|
تعااالو أسمعوا قصتي مع اللي تأجر الشغالة . . . !!
السلام عليكم ورحمة الله وبركاته
اسعد الله اوقاتكم بكل خير اخواني أخواتي ابدخل بالقصة على طول أتصلت على وحدة من قريباتي قلت له ألحقي علي أبي شغالة آجار يومي بيتي حوسه وانا توي طالعة من نفاس لاتقولون انتي رتبي بيتك ! انا بكرية و والدة قيصري ما أقدر أشيل ثقيل وإذا أشتغلت توجعن عمليتي وحالتي حاله المهم أعطتن عدة أرقام من بين هالأرقام وحدة أسمه أم فلان . . . لكن ما تعطيه اي أحد قولي له أنا عن طريق أم عبدالله صديقتك بالحلقه أو دار القرآن وأنا اتصل به واعلمه انك من طريقي أتصلت عليه سلام عليكم > > << وعليكم السلام كيف الحال طيبين وقلت له : أنا فلانه ذكروا لي أن عندك شغاله أنا من طريق أم عبدالله قالت من طريق أم عبدالله ياهلابك المهم سألته بكم تأجرين الشغالة اليوم قالت 150 عاد قعدت أكاسره يا ام فلان خفضي لي السعره وآخذه منك كم مره وأبدأ أتعامل معك ومن هالكلام عاد هي قالت : والله يا أخت عندي مسؤلية وما أقدر وتعرفين وبالأخير قالت ب 140 المهم رحت اجيب الشغالة وأتصلت أقوله وصفي لي أنا بالطريق طبعا في حي شعبي ويوم وصلت قلت ابيك عند الباب ابعطيك الفلوس طلعت بنته تأخذهن ! ! انا أستغربت ليش ماطلعت لي ؟! لكن وانا كنت غاضة بصري شفت او لمحت منزلهم شعبي وصغير وهم أسره كبيرة وماشاء الله تبارك الله وكثارين الله يحفظهم أخذت الشغالة ورحت للبيت وكان الساعة 10 بالليل قلت له أشتغلي شوي وبعدين نامي وقومي الصباح كملي شغلك وأنا أرتب أغراضي فيه ملابس وأشياء حبيت اتصدق به بعضه جديد جاي لي هديه وما أحب اجمع عندي خلاقين أتحاسب عليهن عند ربي لكن ! مادري وين أوديهن ؟! أتصلت على قريبتي اللي دلتني على الشغالة وقلت له ماتتوقعين أن صاحبة الشغالة تقدر تأخذ الملابس أو تصرفهن لي تعطيهن أحد قالت : ألا والله هل هن نظيفات ؟ قلت : بعد فيه شيء جديد قالت : عطيهن أياه تصرفهن لميت أغراضي ورحت أرجع الشغاله ويوم وصلت بيتهم دخلت الشغالة وصبرت شوي بعدين أتصلت وقلت أم فلان أبيك عند الباب بأعطيك غرض طبعا بتقولون ليش ماحطيتهن ورحتي ! فيه شيء لازم أحطه بيده ولازم أحرصه فيه ملابس تبي تستير وملابس شفافه وما ابي يدخل ذمتي شيء فتحت لي البنت الباب ! ! قلت أبي أمك ! ! قالت : أمي أمي وتعلثمت وقالت أقوله شيء قلت ابكلمه قالت : طيب دقيقه ودخلت وجلست شوي بعدين قالت أدخلي له ! ! قلت ماتقدر تجيء قالت : لا تعبانه دخلت عند الباب وانصدمت امهم جالسه على ركبه وشكلهم هم شايلينه وحاطينه هنا سلمت عليه وعطيته الأغراض والله لو تشوفون دمعة الفرح الله يرزقهم من واسع فضله وقلت له سلامات ياخاله وش فيك ؟ قالت : حادث يابنيتي قبل 6شهور ورجليني منكسرات ودعته وقلت سامحيني ماكان ودي أدخل وأزعجك قالت لا والله عادي تعالي متى مابغيتي قبل ما أطلع طاحت عيني على الأرضية وش تتوقعون ؟ ! رخام ولا سيراميك ؟ ! لا والله يا أخواني صبة سميت وفيه قطعة سجادة بطرف الصاله وربع جلسة ارضية والسقف متهالك والبيت صغير وشعبي الله يرزقهم من واسع فضله خنقتن العبره وعجزت أتكلم خاصة يوم شفت البزارين قبل ما أمشي يفتشون بالاكياس والبنات الكبار يبعدونهم والله منظر حزين والحمدلله على كل حال قلت له توصين شيء تحتاجين شيء قالت سلامتك ركبت السيارة وانفجرت ابكي يارب ترحم ضعفهم وش قصتهم ؟ ! أتصلت على قريبتي وقلت له وش قصتهم ؟ قالت : أسمعي يوم سألتين بقولك ترى الملابس ابيها لهم وهذي المرأة زوجها تزوج ثانيه وتركهم مرةوحدة ولايعترف بهم ولهم هالبيت الشعبي وبعد الله يكرمكم يخر عليهم وسخ اللي فوقهم وله ولد متزوج عنده عيال لكن راتبه 1200 وله بنبات وعيال ماتزوجوا وكم بنت مطلقة وعنده عيال وحالتهم حاله قلت والشغالة : قالت أقترضت ( تسلفت ) مبلغ وقدمت وصارت تسدد من هالآجار وحتى الشغاله تحن وترن تقول اطلع منا ومنا ومايعطوني الا راتب 800 بس قلت احمدي ربك سيرلنكا 400 قالت اندونيسيا كله شيء غالي ............... وقالت : وقبل 6شهور صار عليهم حادث أنكسرت رجوله وبعضهم فيه أصابات وجروح وراحت السيارة تشليح انباعت ب4الاف وزودهن ناس من اهل الخير واشتروا سيارة صغيرة مستعمله وقالت : وإذا كان باقي عندك أكل أو عشاء نظيف تكلمينهم يجون يأخذونه وبعد كذا ضاق صدري وبديت افكر ان الانسان حتى يقتنع بالدنيا لازم يناظر من هو أسفل منه ويحس بغيره من المحتاجين وجلست أتذكر حديث الرسول _ صلى الله عليه وسلم _ الذي فيما معناه ( من بات آمن في سربه معافى في بدنه عنده قوت يومه فكأنما حيزت له الدنيا ) أسأل الله أن يصلح أحوالنا وأحوال المسلمين ويرزقنا وإياهم من واسع فضله انتهت القصه أختكم وردة حمراء اللهم أكفني بحلالك عن حرامك وأغنني بفضلك عن ماسواك اللهم أقنعني بما رزقتني وأرضني به وأخلف علي كل غائبة بخير . |
شكرا لك ياورده حمراْء ياليت توصفين لي بيتهم...... وأي حي هم يسكنون....... ومشكوووووووووووره ماقصرتي.
|
الله يرزقنا وياهم الرزق الحل ويوسع علينا وعليهم يارب
|
الحمدلله والشكر
اللهم اغنهم بحلالك عن حرامك |
الأخت الكريمة , شكراً على هذه القصة الصريحة , المحزنة , والمرسلة لمن من الله عليهم بأموالً وبنين .. آمل التكرم بمراسلة الأدارة { المشرف العام }وتبليغة بالتفاصيل , وانا بإذن الله سوف اقوم بما اوجب الله علي من حق ممن لهم الأيادي البيضاء تجاه هذه الأمور . والسلام عليكم . |
الانسان في امور الدنيا لابد ان يرى للذي هواقل منه ليعرف النعمة التي وهبها الله له ويقتنع بالمكتوب له
لكن في امور الاخرة لابد ان يرى للذي هو افضل منه ليكون حافز له لعمل الخير .... هكذا علمتني الحياة جزاك الله خيرا |
الف شكر اختي ع المعلومه والله يرزقهم والمسلمين اجمعين ..
|
يآكثر العوآئل الفقيره المتعففه .. اللهم اغنهم وكن لهم .. .. |
شكر الله كلامك الراقي واسلوبك الرائع
ولي قصه مشابهه قريبا اشكرك دمتي بخير فارس |
جزاكم الله خير أخواني وأخواتي أسأل الله أن يرزقهم من واسع فضله |
مشكووورة اختي وردة حمراء ع الموضوع اللي بجد يكسر الخاطر
وعلى فكرة كثير من العوائل عايشين كذا هالعائلة يمكن وصلتي لهم بالصدفة لكن الباقي ما احد يعرف عنهم شيء. من بات آمنا في سربه عنده قوت يومه فقد حيزت له الدنيا بحذافيرها ,,, تقبلوا مروري. |
الله يرزقهم من واسع فضله فعلا الشخص مايحس بالنعمة إلا إذا فقده أو شاف أحد فاقده مشكوره |
اقتباس:
احمدن الله على العافيه وعملن ببيوتكن بدون عاملات فالشغالات مامنهن الا المشاكل فمشاكلهن تفوق محاسنهن واتقن الله بانفسكن وهذه الحالة تحتاج شغالة لضروفها الخاصة فمن منكن لديها نفس هذه الحالة فلتستقدم شغالة وغيره فلا . من كثر الراحة والنوم اذا وقف النموا بالطول اصبحت تمنوا اجسادكن بالعرض . |
جــــــزاكــ الله خير على ذكر القصــه واذا ماعليك أمر أرسلي الرقم على الخــاص’’ |
| الساعة الآن +4: 07:42 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.