|
مستوصف الصفراء
السلام عليكم ورحمة الله وبركاته كيف حالكم اول شي الحمدلله على نعمه ماظهر منها ومابطن ثاني شي اشكر حكومتنا الرشيده على الجهود المبذوله في جميع المجالات واخص منها الصحيه لانها هي موضوعي اليوم,, لذلك بدخل بالموضوع مباشره انا وحده من مراجعات مستوصف الصفراء وهو مستوصف حكومي والغالب يعرف ان المستوصفات الحكوميه الحين مبانيها جديده وعلى مستوى عاااااالي من التجهيزات الطبيه والتقنيه وماظن هالشيء يختلف عليه اثنين المشكله موجوده في العالمين في هذه المستوصفات مابي اسب احد بشخصه لكن والله العظيم في هذا اليوم الفضيل ان المستوصف بجميع عاملاته في القسم النسائي ناس سيئه من جميع الجهات يعني انا مراجعه اول مادخل اروح للاستقبال اخذ الملف الاقي الموظفه تهاوش وتتلفظ واحيان تتهمني بالغباء وقلة المعرفه وللمعلوميه هن موظفتين وحده ارقى شوي لكن كلهن ادنى من المستوى الطبيعي للتعامل وكاني داخله على وزير الصحه مادخلت اخذ ملفي وطبعا لازم ادخل عليها بغرفة الملفات وهي غرفه صغيره واذا كان معي اطفال وطبعا تعبانين واكيد يصيحون قالت اطلعي وكلمتني من غير نفس وتقولي ازعاااااج طيب المفروض انها تاقف على الكونتر وانا برا تعطيني ملفي موب ادخل عليها واشحذها والله العظيم كني اطرها فلوس بعدها ادخل على الضماد الاخت اللي ماعمرها تكرمت وقامت من كرسيها يعني لو معي طفل قال وقفيه اوزنيه قربيه جلسيه!!!!!!!!!!!!! وظيفتي هذي والا وظفيتها مع العلم انها اغلب المرات ماتاخذ وزن ولا طول الحراره وهي مستعجله والظغط للكبار وطبعا دايم وحده من الموظفات جالسه عندها يسولفن وقهوه وفطوروحنا ننتظر لين يخلصن بعدها ندخل على الطبيبه فيه 2 حسبي الله عليهن وحده معها ولدها صغير مادخل عليها الا ترضعه او تاكله وتقولي روحي للطبيبه الثانيه انا مشغوله!!!!!!!!!!!!!! باي نظام مسموح للموظفه انها تجيب اطفالها وتعطل المسلمين؟؟ واذا تكرمت وسمحت اني ادخل تهوش وتطول لسانها؟؟؟؟ والثانيه تعاملها حلو لكن تمسك لها وحده من المراجعات او موظفات الاستقبال وتجلس بالساعات تسولف معها وحنا ندخل والمراجعه فيها يعني اشرح حالتي عند الناس؟؟ والله اني مره كنت حامل وجالسه انتظرها نصف ساعه تسولف مع موظفة الاستقبال وضحك وتنكيت ولا تدخل عندها ومعها فصفص ومكسرات!!!!!!! تكلمني وهي تقشر والا طبيبة الاسنان حدث ولا حرج من اول مايدخل الواحد لين يطلع وهي تهاوش وتسب وانتم مهملين وانتم اشغلتونا وانا كن مالي شغل الا اسنانكم!!! طبيبة اسنان احد قالك تعالي نظفي بيتانا؟ للامانه فيه الممرضات حقات التطعيم هنديات اظن احيان وحده واحيان 2 لكن تعاملهن راااقي جدا ومحترمات ومتفاهمات لكن الدوامه اللي بدخل فيها قبل ادخل عليهن تكرهني فيهن وطبعا الدوام يبداء متى مايبن ويخلص متى مايبن وفترات راحه على كيفهن؟؟ واللي اعرفه ان الدوام الرسمي من 8-5 وساعة استرحه لصلاة الظهر والله العظيم شي رفع الظغط والواحد مايتحمله يعني حنا داخلين مستوصف مايجيه الا احد مريض او احد محتاج علاج او تطعيم او اي شي يجلس ينتظر ويتحمل علشان اشياء تافهه خااافو الله ترا الفلوس هذي محاسبين عليها حرام الوحده تقوم باقل من ربع شغلها وتاخذ راتبها كامل انا عن نفسي والله ثم والله ماحلل اي موظف قصر اتجاهي سواء بالمستوصف هذا او غيره وبرضو انا ماتكلمت الا من قلة الحيله لاننا اذا كلمنهن نافخن وهاوشن وقالن حنا مظغوطات حنا شغلنا صعب!!!مدري مين اللي شغلها سهل لكن اتوقع اي واحد قدم على وظيفه مستعد انه يتحمل اللي جايه والاشخاص اللي يبي يقابلهم في مجال عمله مسؤول عنهم امام الله والا علشان الحكومه ماقصرت معكم وراتبكم تاخذونه كامل تسوون فينا كذا. طبعا انا ماكتبت الموضوع الا من الغبنه اللي فيني والقهر وانا حرمه ماقدر ادخل على المدير واتفاهم معه هذا اذ كان يبي يسمع لي لاني اوتوقع انه لو كان له هيبه كان ماصارالوضع سايب كذا برضوا الناس دايم تتشتكي منهم ومن تعاملهم السيء بالاخير اعتذر عن الاطاله وماكتبت الموضوع بغرض السب او التشهير لكن الوضع زاد عن حده وماينسكت عليه وصلى الله وسلم على نبينا محمد وعلى آله وصحبه وسلم |
كلامك والله عين العقل وكثير من النساء يشتكن من المستوصفات
طيب ليش مادخلتي على المدير انتي اللي معك الحق ليش تسكتين او زوجك اذكر مره اخوي هاوش المدير وهزاءه لأنه ضاع ملف ولده عندهم الله يكون بعونك:f: |
انا امادري ادارة الصحة ليش مايسوون جولات سرية حتى يشوفون موظفينهم وشلون يشتغلون (من امن العقوبة اساء الادب) |
الله يستر عليان هاذا حال المراكز والمستشفيات الشكوا لغير الله مزله |
والا طبيبة الاسنان حدث ولا حرج من اول مايدخل الواحد لين يطلع وهي تهاوش وتسب
وانتم مهملين وانتم اشغلتونا وانا كن مالي شغل الا اسنانكم!!! ههههههههـ ،،ــ،، |
أنا معك في قضية طبيبة الاسنان ,,,
لكن نصيحة مجرب "من أول المشور اطلبي تحويل لمستوصف شرق بريدة بوه سوداني فلته" |
(من امن العقوبة اساء الادب)
عندنا وعندكم خير حته مستوصف الفايزيه النفس الشينه من قبل الممرضات الي ياخذون الحراره وادكتوره عندها ولده وانــــــــــــــــــــــــواع الازعـــــــــــــــاج حسبي الله ونعم الوكيل |
الله يستر على المسلمين ؟؟؟
|
اقتباس:
اثره مو بس مستوصف الحي حقنا الممرضات والدكاتره يغثون:42 وتحلفين حنا جايين نشحذ منههم:oo واللي يقهر عيالنا وبناتنا مالقوا وظايف وهالاجانب بس يكدووون علينا:( وبس يهوشون :i121 |
تهايط
تحمد ربه ياللي لقت وظيفة والشباب بدون وظايف وبعدين خطا الوظايف هنا المفروض بلدي ولا عآمل بقالة ولا سوآق |
والله انك صادقه موظفه الملفات تعامله مره شين مره دخلت اباخذ ملف ودق جوالي فيه نشيد عن الام قالت لي اطلعي برا بعد نغمات اوكلمه تعني ذلك اغاني ماله حق ترفع صوته كل واحد مسؤل عن نفسه ومادخلت بيته علشان تطرد الموظفه القديمه الي فيه المفروض يوظفون شباب بدال ها الحريم
|
كلامك صحيح 100%
|
بعض العالم الكذب يجري بدمه الحين الطبيبات وحده عمره فوق الخمسين و الثانيه ما معه لاطفل و لا شئ طبعاً هذا كلام الوالده و هي دايم تراجع المستوصف بس بعض الحريم تبي خدمه خمس نجوم و هي تلج و تصج حتى البنقالي بالبقاله يكد اذا نفخت عليه معلومه المحترم يفرض احترامه |
$ ,, $ اقتباس:
وحتى السرية بس تمويه ..:41:41 $ ,, $ |
كلامك عين العقل
|
:i121 والله العظيم انك صادق ما ينفعون ابد والثاني تقول وين المدير المدير يشتغل شغلتين صيدلي ومدير انا ما دري وين تصرف الله المستعان
|
الله يستر على المسلمين |
اشكر كل اللي مرو على الموضوع
بس حبيت اعلق على كلام الاخ شخصيه اولا يشهد الله على كلامي اني ماكذبت او زودت حرف من عندي وشف ردوود الناس واحكم ثانيا الطبيبات زي ماقلت لك الوالده 2 وحده فوق الخمسين وهي دايم عندها مراجعه او موظفه تسولف معها والثانيه كان معها ولد بالشهور تجلسه بعربه جنبها بعدين صارت تجيبه هو والشغاله بعدين انا مو مشكلتي مع ولدها انا مشكلتي بتعاملها السيء من عند البب تطرد المراجعات ليش هي اسمها طبيبه اجل؟؟ وتقول المحترم يفرض نفسه يعني كل اللي ايدو كلامي هنا مو محترمين؟؟؟ وابي خدمه خمس نجوم ايه ابيها اظنهم ياخذون رواتب ماحد يشتغل ببلاش وبعدين الحمدلله انا مسلمه واعامل الناس باخلاق فرضها علي ديني احترم كل شخص اتعامل معه طبيب والا عامل بقاله على قولتك. |
صادقة :41 مستوصف حينا نص زينات :017: نص شينات:mad: |
والله صحيح كلامك من راحت الدكتورة ايمان الله يذكرها بالخير والمستوصف خربان
رجعوا الدكتورة ايمان حسبي الله على من كان السبب والله يمهل ولايهمل كانت تستقبل مراجعاتها بروح طيبة ولابتسامه الي ماتفارقها وتسمع للمريض وتتفاعل معه لاكن مانقول الا حسبي الله ونعم الوكيل وانشاء الله لي شالها ربي يشيله مثل ماشالها والله مايوفق الي تسبب لها |
السلام عليكم ورحمة الله وبركاته انا قريت موضوع الاخت وتقريبا عندها حق في اغلب الكلام لان زوجتي بيحصل كل هالاشياء الغريبة زي الاخت الشاكية و تقولي ان الطبيبة اللي تتكلم عندها كانها ما تبي شغل بس جالسه عشان السواليف مع الزميلات و نادرا ما تجلس بغرفتها او تتحجج ان عندها شغل ثاني وانا والله ما اشوفها تسوي شي سبحان الله ايش لون تستحل اجرها هذا بعض التقول زوجتي عن قسم النسا اما قسم الرجال فحدث ولا حرج نادرا انك تواجه موظف حتي اني كنت بنقل ملف وراجعت اسبوع كل ما جيت يقولون ان الموظف ما جه طيب ما في بديل او احد يقوم بشغله يعني مصالح الناس تتعطل عشان موظف مهمل او ما يداوم لكن الشوفو باقي الحاصل لو جيت اخد حرارة ما احصل ممرض واصبر لين تجين ممرضة من قسم الحريم وبعدها لو اروح اراجع احصل طبيب جالس مايسوي شي غير السواليف مع الموظفين ولو ادخل يقولي راجع عند الطبيب الثاني وهو ما عنده مراجعين ولا غيره حتي اني سالت واحد من العاملين ليش ما يشوف المراجعين ما هو بطبيب قالي ما ادري بس هو مدير ايش لون مدير وما يشوف المراجعين ولو جيت الطبيب الثاني مزحوم هو صحيح ما يقصر بس دوم عنده زحمه اما عن مراجعين السكر كل ما جيت اخد ملف الوالد اجلس ساعة و مرة احصله ومرات ما نحصله ايش ها الاهمال ولو دورت عن مدير المستوصف عشان يشوفلك حل دايما غير موجود سبحان الله ما ادري ايش لون الموظف يستحل راتبه وهو ما يشتغل لو ما يخاف من الادارة او عندهم ووسايط يخاف الله لانهم محاسبين ,,,,,,, واخيرا نتمني من الله قبل المسئولين عن الصحة ان يصلح احوالها واحوال العاملين فيها لان هذي صحة ناس ما تصبر والله المستعان علي ما تصفون .................. |
والله هذولي يبن من يجلدهآ جلد الحمير(( اعزكم الله ))هذولي في قمة الاستهتار
امالويطيحن بدين اختي :i121الي ماتتفاهم بمثل هالاشكال اللى بالتبقيس والترجيف ...ياااااااولي والله ياهي ماتحب الاستهتار والله ان تكفخهآ لاكن ماقول الى حسبي الله عليهن ونعم الوكيل واصلآمالقن رجاجيل بالمصتوصف يادبونهن ويحترمن الناس ولاعندهن احساس بمسؤليتهن بالدين وواجبهن المهني الي اكثرامانه من اي وظيفه |
لا حياة لمن تنادي ...... اتمنى من احد الاخوات تدخل وتهددهم بكشف امرهم على الادارة الصحية |
| الساعة الآن +4: 04:46 AM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.