بريدة ستي - بــرجــس والكـمبيوتــر

مره من المرات حدثتني نفسي قائله : ابيك بموضوع مهم .
قلت له : سمي .. انتي آمري وأنا حاضر .
قالت : مايأمر عليك عدو .. ثم واصلت كلامها ( انتي يانفسي ) وقالت : بالنسبه للكمبيوتر .
رديت وقلت : وش فيه طال عمرتس؟!!
قالت : اشوفك وانا خالتك ماعندك ماعند جدتي فيه!! ولا تفقه في اموره شيء!!

نزل كلامه علي كالصاعقه وفاجأني وخلان افقد توازني .. عقب ما صحيت من المفأجاه ولملمت بقايا مشاعري المتناثره ..

رديت عليها : ياللي ماتخافين من الله ولاتنتخين!!
كل هالمشاركات في الكثير من المنتديات والكتابه فيها وكل ذلك العطاء الايجابي البنّاء، والكتابات الجميله الهادفه .. وكذلك الدخول في التشات واقامة الحوارات النافعه مع الاخرين .. في سبيل الرقي بفكر الانسان وعقله ..

وتقولين ماتفهم في الكمبيوتر؟؟!!!!!

ردت بكل برود وقالت : ترفق بس ولا يطق بك عرق ثم نبلش بك
اللي يسمعك يقول ذا مبرمج كمبيوتر والا محلل نظم!! [ ابووووك يالتحطيم :( ]

كل هاللي تسويه مجرد خربشات وبربسه لا تسمن ولا تغني من جوع، وهي لاتعدو كونها تسليه وتزجيه وقت تنم عن وجود فراغ كبير لديك [ صايره مثقفه هالنفس على غفله :) ]

ثم كملت كلامها وقالت : أنا اللي اقصده بالكمبيوتر مهوب كتابه موضوع او موضوعين في احد المنتديات!!!
ولا دخول التشات ودق حنك وسواليف مالهن امن ولا ابو!!
هذولي كلن يقدر يسويهن .

قاطعت كلامه وقلت بنبره حزينه : آآآآه يازمن!! صحيح مالك آمان وتقتل طموح المبدعين!

برجس على سن ورمح يقاله مثل هالكلام؟!!

قالت : إلفقه بس وخل أكمل كلامي تراي مابعد قضيت .

قلت : واصلي يالناصحه انتي وخشتس اللي كنه قوطي ببسي واطيه راعي بيجو محمل عشرة صعايده ورايحين لمكه ياخذون عمره .
قالت : خل عنك البربسه وتماكن عمرك ورح خذ لك دوره في أساسيات الكمبيوتر او في برامجه المتنوعه .
يخوي بزارين مافركت الارض تفت بالكمبيوتر وانت رجال كبريش ولا تفرق بين الكيبورد والماوس؟!!
إستح على وجهك يالزلابه [ ولو بدت تمون بقوه :( ]
فكّر بكلامي زين وقلّبه في دميجتك تراني ناصحه لك وابي لك الخير .

إنتهى الإجتماع المغلق مع نفسي على هالجمله الاخيره .

قلبّت كلامها في راسي وجبته يمين ووديته يسار لقيت انها فعلاً صادقه في نصيحتها .
بيني وبينكم أنا من جنبها في الكمبيوتر وفيه اشياء كثيره تخفاني ولا اعرفه .

قررت اخذ جوله على معاهد تدريب الكمبيوتر علشان اشوف الاسعار واضبط ميزانيتي .
صليت المغرب ثم رحت للبيت وضبطت التشخيصه وكبيت جرة طيب على ثيابي وشماغي .
تعرفون الواحد يبي يروح يقابل مدربين كمبيوتر وناس على مستوى ولازم يكون هندامه نظيف وشكله مقبول .

ركبت موتري ونصيت معهد اخبره بطرف الشارع العام .

يوم وصلت للمعهد لبقت الموتر ثم نزلت .
اللي يشوفني على هالسكبه يحلف إني مهندس كمبيوتر والا مبرمج ماناقصن الا الكمبيوتر المحمول ( النت بوك للقراوه :) )

دخلت مكتب الاستقبال وسلمت، وكان فيه أخ مصري الجنسيه، ومير يطير بي تسنه شايفن ابوه والا امه من الفرحه وخذ من كلمات الترحيب ..

أهلا بسعادتك .. تفضل حضرتك .. شرفتنا يابيه ..
همن قال عقب ماجلست على الكنب : تشرب ايه يافندم؟ شاي والا عصير؟

طقتن الشهوه ومير اقول : عصير بردقان وتكفى زوّد الثلج الله لايهينك [ داخل بوفيه ] .
راح يجيب العصير، وعلى روحته بغيت احط رجلي وافرك قلت اخاف يحسبني على هالتشخيص موظف من المؤسسه العامه للتدريب المهني والتعليم الفني وجاي اراقب شغلهم .. الله يستر من التوالي .

جاب العصير وهو فاتحن كشرته نص متر يمين ومثلها يسار، وماتشوف الا سنونه طالعه من كثر الابتسامات والمجاملات .
مد لي العصير واخذته منه بكل غرور وانا اناظره بنص عين من زود الثقه .
اخذت لي شفتين من العصير وتنحنحت ثم قلت : كيف حالك؟
ابتسم وقال : تمام يا افندم .
قلت : وشلون الدورات عندكم؟ [ الله من زين صيغة السؤال ]
قال : عندنا دورات برمجه، شبكات، لغات .. دورات قصيره ودورات طويله .. عندنا شهادات معتمده من المؤسسه .. والمدربين بتوعنا على أحسن مستوى وعال العال ( ياكثر هرجه )

قلت : عندكم دورات للمبتدئين بالكمبيوتر؟
عقب ماسمع سؤالي هذا تغيرت ملامح وجهه واختفت الابتسامه من خشته وقال بنبره فيها نفخ ونزر : دورات مبتدئين في ايه؟!!!
قلت : في الكمبيوتر .
رد بصوت مرتفع : يعني في ايه بالكمبيوتر .. ما تحدد آمال؟!! ( ولو بدأ ينفخ السلوقي :mad: )
يوم شفت الدعوى نفخ ونفيخ تحمست وطلعّت عيوني وقلت : مهوب هذا معهد كمبيوتر؟!!
رد باستهتار : آه دا معهد كمبيوتر .
قلت : خلاص .. اكيد عندكم دورات خاصه بالمبتدئين لتعليم الكمبيوتر .

قال : عندنا دوره في الوندوز والوورد لمده اسبوعين بالف وخمسمية ريال .
تفاجأت بالسعر ومير ارد بدون شعور: وين يخوي مقدم على جامعة اكسنت وفورد ( من التحمس ما عرفت انطق اسمها :) ) ، غالين يابو الشباب .

بيني وبينكم الوندوز اعرفه لكن الوورد الله يحلله ويبيحه مابيني وبينه سابق معرفه .
قال : هازا اقل سعر عندنا، عاقبك والا شوف غيرنا ( تغيرت المعامله والحتسي يوم شاف الوضع مامن مكسب )
قلت : اشوف غيركم؟!!!!!
يعني مابها لبلد الا هالولد .. المعاهد ماليه الديره .. أنا من يوم شفت عصيرك البايت وانا داخلن الماء منك .

طلعت ريالين وجدعتهن على الطاوله وقلت : هذي قيمة كاس العصير اللي جبته لا بارك الله فيك ولا في عصيرك .
رد بصوت مرتفع اكثر وقال : احترم نفسك وماتؤلش الكلام ده .
قلت : انت اللي احترم نفسك وتكلم زي الناس .

ارتفع صوتي انا وياه وتجمعوا علينا بعض موظفين المعهد وبعض المتدربين الصغار وماتشوف الا خمطة طواقي لمبزره جايين ياخذون دورات .
ياحبهم للشر ما ادري منين تناتقوا ( اكيد هذولا البزران اللي مافركوا الارض واللي كانت تقصدهم نفسي في بدايه الموضوع .. عز الله انها صدقت )
انا يوم شفت البشريه تجمعت زاد معيار الزعطه عندي ومير اوجه كلامي للمصري واقول : ثاني مره تحترم الناس وتحتسي زين .. ويا أديب خلك اديب .. لا أحوس مريرك بذا :mad:

جدعت هالكلمتين وعلى طول نصيت باب الخروج، اثناء طلعتي من باب الغرفه كان فيه واحد سمين يتفرج على الهوشه دفيته مع بطنه بقوه وابعدته عن طريقي .. بيني وبينكم انا خفت يلحقن ويتودس ببطني .. لكن ربك ستر .

ركبت موتري وانا مولع :mad: ودقيت ريوس حتى من الحمق بغيت ادعس هندي راكب سيكل .
صدفه وانا امشي بالشارع العام قزيت لوحة معهد تعليم كمبيوتر .. قلت ياولد دق الحديد وهو حامي .. وقف واسألهم عندهم دورات، ياتضبط معك الشغله والا تكنسل الموضوع من بدايته .

وقفت عند المعهد الثاني ثم نزلت ورحت للاستقبال ..
سألت عندكم دورات كمبيوتر للمبتدئين؟
كان الموجود في الاستقبال هندي ..

(( افا .. ما أطـقـ .... من ذاك الا ذا !! ))

رد الهندي : صبر شويه صديق .. فيه نفر سعودي يجي .
قلت : وينه؟
قال : هوه فيه برا سيقرت ( يتتن ) .
قلت : افا .. هذي السعوده اللي صجونا به!!

شوي والا ابوالشباب جاي يدودل ايديه .. سلم وقال : هلا بالحبيب أي خدمه؟

قلت : ابسأل اذا كان عندكم دورات للمبتدئين والا لا؟
قال : فيه دوره مدتها شهر بخمسميه ريال .
قلت : حلو .. والمدربين وش جنسياتهم؟
قال : مصريين .
قلت : وعوووووه .. مافيه غيرهم .
قال : لا .. لكن المدرب حمدي ممتاز وخلوق .
قلت : اخلاقه له .. أنا ابيه يعطين العلم اللي عنده وبس .
قال : صحيح لكن ايضاً طريقة التعامل والتدريس مهمه من اجل ايصال المعلومه ( وقعد يمدّح فيه ) .

بصراحه أقنعني بكلامه ولا يهون سعرهم المنخفض .

إنتظمت بالدوره بكل همّه ونشاط، وأنا الان مواصل معهم ..

أبشركم بديت افرّق بين الماوس والكيبورد، حتى بديت أعرف وشلون أغير الكتابه من العربي للانجليزي عن طريق (Shift+Alt) اللي باليسار، ومن الانجليزي للعربي عن طريق (Shift+Alt) اللي بالجهه اليمين .

وازيدكم من الشعر بيت ، عرفت مكان حرف الذال ( ذ ) لقيته مجدوع باقصى الزاويه اليسرى للوحة المفاتيح، مبعدينه عن باقي الحروف تقل فيه جرب وخايفين يعديهم .
الضعيّف صايرن مثل اليتيم ماله والي ولا تالي، وقاعدن بلحاله لا أنيس ولا ونيس .

الله يلوم اللي يلومه ذكرني بطفولتي البائسه عندما كنت اقارع الزمن واحكي قصة الآلم الدفين والآهات الحزينه [ تهيّض برجس :D ]

وهذي يبيله جلسه وموضوع ثاني .. الى ذلكم الحين اترككم في رعاية الله وحفظه ;) .