بريدة ستي - ((عاجل)) وجود شطب في شمال بريدة قد يؤدي الى زلزال ساعدوني بأرائكم

انا من سكان حي من شمال بريدة طلعت من البيت لصلاة العصر وفجأة شفت قدامي شطب بالأرض كأنه بيت نمل مالقيت له بالي لكن مشيت خطوات والشطب بدأ تزود فتحته وامتدت مسافته مو بهينه رفعت عيوني ابي أشوف نهايته لكن للأسف عقدت حواجبي وماني مصدق اللي قاعد اشوفه المهم مشيت تقريباً مسافة10 متر والشطب نفس مقاسه الأول والى الحين متوقع بيت نمل كبير لين مشيت 150 متر وهو يزود وينقص وانتهى بي المطاف عند شارع 15 قلت الحين أتأكد من وسواسي اذا كان بيت نمل فهو بيوقف واذا كان شطب فهو بيمتد داخل الشارع وفعلاً مشيت لقيت الشارع منقسم قسمين بخط مستقيم موازي للي بالأرض مشيت مسافة تقريباً 200 متر وهو على هالحالة وبالمقابل بالجهة الثانية نفس الشطب بس مو مثل الجهة الأولى اخف شوي طبعاً انا قبل 3 اسابيع في عطلة العيد طلعت رحلة مع شباب لحايل ومرينا قرية من قرى حائل اسمها ( طابه ) وهذي القرية خُسف فيها ويوم دري الملك فهد الله يرحمه عام 1415 هـ أمر بأن يخرجوا من هالقرية وأخلى المسؤولية وأمر ألا ينام فيها أحد وعطى كل واحد أرض سكنيةفي مخطط بعيد عن القرية وقرض في خلال مدة قصيرة والقرية خالية مافيها إلا مزارع المهم سبحان الله القرية هذي مثل القرى الثانية اللي تكون موزاية للطريق العام اللي نعرف لكن هذي بدأت تنزل شيئاً فشيئاً والحين اللي يجيها وهو مع الطريق يشك إن فيه حفرة عميقة لكن يوم ينزل تدريجي يلقى قرية طامنة جداً والبيوت بمكانها لكن اللي يتأمل يشوف أرضها طبقات متدرجة يعني مثل مبنى ( وزارة الداخلية ) بالعكس يعني كل شوي ينزل متر عن اللي قبله واللي يتجول داخل الديرة يشوف شطب كبير جداً وفي كل مكان حتى انك اذا حلت حصاة بداخلها تسمع صداها وهي تهوي لين يختفي صوتها وهذا يأكد لك عمقها من الداخل وهو اللي خلاني انتبه للأرض من جيت من الرحلة طبعاً وعلى حسب ماسمعت انه مو بس هالمكان فيه أماكن بمنطقة القصيم وبالجبال تحديداً بدأ يظهر فيها بعض الصدع خاصة هالسنة عسى الله يديم علينا الأمن ويكفينا شر الزلازل والبراكين
___________
أرجو التكرم بإفادتي هل الموضوع خطير ولأي الجهات أخبر هل هي البلدية أو وزارة الصحة وإلا أي جهة تكفون اللي يعرف لايبخل علي وإلا أسكت بس هذا شئ ماينسكت عليه خاصة إنه قدام بيتنا مباشرة .