|
موقف حصلي بمعارض الشفاء بالرياض
http://up.arb-up.com/i/00105/w4djtq8zghmo.gif
شلونكم المهم ما ودي أطول يوم من الأيام و تحديدا قبل تقريبا 8 أشهر رحت للرياض أدور سيارة و كان ببالي هوندا أكورد و رحت أدور و مليت و طاحت عيني على هوندا أكورد لون أسود رحت لم صاحب السيارة و كم سيمت ومن هالكلام طبعا كانت تسام 37000 ريال و زودت أنا إلى 38000 ريال و فجأة طبوا الشريطية الله يهديهم و يبدون يزاودون أنا أزود معهم وصلت السيارة 43000 ريال و يوصلونه هم 46000 ريال أنا بسرعة سحبت نفسي و تركتهم صاحب السيارة صوتلي ,, و أنا تسني ما أسمعه طبعا الكلام هذا كان العصر بعد صلاة الأخير ( العشاء ) رحت أدور بالمعارض و الصالات و لقيت نفس الأكورد دخلت المعرض ,,, تدرون من لقيت لقيت صاحب السيارة قاعدن على مكتب بالمعرض و الشريطية إللي يزاودون معي كان موجودين بنفس المكتب سألت العامل اللي بالمعرض قالي إنه أخو صاحب المعرض و إن السيارة سيارة أخوه جاه حادث مع ورا و صلحه و له 3 أشهر ما بيعت ... إش رايكم بالله شوفوا النصب يزودون السعر و هم موب شارين ,,, يبونن أزود و اشريه الصراحة بعض الشريطية محترم و نصووووووووووووووووووح و البعض الآخر أو الأغلبية (( الله المستعان )) و هذي القصة جزاكم الله خير آآآآسف ع الإطالة |
نمرود :
أشكر مرورك ,,,,, و الموضوع عام موب خاص بك أنت الصخرة : جزاك الله خير و شاكر مرورك ... الموضوع قصة موب نكته الغامض : أشكر مروووووووووووووووورك و جزاك الله ألف خير نمرود + الغامض : لا تهاوشون علشان موضوع :071: |
أخـوي محمـد هذا اسمـه على ماضن نجش مـدري شجن الوكاد حول تسذا خخخخخخخخ لـكن الله يفكنا من شرهـم صارٍت معي ذي وحسيت ان فيها نصب وحتيال مشيت والكلام هذا بمعارض بريدهـ ومعرض مشهور ومعروف كلن يثق فيه بس للاسف الشريطي ينصب على اخوهـ بس اهـم شي يكسب ميتين ريال |
الحمد لله على السلامة والافكاك منهم هذولاء ناس ما يخافون الله عسى الله يهديهم او يهلكهم ما غش اغلب المساكين الا هم انا اذكر كنت اببيع سيارتي وجاني رجال و نشب بحلقي وانا شاك انه شريطي المهم قعد يحلف لي ايمان مغلظه انه مب شريطي وانه مستعجل يبي سيارة له ولعياله ولا يمكن يبيعه انا صدقته وخصوصا بعد الحلف وبعته له بمبلغ مقتنع فيه جيت بعد اسبوعين اثر الرجال صاف مع الناس يبي يبيع سيارتي انا على طول دعيت عليه وقلت الله لا يوفقك لا دنيا ولا اخرة وان شاء الله تصيبك مصائب تخسر كل ما عندك وهذا حقي واما حلفانك الكذب فهذا امره عند الله لكن شف الكذب والغش والاحتيال على حلال الناس لا وفق الله من لا يخافه |
اقتباس:
مشكور و ما قصرت |
من الجماعة :
كلامك صحيح ,, ألحين صار الحلف بلاش عند الشريطية أنا ما أصدق أي شريطي ,,,, أحيانا يحلف إن السيارة ما به شي ,,, لكن ما أصدق أروح أفحصه مشكور و جزاك الله خير |
هذا بيع النجش وهو محرٌم ولكن ينبغي الحذر عن شراء اي سياره ويجب عرضها على اصحاب الخبره بالسيارات حتى لاتنخدع هؤلاء ناس لايخافون الله اخذو الدنيا حب المال والاكل الحرام استغفرالله العظيم |
ضايق الصدر :
الله يوسع صدرك إن شاء الله أشكر مرووووووووووورك و جزاك الله خير |
اذا رحت للمعارض خذ معك شريطي احسن
علشان يعرف لسيارات صح |
الحمدلله ماعمري شريت سياره مستعمله مو علشاني تاجر لاوالله طفران بس الله يعز الاجار منتهي بالتمليك وريح راسك من الشريطيه
|
غريب إحساس :
كلامك صحيح و بإذن الله موب رايح إلا مع شريطي /// لكن ما أعرف شريطي عاشق الكامري : الأجار المنتهي بالتمليك و الأقساط وجع راس أزين أشري موديل 2003 مستعملة كاش و بدون ديون و لا أشري 2010 أقساط و تسديد ما تستانس بالراتب الله يجزاكم خير |
انا مره شريت من معارض الشفاء بالرياض كابرس ss96 والمهم الموتر وقفه وفيه هاك الملتحي بالسياره(ابويمن) عليه هالغتره وحركات .. المهم واجيه قلت كم سيم قال 10000 وزاودت انا يوم جلست شوي ويجون هاك الشريطيه مدري كم ويزاودون معي الين وصل12الف وشريته يوم اتضح لي بعدين انهم كانوا شريطيه متفقين وصاحبنا اللي بالسياره تبعهم واثر الموتر كسره ومايسوى والله وابيعه من بكرا بـ5000 الله لايوفقهم ميخافون الله..
|
الله يعوضك يا ( أبو بدر )
شاكر مروووووووووورك |
مرحبا محمّد ..
الحمدلله على سلامتك .. سلمّك الله من مشاكل معارض الشفاء :) أنا صار لي موقف قريب من موقفك قبل أربع سنوات لكن الله الحافظ والستّار .. طلعت من المعارض للوكالة مباشرة :) كانت تجربة أولى وأخيرة بإذن الله .. تحياتي لك |
| الساعة الآن +4: 12:04 AM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.