|
حسبي الله عليك يا أمين منطقة القصيم ، حسبي الله عليك ، حسبي الله عليك .
بسم الله الرحمن الرحيم حسبي الله عليك يا ( الأمين ) حسبي الله عليك يا مَن كل مِن له دخل بإصلاح طريق الناصرية ، أوعارض أو أخّر إصلاحه أو كان غير مهتم ومكترث أو له مصلحة بالتأخير أو أو . . . . يعني طريق الناصرية ليش ما يصلّح ؟ ؟ أريد من ( الأمين ) ؟ جواب واضح ومقنع ؟ يعني هالحين الطريق له أكثر من 15 سنة والطريق متحفر ومظلم ومتكسر من الأطراف ومطبات ، وليس فيه أي وسيلة من وسائل السلامة على الإطلاق وهو يخدم أحياء كثيرة أنا أتساءل : من المستفيد يا ( الأمين ) ؟ حسبي الله على من كان السبب . أقول : أبشر يا مَن كنت السبب ، والله إنه يُدعى عليك ليلا ونهارا ، وسرا وجهارا . ورحم الله عمر بن الخطاب حيث يقول : (( لو أن شاة عثرت على شاطيء الفرات لسئل عنها عمر يوم القيامة )) وأنت أيها ( الأمين ) ماذا ستقول لله إذا سألك عن طريق الناصرية : لماذا لم تصلحه ؟ وغيره من الطرق أيضاً ؟ هل ستقول إنه فيه غيره من الطرق أهم أو أن هذا الطريق لا يسلكه أحد من الأوادم أو أنني لا أسلك هذا الطريق أو أو . . . أو أنه ليس لي مصلحة في إصلاح هذا الطريق أو أو . . ولايقول أحد إن ( الأمين ) ماله دخل أقول : والله إنه بجرّة قلم يقدر يصلح الطريق . أما مسألة التلميح ما عادت تنفع . حسبي الله ونعم الوكيل حسبي الله ونعم الوكيل حسبي الله ونعم الوكيل |
تكسرت السيارات من هالشارع كله مطبات الله لا يوفق من حطهن
|
وين موقع الناصره ممكن توضح اخوي
|
امتداد طريق حي الخليج من جهة الجنوب |
المشكله عليه زحمه مو طبيعيه شكرا |
ورغم كل تسائلاتك ولاشك أنك صادق بها ... إلا أنه لامجيب وسيضل الصمت هو الجواب..
ولمن كما قلت حسبي الله على كل من كان السبب..!! تحياتي يالغالي.. |
أعانكم الله أهالي الناصرية أهالي الناصرية وأهالي حي الخليج سيواجهون مشكلة عويصة من اغلاق الطريق ووضع اشارة حي الخليج الجديدة واصحاب نقل الطالبات الاسبوع القادم عند بدأ الدراسة وطلاب مجمع الخليج التعليمي من عكس اتجاة السير لان ليس لديهم منفذ من جنوب حي الخليج الى مجمع البنات والى مدرسه مصعب ابن عمير |
اي حي في جنوب بريدة يعاني الإهمال ولايتم الإهتمام إلا بالمواقع التي يتوقع مرور المسؤولين عليها مثل سوق التمور وجامع الونيان أما ماعدا ذلك فليس لهم وللأسف إلا الصبر والمصابرة |
عجيب صمت الأمانة على هذا الطريق المفجع |
ياحسره ياطريق الناصريه عآآد !!! |
الحل انكم توقفون سياراتكم وتسدون الطريق لمدة اربع ساعات ف اليوم
حتى تلفت انظار المسؤلين الكبار وان شاءالله بتظبط الخطه ويصلحونه ع طووووووووول:085: |
والله الطريق مهمل بشكل واضح منذو سنين
وأنت تمشي رجليه تحس بالمطبات والحفريات فـ إلى متى يأمين المنطقة !! |
اصلا امين المنطقة والمسؤولين عن هذا الطريق ..
ليس لهم مصلحة من تجديده ... لو عندهم بيوت في هذا الحي كان تحصله افضل شارع ببريده .. |
شيء بدييييييييييييييييييهي أي حي في جنوب بريدة يعاني الإهمال حسبي الله ونعم الوكيل
|
في فمي ماء كثير .. اخشى بخروجه من الغرق .. لاقدر الله ..
الله يصبرنا بس .. |
وين الشارع بالجنوب ايييييييييييييييييه
اذا عرف السبب بطل العجب |
\
\ صاحب الموضوع اتوقع لو وضعت صور للشارع يكون افضل على اقل تقدير فالغريب سكوت اهل الحي من المطالبة والرفع للامارة بذلك ومسئلة الامين انه شمس يشوف كل شيء هذه صراحة مستحيلة فالامين وضع موظفين يعملون ويخططون فالافضل كتابة خطااااااااااب للامين ليكون حجه عليه امام المسؤولين مع تكثيف المواضيع داخل منتديات |
ثلاثة ارباع بريدة بحاجة للإهتمام مو بس الناصرية
|
الله يعطيك ألف عافيه ياللي كاتبه الموضوع ..
انا كتبت موضوع قبل اسبوع عن هالشارع .. واشوف ان كثير من الاخوان يقلل من قدر هالشارع والكثافة اللي فيه .. شارع مايتوقف لاليل ولا نهار من السيارات .. مخططات سكنية كثيره وكل مالها بزود .. والشارع بدون صور يحكي عن الظلم الواقع علينا .. وبالفعل الناس تدعي بالليل والنهار .. مع العلم أن اغلب شوارع بريده فيها مآسي .. لكن هالشارع مأساته أكبر من غيره .. مانقول الا حسبنا الله ونعم الوكيل .. |
طلبك في محله لو كان عندنا مجلس بلدي صح لعرف الأولويات ونفذت لكن تريد وضع لوحات تعرفك بمكان المجلس حاضرين شكرا لك |
جد والله ليش ماي صلح
|
أخي دفا. تقول : ( اتوقع لو وضعت صور للشارع يكون افضل على اقل تقدير، مع تكثيف المواضيع داخل منتديات ) أقول : الصور موجودة بالموقع ، اكتب بالبحث كلمة ( الناصرية ) ويطلع لك كل ما كتب عن الطريق ويوجد صور في بعضها . أما قولك : ( فالغريب سكوت اهل الحي من المطالبة والرفع للامارة بذلك ) أقول : أهل الحي لم يسكتوا ، بل رفعوا للأمين والإمارة ، لكن من دون جدوى . أما قولك : ( ومسئلة الامين انه شمس يشوف كل شيء هذه صراحة مستحيلة فالامين وضع موظفين يعملون ويخططون فالافضل كتابة خطااااااااااب للامين ليكون حجه عليه امام المسؤولين ) أقول : ( أبيك أخوي تعمر لك عمارة ،وتنقص الارتداد 10 سانتي ، وشف وشلون يكون الأمين شمس ويعرف كل شي ، لكن اللي يبونه يعرفون وشلون يتابعونه ، واللي ما يبونه والله ما همهم ) لكن أقول : والله لن تتطور بريدة ما دام إنهم يعملون بـ(عقلية المصلحة الشخصية ) والله الموفق |
حسبي الله عليهم
كل شوارع بريدة تحم التسبد انا ودي ادري وشوله حاطين امين اصلاً الشوارع تحم التسبد كل اعمالهم تحم التسبد ودي ادري وش دورهم اصلاً قسم بالله قهر ياخذون رواتب وكل شي على الفاضي وهم ماغير تسدح بالمكآتب ولا شفنا اي نتائج واللي يقهرني مجلس بلدي وما مجلس بلدي وبلشين لي بالمهرجانات !! قسم بالله انا حالف ما اصوت ولا اللي اعرفهم من زين مجلسهم عاد ماشفنا غير الخرط الفاضي .. قسسسسسسسسسسسم بالله بريدة لن تتطور دام عندنا هالاشكال ذي .. الله يرحم الحال بس .. شوارعنا كله ماشية بالبركة مافية مخططات ولا فيه استرتيجيات يمشون عليه ولا فيه اصلاحات ولا شي كل شي ماشي بالبركة والواسطة تقدم عمله عندكم واسطة يبي يزين شارعكم .. إذا ماعندكم مالكم إلا السكوت !! وهذآ حآلنا عايشين على فتامين واو .. ما اقول إلا حسبي الله عليهم .. كسرو سياراتنا وخربوا كفرآتنا وكل شي حاسوه .. الله يعينكم يا اهالي حي الناصرية |
أشكر كل من شارك بالموضوع وأرجو من إدارة المنتدى تثبيت الموضوع ولو عدّة أيام لأهميته لقطاع عريض من الناس |
اقتراح
ليش مانضم جنوب بريدة الى عنيزة حتى تشملها الاصلاحات |
هذا الطريق مظلوم وأهل حارته مظلومون ومن يستخدمون الطريق مظلومون.........وللظلم نهاية
|
[أشكر لك على الموضوع
|
غالتي لا تدعين ولا تتحسبين اليس مسلم ولو ذهب احد اليهم كان احسن |
اقتباس:
يعني كل مسؤول مقصر واجبنا نروح له ليش ما يشوف شغله وعمله ومسؤولياته بدون شكاوي حسبي الله على كل مسؤول قصر في عمله والطريق مهمل من سنوات لو تشوفونه الصباح وقت الدارسه تتروعون |
يقلون ... طريق الناصريه..ظلام+رعب+سيد واحد+سرعه=عليكم الاجابه:i121؟؟؟؟؟ |
جنوب بريده مآسات عظمى
|
الله يكووون با لعووون
|
الجميع يشتكي حتى الأرياف , الواحد مايصدق إنه جوات بريدة من شيء يشوفه , أحياء كامله ما جته إنارة الشوارع , طريق الناصرية أزمل إذا صار عندنا شيء من ذيك الناحية , وبوسط الأحييآء مافيه اهتمام تجي الكهرب وتحفر وتزفلت اي كلام وتمشي ونفس الشيء مع المياة والاتصالات والصرف الصحي ! وإذا جو خذ تقطيع بالخدمات مره الشبكة بتوع النت مفصوله ومره التلفون بكبره وكلن يرمي المسؤولية على الثاني ! ياويلكم ياويلكم يوم لا ينفع مالٌ ولا بنون ! الإنسآن ماله قيمه عندهم وبسسسس : ( |
حسبي الله ونعم الوكيل
حسبي الله ونعم الوكيل حسبي الله ونعم الوكيل |
الله يخلف بسسس
|
المسئول الاول مدير عام التشغيل والصيانة هو الي ابواد الديرة ابوادي
|
اعانكم الله واتمنى لكم التوفيق وتسهيل الامور
|
لاحياة لما تنادي احتسبو واصبرو وعندما ترتادو نفس الطريق ادعو على من تسبب بتأخير صيانة الطريق شارع الناصريه يعد من الأولويات من المفترض بأن الطريق متكامل من ثمان سنوات |
الدعاء هو أفضل الحلول , نحن مضلومون بهذا الطريق ودعوة المظلوم ليس بينها وبين الله حجاب
|
طريق الناصريه وانت متجه جنوب تحس انك بتنقلب انت وسيارتك من المطبات
|
اتوقع لو يشوف امين المنطقه كلامكم عن الطريق من بكره بيعتمد ميزانيه خاصه له بس تتوقعون الامين بشوف الموضوع او لا..؟ اللي يعرف الامين يعطيه الرابط يمكن يحن على عابرين الطريق ويعدله احس بيوم يصير فيه حادث ويموت ناس ويكونون برقبته يوم الدين |
ياخي .الامين يعتقد ان بني ادم في شمال بريدة فقط
تعال شوف شرق بريدة تحمد ربك |
أنا يقول لي واحد من الشباب إني رحت للأمين ( السلطان ) وكلمته عن الطريق ، وقال : تبي تشوفون تغير كبير بالجنوب . ( وكان هذا قبل سنتين تقريبا ) أقول : الظاهر أن هذا الكلام لايعدو أن يكون إبرة تخدير . وإلا فما هي مصلحته من إصلاحه ؟ أو ما هي المصلحة اللتي ستعود عليه من إصلاحه ؟ الله المستعان . |
اقتباس:
بشهاده كل الناس اللي قابلوه بصراحه ما زعل احد يعطيهم من الوعووود ومش حالك هو مايبي يصادم احد ووعوده جاهزه بس نبي افعااااال يا سعاده الامين الافعال هي اللي تبثت مصداقيتك وليس الاقوال والكلام المعسول والوعود الوهميه انا اتوقع والعلم عند الله السنه الجايه عضو يبي يكتب عن نفس الطريق بس معه اثباتات عن حوادث وقتلا في هذا الشارع المميت |
سبحان الله
حنان الربيع صراحة موضوع مهم بالنسبة لاهل الحي واثارة الموضوع عبر الموقع بريدة ستي حتى يصل للمسؤولين لاكن عندي سؤال من جد محتاج اجابة انا معاك في الموضوع مؤيدك مية في المية بس هل طرقت باب الامين او ذهبت اليه ورفعت شكوى عن هذا الطريق ؟! يمكن الامين اوصى من تحته باصلاح الطريق لاكن الي تحته لم ينفذ الامر مجموعة تساؤلات ؟؟ هل طرحت على نفسك الاسئلة ؟؟ |
ماينفع اعرف واحد راح لمه ؟؟ او شخص كتب اني رحت لمه ؟؟ وش الاثبات من الكلام ؟؟ من السهل الكتابة باسم لقب وليس حقيقي ؟؟
|
اقتباس:
والله هذي مسؤوليته مهيب مسؤوليه المواطن ما صالحه مقاول يعطيه مقاول ثاني مع سرعه التنفيذ مع ملاحظه ان المواطن مهوب مجبور يقدم شكاوي للامين المفروض الامين يتلمس احتياجات الناس ومصالحهم بدون شكاوي وهذا شغله |
والله العظيم إني أعرف اثنين رايحين للأمين ومكلمينه بل ومعطينه خطابات ، والخطابات موجودة برقمها وتاريخها والله إنه يدري عن طريق الناصرية مثل ما يدري كم اعياله |
اقتباس:
مادام فيه خطابات وارقام الخطوة التالية رفع خطاب لوزارة البلديات والاشارة للخطاب السابق يعني المتابعة لها تاثير |
اقتباس:
:42:42:42 حسبي الله على من كل ضيّع الآمانه.... |
أصلا شوارع بريده كلها منتهيه صلاحيتها
وبعدين مسوين فاهمين كل واحد منهم محط لومه على الثانى ( مره يقولون هذا تابع لائدارة الطرق ومره يقولون تابع !!!!!!ماما ادرى ؟ |
|
حلوة طرق اليابان
بس من جد تبي السعودية أو دول عربية تسوي مثلهم من سابع المستحيلات والحمدلله على نعمة الإسلام أولا وأخيرا والشي الثاني أزعجونا بتفحيط و و و وشلون لو تصير شوارعنا زي اليابان كان ماتفضي ابد :d شكلها روعة كأنها ملاهي وللأسف حتى ملاهينا ماهي كذا :d........ مافيه شي ببريدة فالح دخلت الواسطات والفساد في كل شي :oo والله المستعان ولانلقى الي يأدي الوجب إلا ماندر |
اقتباس:
مسوي ذكي وفاهم الطريق ببريده تراه مهوب بالربع الخالي يعني الامين يشوفه بنفسه وبعدين هذا شغله بدون ما نقوله وبعدين اذا هذا الطريق المهم ما يدري عنه وشوله جالس على كرسي الامانه وبعدين واحد من الاعضاء حلف بالله وش تبي اكثر من تسذا |
فعلن صراحة كل مامريت من هاك الشارع احضرم قسم بالله سيارتنا تفككت ..
لا شف لاصار جايه مطر شف وشلون المعاناة .. لا تصريف ولا إنارة ولا طريق زين .. صراحة فعلن من زمان وهو كذا ياليت المسؤولين ينتبهون له |
كل ما أمر من عند هالطريق أفكر بأهل الناصرية والوجيعان كيف يمرون من عندهـ يومياً ..!
كيف لو أحدهم عنده حالة طارئة !! كيف لو واحد حرمته حامل وطاح اللي في بطنها من الحفر والمطبات !! اللي سوو حوادث بسبب الشارع !! كلهم مظلومين .. ودعوة المظلوم مستجابة |
حسبي الله عليك يا ( الأمين ) حسبي الله عليك يا مَن كل مِن له دخل بإصلاح طريق الناصرية ، أوعارض أو أخّر إصلاحه أو كان غير مهتم ومكترث أو له مصلحة بالتأخير آآآآآآآآآمين . ... يقول الأمين : سبب إهمالنا للجهة الجنوبية لأنها قديمه ! ؟ ومصدري من أحد موظفي الأمانة ! |
اقتباس:
افا يا الامين ما توقعتها منك اذا هذا كلامه وصلوا له سلامه وقلوا له يستقيل حالا دون شرط او قيد ويا كثر رجالات بريده المخلصين ما توقفت عليه اين سواسيه ومشتقاتها المهم الطريق لازم يصلح بأسرع وقت والا ترى وخر عنا نبي نوصلها لاكبر رأس |
|
شكرررررررررررررا
|
اقتباس:
|
الله يحقق امنياتكم بهذا الشارع ويكفي المسلمين شر الحوادث تحياتي |
تكفون يا ناس دعواتكم دعواتكم دعواتكم عليهم الله لايوفقهم يارب الله لا يوفقهم يارب انا كل ما وطيت نقاط تفتيش اللي بنص الشارع ادعي عليهم كسرو صدامي وكفراتي لا بارك الله بهم تكفون ياناس دعواتكم عليهم وعلى شوارعهم الخايسة اخ ياليابان ويلوموننا فيك بعد |
أي أمانة تتكلمون عنها !!!!!!!!!!!!!!!!!!!
|
أحس ( والله اعلم ) إن الموضوع طالع من قلب ..! |
شكرا لكاتب الموضووع
والله كلمه حسبي الله عليه ما تيزي بلاه مايمر مع الشاررع كل ييوم ولا تكسرت سيارته شاارع خطر ومظلم اقل شي يحطون لمبات |
يا إخوان أختصر لكم الموضوع اللي يقال له ( الأمين ) وأُراه أبعدَ ما يكون عن هذه التسمية ( في هذا الموضوع ) على أقل تقدير أقول لكم : ماراح يأمر بإصلاح الطريق لأن المسألة ( اعناد ) قال الله تعالى: {إِنَّ خَيْرَ مَنِ اسْتَأْجَرْتَ الْقَوِيُّ الأَمِين} [القصص: 26]. لكني لا أرى قوة ولاأمانة |
سياراتنا تكسرت من الطريق وانا ماراح احلل الامين حتى يتشري مساعدات لسياراتي
حسبنا الله ونعم الوكيل .... حسبنا الله ونعم الوكيل |
اقتباس:
اذا جيت مع طريق رياض الخبراء مع الدائري الشرقي يجيك كبري اللسيب وانت متجهه غرب قبل مفرق الهديه رح يمين لين يجيك حرف تي عديه يجيك تحوله اجباري يمين انت رح يسار تلقاه قدامك موقع الناصره |
| الساعة الآن +4: 05:04 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.