|
نقطة تفتيش مرور وظلم وسوء معاملة مواطن بريدة امس
بسم الله الرحمن الرحيم
الاخوة الكرام .. ومن يهمه الامر السلام عليكم ورحمة الله وبركاته .. صورة جديدة من صور الظلم تسجلها نقطة تفتيش مرور في بريدة مع عدد من المواطنين والمقيمين .. في يوم الاحد الموافق 2 / 1 / 1432 قبل اذان المغرب بقليل الموقع .. بريدة .. شارع الاربعين .. اذا صارت صناعية السليم ومحلات زينة السيارات يسارك يجي اشارة تقاطع الاربعين مع ش الامير فيصل بن بندر ووجهك باتجاه دوار الزراعي .. بعد الاشارة في المنعطف تجي نقطة التفتيش المقصودة ( معروف مكان هالمصيدة .. قصدي النقطه ).. المهم امس الاحد حصل موقف يقهر مرة .. تم توقيف بعض الشباب .. بانتقائية تامة .. يعني يختارون .. ما ادري وش مقياسهم للمخالف المهم بعد تجمعنا على العسكري لاخذ مخالفاتنا .. ( اغلبها تظليل ) لاحظنا عدم ايقاف مخالفين علنيين واسوا منا وفيهم شباب صغار وكبار وسياراتهم مكتومة تظليل اسود بالكامل ... بدأت اصواتنا تطلع .. ليه هذا ماتوقفونه وهذا وهذا المهم مر حوالي عشر سيارات كلها مخالفة .. ويمشيهم العسكري بدون طلب ولا حتى اثباتاتهم .. الامر الذي اغاضنا صراحة .. وارتفعت اصواتنا ورحنا لاحد العسكر وماعطانا وجه .. والثاني يقول هذي التعليمات .. ( اي تعليمات تمشي ناس وتخلي ناس ) .. المهم .. قام احد الشباب ( مشكور ) بتصوير هالوضع لعرضه على المسؤولين علشان لما نقدم الشكوى يكون هذا الاثبات .. والله لا يحطكم مكانه .. تجمعوا عليه وتركو نقطتهم ( اللي في بطنه ريح مايستريح ) وبدو يسحبونه هات الجوال واركب السيارة .. الرجال بدا يدافع عن نفسه ويقولهم طيب معي بزر بالسيارة لايشوفكم تسوون بي كذا وينخرع .. ولاهمهم ركبوه السيارة غصب وبكل عنجهية صراحة واخذو الجوال ومسحو المقطع .. ولما تأكدو انه اتمسح خلوه يروح بعد ما تطمنو مافيه شي راح يكون اثبات ضدهم عند رفع هذا الامر للمسؤولين .. الزبدة يا اخوان .. الامر لن يتوقف عند هذا الحد .. نبي اي واحد كان موجود في هالنقطه .. للدخول ورفع الامر لمدير عام المرور بالقصيم .. وان لم يتم التجاوب والتحقيق معهم .. يتم الرفع لامارة المنطقة .. يمكن احد يجي ويقول انت والثاني والثالث مخالفين ليش تزعلون .. مانقول شي .. لكن لما يوزعون المخالفات بانتقائية هذا يوقفونه وهذا يمشونه .. هذا اللي يقهر والظلم محد يبيه .. ولانستغني عن اراءكم يااخوان وشوركم |
وتسمر المهازل ··
لاحول ولا قوة الا بالله ·· للأسف بعض العسكر لدينا يحتاجون دورات في الاحترام ·· وفن التعامل ·· |
امس مريت ع النقطه واخذت قسيمه لكن المهم في ذلك وهو جالس يكتب لي القسيمه جاء لمه الرقيب وقاله هاه خلص الدفتر ؟ يعني من كلامه خلأص نمشي اخذت القسيمه ومشيت طبعـآ تقريبا باقي بالدفتر 4 او 5 اوراق وينتهي دفتر القسايم اخذت لفـه ماتتجاوز الـ 15 دقيقه رجعت حصلتهم مأشين من النقطه المقصود في ذلك انهم بشكل يومي يحآولون بقدر مايستطيعون انهاء دفاترهم ع حساب جيوب المواطنين المساكين حسبنا الله ونعم الوكيل عليهم |
عطني الذاكرة وازهل الموضوع يالطيب عندي برنامج يطلع اللي محذوف من الذاكرة والا تبي اعطيك رابط البرنامج تحمله وترجع المقطع قل لي وش تبي يالطيب تراني تحت الخدمه اعين واعاون |
الله يعين هذا الي صاير بالمرور اذا معك واسطه تمشي امورك والظلم عيني عينك
والحين نظام الدبل الفاشل والمحرم بعد فيه مشكله انا اخذت مخالفه والعسكري ما سلم الدفتر الا بعد شهر اذا نزل المخالفة بالجهاز على طول تدبل المخالفة لان تاريخ تحرير المخالفة له اكثر من شهر يعني ظلم وبقوة بعد ... المفروض اذا بيكون فيه دبل للمخالفة يكون بعد شهر من تحرير المخالفة بالكمبيوتر ... |
الواضح من الاسبوع الماضي نقاط التفتيش كلها في اماكن مصيده
طبعاً المقصد منها المخالفات تظليل + لوحه هذي اماكن التفاتيش وانت طالع من اشارة العثيم متجه لدوار الدوريات " شرق وانت طالع من اشارة العثيم متجه لاشارة الغذائيه " شمال " نزلة الاستاذ وانت طالع من الافق متجه لدوار الدوريات النهضه قبل دوار شقق الوطن ، امام القيروان و الاخر وانت نازل من اشارة الغازيه متجه لدوار النهضه شارع الاربعين رايح وجاي وكذلك طريق الثمانين وانت باتجاه الكبرى و العسكري حسب مزآجه يوقف ناس وناس لا ! كذا مره العسكري يمشيني و احصل ناس موقفين عشان تظليله ! ومع الواسطه يسلمك اوراقك ويقول تفضل والناس تتفرج =) |
حط معك مجسم (( حرمة )) مغطاء بعبات .... واذا قربت لتفتيش خله يكون واضح وأبصملك بالعشرة راح يمشونك ولا قسيمة ولا يحزنون هذا أحسن حل لمثل هذه الأمور تحايلنا على ساهر مو عجزين نتحايل على كم عسكري (( أمزح لا أحد يسويه يكون تحت طاولة الأرهاب )) |
قسائم ساهره على الطريق الله يعينكم
|
والله لو انا منك يالغالي لاجمع لي كم واحد من الموجودين بالنقطة ولا يردن الا باب الامير فيصل بن بندر حتى مدير المرور اطمره حنى ملينا من لف ودوران العسكر اللي ماتربو وآخذين وظيفتهم استغلال ببعض الامور الشينه المهم ياصاحب الموضوع شد حيلك وخلك قد الموضوع وانت معك حق 100% وجاب الله لك العضو كالفورنيا ولا تنسى تتواصل مع العضو الثاني اللي يقدر يطلع المقطع من صاحب الجوال الي مسحو المقطع منه خلونا نوقف بعض العساكر المستهرين عند حدهم ، ويكون المواطن مهما كان له هيبة. |
إقتباس من رد دربك تدله!/
و العسكري حسب مزآجه يوقف ناس وناس لا ! كذا مره العسكري يمشيني و احصل ناس موقفين عشان تظليله ! [/color]ومع الواسطه يسلمك اوراقك ويقول تفضل والناس تتفرج =)[/quote] وهي على كيف امه يمشي ناس ويخلي ناس قدام الناس << حتى لو محد شاف كان ممكن عادي هزلت والله |
لاحول ولا قوة الا بالله ··
|
لأن موظفي ساهر هربوا من وظائفهم أكيد راح يدجون |
اكيد المرور عندهم اخطاء
لكن امش عدل ولا يهمك الاخطاء في اي دائرة حكومية ,,,,والواسطات في اي دائره حكوميه اخوي انحرم من وضيفة بسبب واسطه عايله معروفه ببريده |
حسبي الله عليهم انا اخذت قسيمه امس اللي بشارع الاربعين
اذا كان اللي ما يعرفه يعطيه واللي يعرفه ما يعطيه يمشيه الله لايوفقه لا دنيا ولا اخره المشكله اكثر اللي يخالفون عساكر من تفحيط ودوران وكل شي وشلون تبي الشباب يعقلون والمشكله بالعساكر |
| الساعة الآن +4: 06:29 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.