟؟؟ الله أعلم

..

يؤ لو اني منكم كآن سويت وقلت ان << تعزز :d

لا جد جحآيد القصيم كبر الجحه يعني تعرف انه كذبه :d

اجل وحده حامل قالوا له مبروك انتي حامل

قالت لا بس هذا من التوت :d

مادرينا الا وهي وآلده الحمدلله على سسلامته ههههههههههه

انا لو قالوا شي تبين تنفينه من الدنيا قلت الجحاده والواسطه ..:d

تدرون وراه الجحادة ببريده؟؟؟؟ لانهم هم شروفين يسالون عن اشياء مالهم دخل به اما المدن الثانيه موهب نشده مثلنا علشان تسذا من كثر الاسئلة صرنا جدحودين ////////////////// اعرف واحد يقول ماصرت جحدود لين عشت ببريده

استغفر الله مادري وش عليه يجحدون
وش شايفين انفسهم عليه
الجحاده الصراحه اشوفه بكثره ببريده
الجيران وهم الجيران والله ماعرفنا عن زواج بنتهم الا يوم قالو بتتزوج الاسبوع الجاي
والمشكله اننا مو قاطعين فيهم وولدهم كل يوم ببيتنا
يعني مدري ليش كذاا سخاافه
ماحب الطبع هاذاا ولا والبنات بعد بالمدرسه
يخافون يقولون درجاتهم كل شي جحد بجحد

الجحاده بكل مكان

(من حسن اسلام المرء تركه مالايعنيه)

أخي (أهواك يابريدة) كلامك مهم جداً وهذا الأسلوب من وجهة نظري ولكوني معلم متغرب عن بريدة لسنوات عدة أقول هذا الأسلوب يكثر عند البريداويين يجلس معك يأخذ أخبارك كلها الخاص والعام ولو سألته عن شيء يخصه طلعك بعيد عن السالفة وخصوصا في مسائل الزواج خطبت وملكت الحمدلله علم أصحابك وأحبابك ، لي زميل دراسة ومهنة أيضا أراد الزواج فلم يخبرني إلا قبل أيام من الحفل وعندما أراد إخباري بزواجه وضع مقدمات لا تعلم لا تقول لأحد حتى ظننت أنه سيقوم بعمل إجرامي وهذا يعود أحيانا لضعف التوكل على الله وصرف المقادير كلها للعين .

هذا أساس في تخلفهم ورجعيتهم فلا تتعجب يارعاك الله

الجحاده بكل مكان بس ببريده زياده واذابتجحداجحدعلى شي يستاهل

احول والله مدري فظاوة مواضيع

بكل مكان موجوده

ههه صدقت
كل واحد بلش بحال الثاني همهم مراقب الناس نسأل الله العافية

الانسان يخاف من العين
لذا الفهوم هو سلاحة
لكن اهم شي
قراءة الورد في الصباح والمساء

انا اعتقد مجتمعنا راعي هرج , يعني لو تودي زوجتك لأهلها كم يوم وتسافر مع اخوياك جوك الحريم يبدن يحرثن الموضوع وش بينهم شكلهم متزاعلين ومن الهرج , والا مثل لو ضار بيطلع للخارج يجونك هالعالم يبي يرووحون برا لم المصاليخ ومدري وش بعد وتشتغل النصايح كل شوي داقن واحد لاتروح ولا تخلي زودتك تشوف هالمنكرات تخرب عليك , ويالله خذ من هالهرج الهمجي اللي يحوم تسبدك وانت الى الحين ماشفت مرتك ..

.



.

عندنا ناس هنا ماشافت خير .. !!

تلقى الواحد يروح لكل محل ويجحد . ولو أحد يجحد عنه شي قال وراااهم يجحدون ماحنا با أهلهم !

عاااااااااااااد البنات ابخص بهاااااا الأمور

هههههه> >> امي تذبحن اذا قلت لحد انه راحت لسوق

ولا شئ
ههههه

شكلك خبره بها الأمور

ههههه

صح لسانك هذي عندنا ياكثره هم يجحدون عاادي بس ياويلك ماتعلمهم يشتغل المنافخ والتلفونات يكافي وراه ماعلمتونا وانواع التشره استغفر الله

جزاكـ الله خيـــر ..

في كل دول العالم لكن .. في بريده بزياده .,.,.,.

هذولا متربين تربية حريم لاهم ولا ابائهم

ولا وشو اللي يخلي مثل هالامور تنجحد

إذاً نقول إن التربيه تربية خرابيط وعقد نفسيه وبلاوي

يمكن يخافون من العين لان العين حق تخيلو مرة زارتني جارتي وهي من أهل بريدة وكنت لابسه جلابيه واعجبتها قالت يا زين ها الجلابيه عليك وكنا شابين ضو بالبرد وكان بيننا الوجار وفجأة ينقز ذاك الجذع من النار وهو يطب بوسط حجري وتعلق الجلابيه والحمدلله أنها جت بالجلابيه