يابنات تغطوا .. جاكم سعودي ..
 

[align=justify]

يابنات تغطوا .. جاكم سعودي ..







العنوان واضح من موضوعه :D .. المهم ندخل بالموضوع ..
بعض البنات الله يصلحه .. ماخذتن بروحه مقلب .. وواثقتن بنفسه ثقة زايده عن اللزوم ..
بعض هالبنات الله يصلحه .. مثلاً عن موضوع الحجاب .. تلقاه إذا شافت سعودي تغطت وتحشمت .. وإذا شافت أجنبي .. عادي عنده .. وكأنه حلال للأجنبي وحرام على السعودي ..
وأنا دائماً أردد مقولة: [حرام علينا .. وحلال عليهم ..!] .. أنا أبي أعرف وش هالدين اللي يحلل لغير السعودي إنه يشوفه .. والسعودي حرام يشوفه ..
أنا بعطيكم بعض المواقف اللي صارت معي .. والمواقف اللي صارت لأصدقائي الحلوين .. وترى المواقف هن ثمان مواقف .. يعني صبركم علي .. وترى الموضوع يستاهل إنكم تقرونه .. لأنه مشكلة مستفحلة جداً .. وترى فكرة الموضوع ببالي من سنة تقريباً .. بس متعيجز اكتبه :D ..
لكن اللي شجعن اكتبه الحين .. هو أخي الفاضل الكريم وحبيبي الصديق الصمصام (عبدالله) ..
كنت قبل كم يوم أنا وإياه طالعين .. وكنا نسولف عن زي هالمواقف .. وقص علي موقف كد حصل له هو مع خواته .. (الموقف الثاني) .. وأنا قصيت عليه مواقف كثيرة .. مواقف راح أقوله لكم .. ومواقف ماقلت لكم .. لأنه مايصلح أقوله ..
لكن تشجعت وكتبت هالموضوع .. والحمدلله طلع كذا .. ويارب إنه يعجبكم ..

والحين أبسرد لكم المواقف مع بعض .. وتراه طويلة شوي .. يعني صبركم .. وإن شاء الله ماراح تندمون :D ..



الموقف الأول:
بينما كنت في أحد الأيام .. مسكت براسي إني أشتري لأمي هدية .. تعرفون لازم أبين له مدى حبه لي .. تعرفون الشباب دائماً يبرون بأمهاتهم .. مع إن الهدية شيء بسيط أقدمه لأمي الغالية .. الله يخليه لي ويحفظه .. بس هذا نوع من أنواع البر بالأم ..
المهم .. قلت لابد من شيء تحبه أمي وماتنساه .. فكرت وفكرت .. ولقيت شيء تحبه أمي ..
رحت وشريته .. قلت عاد لابد من الزبرقه .. وأروح لمحل هدايا .. يعني علشان أغلف الهدية .. تعرفون علشان تطلع كشخه .. واكتب كرت إهداء .. (ياعيني على الرومنسية) ..
دخلت محل الهدايا .. كان البائع من الجنسية اللبنانية .. والله من التغنج هاللبناني .. سلمت على طول ..
والله ماعطان وجه اللبناني .. ليش .!
والله فيه بنت ضاربن معه سواليف .. وداخلن جو .. البنت ما انتبهت إني دخلت .. وكانت طبعاً فاتشه .. وتسأله عن أشياء .. والله نسيت وشي ..
البنت ما انتبهت إلا وأنا واقف قبال اللبناني .. وأقوله خذ هذي وغلفه ..
طبعاً هي احتاست .. ماتوقعت إن سعودي دخل .. تلخبطت البنت ..
وعلى طول هجيج .. طلعت من المحل ..
أنا جلست أضحك بصراحة .. عجزت أمسك روحي من الضحك ..
اللبناني استغرب .. ويقولي ليش تضحك .!
قلت له بالله عليك .. وراه انحاست وطلعت وهجت البنت .!
قالي مدري .!
قلت هي عادي عنده إنه تفتش لك .. أنت وخشتك .. بس أنا حرام علي إني أشوفه ..
وكأنه حلال عليك وحرام علي ..
سكت هو ..
قلت له شف يا ألبي .. أنا ماقلت إني أبشوف خشته .. لكن المشكلة إنه تفتش لك وتتغطى عن السعودي .. وكأن الدين يقول تغطي عن السعودي .. بس افتشي للأجنبي ..
هو بصراحة مايقدر يرد .. لأنه يخاف إني أسوي له شيء .. (تعرفون أنواع الهيبة أنا) .. المهم عطيته الهدية .. وقلت له غلفه .. وكتبت الكرت .. ودفعت له دراهمه .. وطلعت ..

الموقف الأول انتهى .. عاد أنتم تشوفون كيف الوضع ..!
حلال للأجنبي .. وحرام على السعودي ..



الموقف الثاني:
يقص علي الأخ الفاضل الصديق حبيبي عبدالله (الصمصام) قصة حصلت له في سوق حياة مول .. كان الأخ مع خواته طالعن للسوق ..
يقولي دخلن خواتي محل .. وكان فيه بنات بهالمحل .. وكانن طبعاً هالبنات فاتشات .. يوم جن يطلعن من المحل ..
وأثره الصمصام كان واقف عند الباب يحتري خواته .. تلخبطن هالبنات ..
ورجعن على طول للمحل .. ووحده منهن كانت فاتشة و رجعت و تغطت يوم شافته..تقل مافيه عمال المحل ..
طبعاً الصمصام يقولي .. طلعن خواتي من المحل وهن يضحكن ..
يقولي ومار أسألهن وش القصة .. ويقصن عليه القصة ..
يقولي جلست أضحك .. على تفاهة هالعقول .. ومشوا من المحل ..


طبعاً أنتم تشوفون .. كيف وصل تفكير بعض الحريم .. يوم شافن سعودي ملتحي .. تغطن .. وكأنه حرام يشوفه هالمطوع وهي فاتشه .. بس حلال يشوفه هاللبناني وهي فاتشة .. أوهاليماني ..
الله لا يبلانا ..



الموقف الثالث:
طبعاً هالموقف حصل لي برى السعودية .. وبالأصح وحنا راجعين من أمريكا ..
طبعاً أنا أبختصر القصة .. لأن هالسفرة اللي هي لأمريكا .. صارت به أنواع المواقف .. مثل اللي أبقولهن .. لكن هالموقف هو الأكثر أهمية .. وهو اللي شدني يعني ..
المهم يوم كنا في مطار نيويورك .. صلينا العصر .. وركبنا الطيارة .. طبعاً الرحلة راح تستمر حوالي 13-14 ساعة .. ركبنا الطيارة .. والله يعيننا على السفر .. الرحلة طويلة جداً وراح تكون مملة .. لكن الشكوى لله .. وش نسوي ..!
طبعاً الرحلة مافيها توقف .. يعني من نيويورك .. إلى الرياض .. على طول .. يعني مهناش وقفة ..
المهم .. ركبنا الطيارة .. وجلسنا بكراسينا .. طبعاً الطيارة كله عائلات سعودية .. اللي جايين سياحة .. واللي جايين لدراسة .. واللي جايين لعلاج .. المهم إن الجميع راجعين للرياض ..
أقلعت الطيارة .. متجهة إلى الرياض الحبيبة .. وبدأ الكسل والملل .. إما مجلات أو كتب .. أو أفتح التلفزيون .. وإذا فتحت التلفزيون .. يا إما فلم مصري سخيف .. أو فلم أمريكي بايخ .. أو فلم كرتون حلو .. أو تقعد تلعب بالألعاب اللي بالتلفزيون ..
المهم أنا جلست ساعتين أو ثلاثة .. والله وأنام .. مادريت إلا أبوي يقومن .. يقولي قم قم .. قلت هاه وش فيه .. لا يصير طحنا .!
قالي لا مابنا شيء .. بس قم كل لك شيء تملى فيه بطنك تراك ماأكلت شيء من أمس ..
قلت له طيب بس مالي خلق ..
قالي أجل لا تاكل بس قم ترى باقي على السعودية أربع ساعات .. قم وتجهز ..
قلت يالله صباح خير يعني تونا ..
المهم أنا بصرحة بيني وبينكم كنت أبي الحمام (دورة المياة) لقضاء الحاجة .. رحت لدورات المياه .. بس يوم وصلت الحمام .. تنّحت (أي: وقفت وباستغراب :D ) ..
تدرون ليش .!
لأني أشوف عند الحمام .. أربع حريم .. كل وحدة معه عباته بيده .. طبعاً اللي لابسه جنز .. واللي لابسة تنورة .. واللي لابسة برمودا (البرمودا: أحسن من الشورت .. يعني زي الشورت بس أحشم منه وأطول منه) .. المهم الوحدة صارت وش تسوي .. تدخل الحمام كذا .. همن تطلع من الحمام .. لابسة عباة ومتغطية ..
أنا استغربت بصراحة من هالتصرف .. لهالدرجة وصلت الجرأة على الله .!
تتغطى علشان السعودية .. موب علشان تتحشم .!
مصيبة والله ..
أنا عن نفسي تبسمت .. همن رجعت للكرسي .. وأقص على أمي .. وتجلس أمي تضحك معي .. من تفاهة هالعقول ..
طبعاً الحمدلله وصلنا للرياض بسلامة .. وكل الحريم اللي معنا طلعن متغطيات :D .. ولا فيه أحد منهن الحمدلله مضيعة عباته ..


انتهى هالموقف .. طبعاً أنتم تشوفون بجاحتهن .. كيف وصلت .!
حلال على الأمريكي .. وحرام على السعودي .!
وكأن الدين للسعودي بس ..!



الموقف الرابع:
هالموقف صايرن لخويي في ديرة اسمه (مورشيز) .. الظاهر والله العالم إنه حول ماليزيا واستراليا .. يعني جنوب شرق آسيا .. بهالمنطقة .. الظاهر ترى ..
المهم خويي يقص علي قصته هناك .. يقول كنا جوعانين .. ودورنا مطعم ولقينا مطعم كنتاكي .. يقول كنت أنا (المتحدث خويي) ومعي ولد أخوي وأخوي وزوج أختي ..
طبعاً زوج أخته ملتزم وملتحي .. وذو مرتبة عالية بالدولة عندنا .. والمترجم بالطبع معهم ..
يقول دخلنا مطعم كنتاكي .. يقول أول من دخل أنا (المتحدث خويي) ..
وأشوف على اليسار .. ملامح رجل وحرمته .. مهيب ملامح غريبة .. تقل ملامح سعوديين ..
الرجل ومرته اختبصوا .. ماتوقعوا إنهم راح يلقون سعوديين بهالديرة .. لأن الديرة ماعليه كثافة من السياح العرب ..
المهم الرجل أخذ مرته وعلى طول للباب وطلعوا من المطعم ..
مع العلم إن الرجل وحرمته توهم طالبين غداء .. ولا أخذوه .. بس من الروعة طلعوا وتركوه ..
خويي يقولي .. أنا ضحكت .. ماتوقعت إنهم بهالروعة راح يصيرون .. تخيلوا يوم شافوا سعوديين اختبصوا .. وطلعوا على طول ..
الغريب في الأمر .. إن هالحرمه فاتشه طول الوقت .. بس يوم شافوا سعوديين اختبصوا .. وكأن الدين للسعوديين فقط .!
أيضاً ترى السعودي وزوجته ماشافوا زوج أخت خويي .. يعني هذا وهم شايفين خويي .. أجل لو شافوا زوج البنت وش راحوا يسوون .!


طبعاً .. بعد هالموقف .. أنا دائماً أقول ترى أي واحد راح يشوف عائلة سعودية بالخارج .. وحريمهم فاتشات .. فليجزم إنهم راح يختبصون .. ويخافون .. بس إلا إن كانت البنت بجيحه .. فهذا شيء ثاني .!



الموقف الخامس:
هالموقف صار معي أنا وأمي بسوق الذهب عندنا بالرياض .. طبعاً طلعت أنا وأمي ورحنا لسوق الذهب .. نبي نبيع لنا كم ذهبه لأمي الغالية (الله يحفظه ويخليه لي) ..
رحنا للسوق .. دخلنا أول محل .. وثاني محل .. وثالث محل .. ورابع محل اللي صار فيه الموقف ..
في رابع محل .. كان فيه بنت .. فاتشه وتناظر الذهب .. طبعاً البائعين من الجنسية اليمنية ..
دخلنا أنا وأمي .. سلمت بالطبع .. البنت يوم شافت سعودي .. دخل .. تغطت على طول ..
طبعاً أنا كالعادة .. لابد من الابتسامة في مثل هالمواقف ..
ألتفت لأمي وقلت له بصوت خفيف .. يمه ماسمعتي البنت اللي تقولي لصديقاته: (يابناااااااااااااااااات تغطوا .. جاكم سعودي) .. ابتسمت أمي وهي تشوف الحرمه اللي قبل شوي فاتشه .. ويوم شافتن دخلت تغطت ..


وش أسوي يانااااااااااااس في مثل هالمواقف .!
بجاحة مابعدها بجاحة .!
تتغطى علشانك سعودي .. موب تتغطى خوف من الله وعلشان تصون نفسه من المحرمات .!
مصيبة والله ما بعدها مصيبة .!
الله يحفظنا ويرحمنا برحمته ..



الموقف السادس:
خويي كان في مركز التميمي (زي بنده) .. عند جامعة الملك سعود ..
طبعاً خويي كان يحاسب عن الكاشير .. وقدامه بنت ..
خويي هذا .. الله يصلحه من الناس اللي مغسلون وجهه بمرق .. ولسانه سليط .. ولا همه من أحد ..
يقول خويي يوم خلصت البنت من محاسبة أغراضه .. وبديت أحاسب أنا .. خلصت وهمن طلعت ..
يقول يوم طلعت لقيت اللي قدامي جمس أسود .. والباب الخلفي مفتوح .. طبعاً اللي فاتحه كان السواق .. والسواق من الجنسية البنغالية .. وكانت البنت تبي تركب الجمس ..
(على طاري البنغالي .. كد سألت عامل محطة .. وقلت له أنت بنغالي .. قالي لا .. قلت بس شكلك بنغالي .. قالي إيه بس أنا بنجلاديشي .. لا تقول بنغالي .. أنا ضحكت .. وقلت له خلاص يابنغالي .. ماراح أقولك بنغالي :D )
المهم .. البنت يوم ركبت الجمس .. فتشت على طول .. وكأنه حلال على البنغالي .. وحرام على السعودي ..
ومار يجدع خويي كلمة ..
يابنت تغطي جاك سعودي ..
هي ألتفت على طول .. ويوم شافته سعودي .. تغطت على طول ..
خويي مشى .. ولا ناظر وش صار بعد كذا ..!


بجيح هالولد بصراحة .. المهم أنتم تشوفون .. يوم جدع الكلمة تغطت على طول .. لأنه ماانتبهت له يوم فتشت ..
وش أقول ووش أعلق أنا .!



الموقف السابع:
في إحدى سفراتنا للخارج .. وكانت هالسفرة لماليزيا (وين المنخرش لا يسمعن الحين :D .!) .. المهم كنا ساكنين بالعاصمة (كوالالمبور) وكنا بفندق ..
طبعاً أول ماسكنا .. قلت بروح المسبح .. ودي أسبح .. لأن مسابحهم فخمة ..
موب زي اللي عندنا .. كله خضار ووصخة وباردة .. المهم رحت أسأل عن مكان المسبح ..
وبآخر شيء قالوا مكانه .. بس استغربت من مكانه ..
تدرون وين قالوا لي وين المسبح .!
قالوا لي بالسطح .. بالله عليكم كد سمعتم مسبح بالسطح .! :D ..
المهم أخذت سروال سباحتي .. ورحت السطح .. يوم دخلت السطح .. مالقيت إلا واحد أوروبي منسدح .. ووحدة تسبح ..
قلت أحسن .. مافيه أحد علشان أرتاح بالسباحة .. موب إذا ألتفت يمين لقيت وحدة متمصخله وتسبح .. وإلا ألتفت يسار وحدة منسدحة وهي متمصلخه ..
المهم هاللي تسبح .. ماانتبهت لي إني دخلت .. لأنه كانت غاطسه بالمسبح ..
هي يوم رفعت راسه من المسبح ..
يالله ياناس .. طلعت سعودية .. ولابسه مايوه :D ..
أنا ابتسمت كعادتي في مثل هالمواقف (بصراحة ياناس مدري ليش ابتسم في مثل هالمواقف) ..
هي انفجعت .. ماتوقعت أحد يجي بهالوقت .. لأن هالوقت الناس توه ماقام أحد من النوم ..
تلخبطت البنت .. وبدت تحوس .. ماتدري وش تسوي ..!
أنا جلست .. انتظر وش راح تسوي ..
البنت طلعت بسرعة من المسبح .. ولفت الفوطة على نفسه .. وعلى طول للمصعد .. وهجت من المكان ..
طبعاً الأوروبي مادري عن الموضوع .. لأنه كان منسدح .. ومغمض عيونه ..
أنا حطيت فوطتي .. وطبيت بالمسبح وبديت أسبح .. جلست ساعة لحالي مافيه أحد ..
وهالأوروبي منسدح .. تقل جثة هامدة .. ماتحرك من يوم ماجيت .. يقاله يبي يلون جسمه ..
مليت أنا من السباحة .. وأخذت فوطتي .. ورحت لغرفتي ..


طبعاً بهالسفرة بعد .. صارت مواقف كثيرة مع بنات زي كذا .. فاتشات .. يوم شافن سعودي .. تغطن .. أو يهجن ..
وعلى حسب المقولة المشهورة .. دائماً أردد .. حلال عليهم وحرام علينا ..



الموقف الثامن:
خويي يقص علي .. يقول كنت في أحد الأسواق .. دخلت لمحل اكسسوارات ..
وكان في المحل حرمتين .. وحدة فاتشه وتسأل العامل .. والثانية تقلب له سلسال ..
وكان المحل صغير نوعاً ما ..
دخل خويي .. والحريم ما انتبهن له ..
سلم على البنغالي ..
ألتفت الثانية اللي معه السلسال وشافت سعودي دخل وسلم ..
ومار تلتفت على خويته .. وتقوله .. يابنت اسكتي وتغطي .. ترى دخل سعودي للمحل ..
خويي سمع الكلمة .. لأن المحل صغير نوعاً ما ..
ابتسم بوجه الثانية .. لأنه كانت تناظره .. وسأل العامل عن اللي يبيه ..
أخذ اللي يبيه .. ودفع الدراهم .. وطلع ..


طبعاً .. أنتم شفتوا كيف بعض الحريم .. إنه عادي عنده العامل الأجنبي .. لكن عيب وحرام إذا جاء سعودي .. وتشوفون كيف بجاحتهن .. قدامك يتغطن .. وكأنه تقولك .. عيب تشوفن .. بس ميخالف العامل الأجنبي يشوفن ..





أنا داري إني طولت عليكم بهالمواقف .. لكن هذا غيض من فيض (صح كذا تنقال الحكمة .! :D ) ..
والمواقف اللي زي كذا كثيرة .. ولا ودي أذكر أكثر من كذا .. مع إني فكرت إني أحذف كم موقف من هالمواقف .. خفت إنه تصير طويلة عليكم ..
بس ميخالف .. داري إني طولت عليكم ..
ويارب إني أكون وفقت في توصيل اللي أبيه لكم ..

أتمنى منكم التفاعل ..

أشكر الجميع مقدماً ..

ودمتم سالمين ..





ملاحظة:
اللي يبي يسرق الموضوع .. يقول إنه سارقن الموضوع من بريدة ستي .. واللي موب قايل .. تراي مانيب محلل :D ..
[/CENTER]

جزاك الله خير يالصباخ
. لكن تراي وصلت الى الموقف الرابع واذن المغرب ونعاود عقب الصلاة ابقوا معنا والسلام .

قلته,,,,,,,,,,,,,,,,,,,,,,,,,,,,,,,,,,,الله يصلحه
بل العكس هذا أحترم لي ولد درتهم
طيب وين الهيئه:confused: :confused:

شكراً حنايا على هذا الإطراء ..


بالنسبة للي قلتيه هالموقف .. مثله كثير تصير .. إما معي أو مع غيري .. ومثل هالمواقف كثيرة .. لكن الشكوى لله .. سوء التربية وضعف الوازع الديني هو السبب في وجود مثل هذه المواقف ..


شكراً لإضافتك ..

وننتظر بقية الحديث ..



:) ..











شكراً يا ألبي ..


احتريك بعد العودة .. لا تبطي علينا ..

ترى الردود واقفتن عليك .. محدن يبي يرد إلا عقب ماتجي :rolleyes: ..


ياحبيلك بس ..

الله يعافيك يا ألبي ..

يللا تراي أحتريك .. لين تكمل الموضوع .. همن ترد مرة ثانية .. لا تنسى ..


:cool: ..








مافهمت شيء والله :confused: ..


ممكن تعيد صياغة الرد من جديد .!

لأني والله مافهمت :) ..

اعوذ بالله
والله يا انا تعبت من القراية

يا خي بنات هالوقت اعوذ بالله

بعضهن ما عندهن حيا ابد

لكن الله يرحم الحال

شكرا لاختصارك الموضوع:d : 12

الصرااحه الموضووع مهم

لا ويقهر القلب

بس تصدق هذي من هيبتناااا

بس ولو يعني صار الحجاب على المراءه بوجود السعودي

والمواقف كثيره

وخذ من مواقف الخياطين لا دخلت غطت وجهه الله لا يبلانااا

يسلموو الصباخ على الموضووع الراائع

بس صدق أخوي دلوووني

لا زم تنحنح لدخلت محل لانك انت سعودي ...


بس أنـا

يووووووووووه ..!
تذكرت النخيل بلازا، قسم بالله الحريم يحومن التسبد ياجماعه يانا أكره الوحده لين طلعت عيونه ولبست مخصر ومكياج ومسكره وكحل وروميل عيون!!
عالم تعبانه !!
من غشنا فليس منا :D
هذا اللي أقوله لهن خخخخ
عليهن أشكال بالعباه انما ايه بس لاتفتش ترى بتحوم تسبدك..!
لأنه حاسه بالنقص ورايحه تحاول تظهره بالعبايه والمكياج
والا بعد قلبي هن اللي عليهن العباه الفضفاضه ذولي السنعاة وكل الزين بهن ولين جتك لابسه دسوس يدين زوود ترى هذي اضمن ضمان انه تطق اللي بالسوق كلهن بالزين..
أدري إني طلعت عن الموضوع الأساسي لكن هالكلام مبطي وهو بالقلب وودي أقوله
نسبة الإسترجال عند الحريم بزياده يعني لين رحت مع خواتي أنا من النوع اللي ما أغض البصر عن اللي متنقبات حاطه مكياج والا ماحطت ماقامت عندي ولا قعدت ..لأني أدري إنه بدي بس والا الوجه اضمنه ضمااااااان ماتفرقه عن مقفــ..........:d

سلاااااااااااااامي لكاتب الموضوع وللي مايتنقبن!!

ههههه يعطيك العافية كوارث الله يخارجنا من العالم المتخلف انهم نص سعودي ونص الله واعلم

سبق طرحت موضوع نفس كلامك على هذا
( حصلي موقف محرج في سوق الداخلي هام جداً للأهمية يوجد صور...!!! )

ياهلا والله بالصبابيخ كلهم :)

هذا شيء مشاهد ومعلوم ..
يقول أحد الأقارب وحنا راجعين من بريطانيا كل الحريم فاتشات .. وقبل نوصل جدة عينك ما تشوف إلا السواد .. !!
عموما هذا شيء متوقع من أناس أخذوا هذا الأمر وراثة وعادة لا تدينا ..

قبل أن أغادر .. أحب أن أصحح معلومة ..

موريشس الله يسلمك تقع في المحيط الهندي ، تبعد عن شوائ أفريقيا الجنوبية الشرقية حوالي 2000 كيلو , وعن مدغشقر حوالي 800 كيلو وهي أقرب يابسة إليها ..

يعني وينك ووين ماليزيا .. لكن زين انك جبتها بصيغة التمريض (الظاهر) :)

تقبل تحياتي ..

جزاكالله خيرا؟؟؟






[؟؟؟؟.....؟؟؟؟؟al5taf-111@hotmail.com???????.......??????????[/]

الله يهـــــــــــدي بنـــــــــــات المسلميــــــــن00
هالبنـــــــــات مــــــــاخــــــــافن من رقـــــــــابة رب العـــــــــالميـــــــن!!





000000000

عــــــــــــالم متخلف

اخذوا العبايه عــــاده مب عــبــاده

بس ترى هذا قليل الحمدلله ..

صحيح انه مشكله بس بنظري مـــــاله حل الا الخوف من الله

وبعدين كلامك يالصبااخ غريب كيف تناظر وحده تسبح ولاتغض عنه <<<كلامك متناقض جدا

وين غض البصر:confused:

وفيه فرق واحد بين السعودي والاجنبي او العربي ان السعودي يناظر واللي غيره مايلتفت حتى ..
بس مو معناته البنت تفتش عند الاجنبي ...يعني هي مشكله عند السعوديين يبي له حل ليش يحبون يناظرون الحريم؟؟؟؟

شكرا اخوي الصباخ على هالمواقف المفجعه بصراحه ...

ما شاء الله وتطلع للخارج بع

السلام عليكم....
أشكرك على الطرح الأكثر من رااائع... مع بعض الملاحظات!
.................................
بغيت اوضح شيء للنساء:
ترا الرجال ((السعوديين)) بكل مكاان حول العاالم، والأجاانب بعد!:(
...................................
شيء آخر:
في أغلب المواضيع يخرج الأعضاء عن الموضوع الأساسي..وخصوصاً إذا أحسوا بصدق الكلام وانطباقه، لكن شيء جميل النصح والتذكير بطريقة( لبقة)، مع تذكر أن الإنسان قد يتغلب هواه على دينه ولكن مع الرجوع والتوبة وتحكيم العقل ينصلح الحال بإذن الله>>>>لكن ترا مو عذر لبعض الرجال وخصوصاً إذا قالوا النظرة الأولى لك :eek: ما يغمضوون أبد علشان ما تحسب نظرة ثانية خخخخخخخخخخخ:D
..............
آسف على الإطالة ومووضوع جميل نأمل الاستفاده منه : 12
اللـــــــــــــــــــــــــــــــــــه يصلــــــــــــــــــــــــح الحــــــــــــــال

مشكور عالمجهود الرائع

اخوي الصباخ
بارك الله فيك ونفع بك ولك
الحقيقة انه واقع مؤلم وكثير ما يحصل للشخص مواقف في كثير من الاسواق (تضرب معه الفيوز ) ويضيع وشوله هو رايح للسوق من القهر والحزن والهم والغم لحال هؤلاء النسوة رحمة بهن ورئفه لحالهن وما وصلن اليه من تساهل في الحجاب (عند الاجنبي )
اين المحارم ... اين الخوف من الله .... اين الغيره
والله لو اردت ان اسرد القصص والمواقف التي حصلت لي لمللتم من القراءة ولذلك لذهابي برفقه الاهل للسوق وكثيراً ما تخبرني زوجتي بتغير نفسيتي قبل ان ننتهي من الشراء وما ذاك الا حزننا للواقع المؤلم والتصرفات القاصمة التي تحصل من بعض النساء هداهن الله وستر عليهن
موضوع رائع
وبنفس الوقت يبث الاسىء والحزن في النفوس ...
نسأل الله للجميع الهداية والستر والعفة

والله العالم حماس ..

عاد تدرون .. توي طالع من الاختبار .. وأنواع الروقان .. ويوم اكتب الموضوع كنت أدرس .. وأخذت فسحة لمدة ثلاث ساعات ..

تعرفون من كثر الدراسة .. مليت .. همن كتبت الموضوع .. ورجعت مرة ثانية للدراسة ..


وهذا توي طالع من الاختبار .. يارب إني أنجح ..


قولوا آمين ..


:cool:

أنا مانيب أقرقرك أبد .. كل التعب على الكيبورد ..

:D ..




أعوذ بالله .. صارت تتغطى علشان البنغالي مايعرفه أو اليماني .!


يعني ماصارت تتغطى علشانه تخاف من الله .!


أعوذ بالله .. نسأل الله السلامة والعافية ..




يارب إنك ماتصيرين مثل هالبنات :rolleyes: ..



كد سافرتي برى ؟!

اللي يسافر برى .. ويشوف المسبح كل مليان عالم .. يدري إني يوم قلت إني برتاح .. المقصد إنه مافيه زحمة ..

يعني يوم كان فيه رجل وحرمة .. اعتبره كان فاضي ..


أضيفي أيضاً أن المشهد كله .. ما استمر أكثر من دقيقة واحدة ..

بس تعرفين الكتابة .. تحسسك إن المشهد له نص ساعة ..


أيضاً .. أنا يوم كتبت هالمشهد .. متوقع مثل هالرد .. ولو إني خايف من ردك .. ما كان حطيت هالمشهد :) ..


فهمتِ .!


ماقلت إنه عاجبن الوضع ..

أيضاً المشهد كله ما استمر أكثر من دقيقة ..

يعني دخلت .. البنت اختبصت .. ولفت روحه بالفوطة .. وطلعت ..

أنا جلست بشوف وش راح تسوي بس :) ..

بس كذا ..

ولا يعني قولتي إني جلست أشوف وش راح تسوي .. إني مبقق عيوني .. وقاعدن أشوفه تتلبس أو غيره ..

بس مجازاً ذكرت هالكلام ..



أما بالنسبة للمطاوعة ..

فأنا .. أولاً: مانيب مطوع ..
ثانياً: لا أمثل المطاوعة ..
ثالثاً: أنا أمثل نفسي .. ونفسي فقط ..


فهمتِ .. فلا تقولين مرة ثانية .. يامطوع .. أو ياشيخ ..

أنا لا أمثل أحد .. أنا أمثل نفسي فقط ..





العفو ..















يارجال .. بلاوي هالحريم .. الله لا يبلانا ..

بعضهن .. تعتبر البنغالي أو السوري .. أو غير السعودي بشكل أصح .. محرم له ..

والسبب سخيف للغاية .. تقول هذا مايعرفن .!

أنا أبي أعرف من وين جايبين هالفتوى الحريم .!

الدين مافرق بين سعودي أو غيره ..

الدين يقول حرام على الرجال الأجانب .. ماقال على السعوديين بس .. وغير السعوديين حلال ..

مشكلة والله ..


شكراً دلوني على المداخلة ..

يعطيك العافية يا ألبي ..

يارجال مساكين راعين الليموزينات ..


معاناة والله .. لي صديق لي يقص لي قصص تحدث لهم .. والله إنه تشيب الراس ..


وأهم شيء إنه يلبس بدله ولا يلبس أبداً ثوب أو شماغ ..

ولا يتكلم علشان مايدرون إنه سعودي ..

بس الله يستر ..



شكراً يا ألبي على المداخلة الحلوة ..





تشكرات كتير ..


















الدين ياشيخه حبر شفاف .. مايفرق بين سعودي أو عربي أو غيره ..


الدين يقول الرجال جميعاً .. وإلا لو فيه فرق بين السعودي والأجنبي ..

كان جاء الشرع وقالنا كذا :) ..


شكراً لمداخلتكِ ..


شكراً جزيلاً لكِ ..

يارجال ماشفت شيء ..

أنت لو تسافر برى السعودية .. تبي تشوف البلاوي ..


الله يحفظنا بس ..


شكراً يا ألبي على قراءة الموضوع حتى نهايته ..


تشكرات كتير يا ألبي ..













أنت هيبة لأنك سعودي ..

ياخي تصدق جازت لي :D ..


توي أفكر به .. صدقت والله .. شكل الدعوى هيبة :D ..


بس تبي الصدق .. مافيه مكان وتدخله إلا لازم تنحنح .. لأنك رجل ..

واللي داخل المحل .. إما باكستاني أو بنغالي .. أو غيره .. موب رجال بالنسبة لهالحريم .!


غريب تفكيرهن هالحريم والله .!



تشكرات يا ألبي على التعليق والتعقيب ..

جميل هو ماقلته يادلوووني ..

وتبقى التربية والدين هي الفاصل والفيصل في مثل هذه الأمور ..

اللي عنده دين وتخاف من ربه .. هي اللي راح تتغطى بأي مكان .. ومهما كان اللي قدامه ..

واللي ماتخاف ربه .. إذا شافت الناس غافلين عنه .. فتشت وطلعت مع فلان وطلعت مع علان ..


صديق لي يعمل ابن عمه في السفارة السعودية في أمريكا .. يقول نتلقى يومياً العشرات من الشكاوي لطالبات سعوديات تعرضن للاغتصاب .. والسبب ماهو .!

غياب المحرم .. والسفر لوحدها للدراسة في بلد كفار .. التبرج والسفور .. وإلى ذلك من الأمور المخلة ..

شكراً لإضافتك يا ألبي ..












هلابك يا حلو ..

هلا بالحلوييييييين كلهم ..

هلا حبيبي أبوإبراهيم ..


يا ألبي وين اللي تقول عنهن ذولي .!

ماشفت منهن شيء .!



دامك سعودي .. حرام تشوفه .. دامك غير سعودي حلال تشوفه ..


ooo1 ..

(( كل أمتي معافى الا المجاهرون )) أوتسمع

نحتريك يا ألبي ..


بإحتراء مشاركتك القيمة ..




:cool: ..











كلام عين الصواب ياهيمووو .. واللي تقوله ياكثر ماشفناه ..

قسم بالله إن الخشة خشة عنز .. بس هماه حاطن اللثمة .. أو حاطن البرقع .. ومكحلة العيون ..

والشباب مساكين .. ماغير يتساقطون أمامها .. ولو يشوفون الخشة .. كان صارت علوم :cool: ..


ومثل ماقلت .. اللي تسوي كذا .. هذا دليل على نقص فيها .. ولو هي واثقة ماسوت هالسوات ..

بعدين أكثر اللي يتبرجن .. قليلات أدب .. ولو هن محترمات .. ويخافن الله .. ماسون هالسوات ..




تشكرات كتير على المداخلة يا ألبي ..

الله يعافيك يا ألبي ..


تغطوا يابناااااااااات .. جاكم سعودي :cool: ..


شكراً على المداخلة يالهامور ..












الفكرة ليست مثل ماذكرتها في موضوعك أنت :) ..

لكن الهدف واضح وواحد ..


شكراً قمردين ..

هههههههههه موضوعك حلوه والمواقف مضحكه

كلامك رائع وجميل ما سطره قلمك الذي اتحفتنا به

يارجال .. ياكثر اللي أخذن العبادة عادة وليست عبادة ودين ..

ولو تطلع برى السعودية .. كان تشوفهن .. وما أكثرهن ..



تشكرات كتير على التعليق الحلو ..


بالنسبة لموشيز .. تراي قلت أعتقد .. يعني لا تدقق وأنا أخوك :D ..













مهناش سعودة وأنا أخوك :D ..


بالنسبة للي قالته حبر شفاف .. لا يعني إن كلامها صح ..

الإسلام مافرق بين العربي أو غير العربي .. ولا فرق بين السعودي أو غير السعودي ..


الإسلام يقول كل الرجال .. بلا استثناء ..


وإلا لو الدعوى سعودي أو غيره .. أو عربي أو غيره ..



صديق لي يعمل ابن عمه في السفارة السعودية في أمريكا .. يقول نتلقى يومياً العشرات من الشكاوي لطالبات سعوديات تعرضن للاغتصاب أو التحرش من أمريكان :) ..


يعني الدعوى مهيب سعودي أو غيره ..



شكراً لك يا ألبي ..

جزاك الله خير أخي الصباخ على هالموضوع

شكراً لك ..












تسلم يا ألبي على ردك ..


أنت ماتدري إن بعض الحريم يتغطن علشان السعودي بس .!

الدين للسعودي بس :) ..



وبعضهن موب علشان كذا .. بس علشان البنغالي مايعرفه .. والسعودي يمكن يعرفه .!


ولا كأن فيه شيء اسمه دين .!



سعودي تتغطى عنه علشان يمكن يعرفه .. بنغالي ماتتغطى عنه لأنه ماراح يعرفه .. أنا أبي أعرف من وين جابن هالدين .!


صدق إن بعض الحريم ماعندك أحد :) ..



شكراً يا ألبي على المشاركة الحلوة اللي زيك :cool: ..

من جديـد أهلاً بــ..صبحنا.
 

لا حول ولا قوة إلا بالله ، أنا ماقلت إن الراحة يوم شفت وحدة تسبح ، لكن الفكرة اللي يشوف المسابح برى السعودية ، يلقاه مليانه ، وإذا لقى واحد أو إثنين بالمسبح ، طلع إبداع وفلة لأنه فاضي .

بعدين أي حياء اللي تتكلمين ، اللي يسمعك يقول مسوي بلى أنا ونايمن مع البنت .!

بالنسبة لصديقتك تالي حياته موت ، وموضوعه اللي انحذف أنا ردي فيه ناسيه لذلك إذا تذكرت الرد قلت لك وش أقصد :) .





الموقف لم يستمر دقيقة واحدة ، وين المتابعة .!

والنظرة الأولى لك ، أما النظرة الثانية مهيب لك .

بعدين الأوروبي ، منسدح ومتمصلخ ولا دري عن الموضوع اللي صار كله :) .







لا تغيرين مسار الموضوع لأشياء تافهة .

شكراً لكِ على هذه المشاركة .


هالمواقف ياأختي الكريمة ، هي لنساء لو هن يخافن الله ، ماقلت لكم هالمواقف .

وهن الله يصلحهن أخذن العباءة عادة وليست عبادة ، ولذلك تلقينهن يفتشن عند الأجنبي ولا يفتشن عند السعودي .

والحل مثل ماقلتي الخوف من الله .


النظرة الأولى لك :) .




السعودي صحيح يناظر السعودية .

لكن الأجنبي يناظر الأجنبية ، وجرائم الاغتصاب والتحرش الجنسي في الدول الغربية لهي دليل واضح وصريح على هذه المقولة :) .


يعني كل واحد يناظر بنات جنسه :) .










:D الله الله ، أطلع برى .

.
.




.
.

الله يصخرلهن
ماقول الله يهديهن

عتريس .. عتريس .. عتريس ..

ياحبيلك بعد .. وتشكرات أول شيء على المرور والتعليق ..

ثاني شيء: ترى النظرة الأولى وأنا أخوك لك .. يعني لا تغمض .. علشان تبتل نظرة أولى :D ..

ثالث شيء: الأعضاء اللي تقول إنهم يخرجون من صلب الموضوع .. ياكثرهم وهدفهم هذولا زعزعة الموضوع .. وإثارة البلبلة والشوشرة في المنتدى بشكل عام .. والموضوع بشكل خاص ..



:D شكراً لك يا ألبي ..

















العفو ..

الله يصلح حال الجميع ..

شكراً لك ..
















العفو .

شكراً لك أخي الكريم ، وأنا والله من أحد الأشخاص الذين يكرهون الذهاب إلى الأسواق ، والسبب ما نراه من المشاكل والبلاوي .

نسأل الله السلامة والعافية .

بعض الحريم الله يصلحه ، ماخذه الحجاب موب دين ، ماخذته عادة :) .


شكراً لك .












صدقت أخي الكريم ، لكن أنت ماودك تدخل في مشاكل أنت في غنى عنها ، وبالذات إذا صار الواحد ظاهره عادي جداً وليس ملتزم ، فهذا تجده إذا تكلم أو أنكر ، قالوا له شف روحك همن تكلم .

شكراً لك .












والله يا ألبي ، أنا ماكد شفت الحريم اللي ما همهن السعودي ، كل اللي نشوفه أو يشوفونه الشباب أو الرجال ، سعودي حرام يشوفك ، أجنبي حلال يشوفك :) .

شكراً لك ، والله يحفظ الجميع .

:D ياحبكم للفلسفه .


بعدين خويتك اللي بالجامعة هذي ، ماتخاف ربه ؟

عيب اللي تسويه والله .


بعدين أنا ماسويت شيء غلط :D .

زين .











:D :D .

وراكم علي .!

تراي ماسويت شيء أنا :D .

العفو .

شكراً لكِ .














الخوف من الله هو الرادع لكل شيء في هذه الحياة ، واللي تخاف الله راح تتغطى بوجود سعودي أو غيره .

ومثل ماقلتي حتى نظرات الأجانب تخوف ، والله إننا نشوف نظرات الخبث في عيونهم ، لكن بعض الحريم الله يخلف عليه بس :) .

شكراً لكِ ..

بالنسبة لماقلتيه من موقف في برج المملكة ، صحيح في مثل هذه المواقف ، وأحد أصدقائي كد صارت معه نفس السالفة .

لكن ، العالم والظاهر والواضح ، إن هذا سعودي حرام ، وعاد إذا صار مطوع تكتمل ، أما الأجنبي فعادي جداً :) .


شكراً لكِ ولإطرائك .













جزاك الله خير .














وعليكم السلام ورحمة الله وبركاته .

شكراً لإضافتك يا سعفونه .

شكراً لكِ :) .

















شكراً لك أخي الكريم :) .