|
ثبتوا أهل البند واكلوا حقوق الموظف الرسمي !!
بسم الله الرحمن الرحيم السلام عليكم ورحمة الله وبركاته أولاً .. نبارك لأخواننا الموظفين اللي تم تثبيتهم من بند العمال والمستخدمين في الدفعة الثانية ونتمنى لهم التوفيق والسداد . ثانياً .. وين حق الموظف الرسمي من الترقيات وتعديل الوضع للي أقل من مرتبته ؟ تدرون يا أخوان أن الوظايف راح الكثير منها في التثبيت وخاصة بسبب الغش في إعطاء شهادة العمل من رؤساء الموظفين اللي تشهد بعملهم على وظيفة مكتبية حتى يتم ترسيمهم مع إن الكثير منهم حراس ومراسلين وهذا كان سبب رئيسي لتأخير الثبيت لأن وزارة الخدمة المدنية عرفت بهذا الكذب والخداع والتدليس لكن ماتقدر توقف التلاعب لأنه في ذمة المدير اللي شهد للموظف . الموظفين الرسميين يشتكون عدم تعديل وضعهم وتأخير كبير في الترقيات وخاصة بعد هذا الثبيت لأنه استهلك أرقام الوظائف اللي كان مفروض يترقى عليها الموظفين من زمان وقلص العدد الموجود وسبب مشاكل كثيرة ما يحس فيها إلا الموظف الرسمي اللي ينتظر ترقيته وطال الزمن عليه . أخوكم فاقد وطن - مثلاً - متعين على المرتبة الثانية من سبع سنوات رغم إني متقدم عليها بالثانوية وبدال ما أحصل الرابعة على الأقل عطوني الثانية وقالوا تبيها أو بسلامتك !! وجاء بعدي ناس تعينوا على البند ومعهم متوسط وأخذوا الرابعة لأن كل 3 سنوات خبرة تُحتسب مرتبة .. طيب بالعافية عليهم .. لكن وين حقي إذا يحسبونها بالخبرة مع الشهادة ؟ أكون بالحالة هذي أستحق السادسة !! الكلام يا أخوان عام وأنا واثق إن الكثير أنظلم بسبب تخبط الوزارات بالرفع للموظفين الغير رسميين واكلوا حقوق الموظف الرسمي وياما فيه ناس لهم 15 سنة ينتظرون ترقيات وجاء من أخذ مراتبهم بكل راحة وهو توه متعين من كم سنة !! أبي أفهم كيف يثبتون مراسلين على المرتبة الخامسة مثل ما اشوف في إدارتي رغم إن النظام واضح وصريح .. الثبيت فقط للموظف اللي يحمل شهادة ويعمل على وظيفة مكتبية .. وهذي فعلاً حق لإن كان فيه موظفين على البند يعملون بالحاسب والرواتب واشغال معقدة ولا فيه خلاف على ثبيتهم ويستاهلون أكثر .. لكن مراسل يحطونه على الخامسة .. وموظف رسمي له سنين ينتظر ترقيه أقل من حقه بالأصل هذا ظلم ولا يجوز . أتمنى ما أحد يفهم إني أعترض على التثبيت .. إعتراضي فقط على التلاعب اللي حصل .. والمضره اللي طالت ناس وراحت أرقام الوظايف لغيرهم مع إن الحق لهم . واللي عنده راي ثاني يتفضل أو يشوف خطأ في كلامي على العين والراس . وللجميع أطيب تحية |
لاجديد .. تخبط اداري ازلي .. وسيستمر مادام ان أصحاب القرار مازالوا بعقليات ( نبي نبيد المال قبل لايجي ذيب يبيده ) قرارات ارتجالية يراعى فيها المصلحة الشخصية اولاً .. و مصلحة الوطن والمواطن .. قد صلوا عليها خمساً .. رعونة وفساد اداري لامثيل له على مستوى العالم .. سي يو .. |
لا تشكي لي أبكيلك المعلمين من عام 1418هـ وهم يطالبون بالمستوى الخامس - المسلوب قسراً - لكن معذورين ميزانية الوزارة ما تغطي رواتب منسوبيها علشان كذا مطلعين ثلاث هايلوكسات أقساط !! |
هذا وأنا أخوك يسمى سوء تخطيط وتنسيق وعدم دراسة الموضوع بشكل موضوعي
وأي نظام لابد وأن يظلم فيه ناس مثل هالنظام وأنت مثال على ذلك متعين قبل سبع سنوات على الثانية بشهادة الثانوي يجي واحد بعدك بيوم أو ثلاث سنوات ويتعين على البند ( أ ) وشهادته أقل منك وبعد القرار يكون أعلى منك مرتبة . السؤال اللي يسدح نفسه سدحا مبرحا وين المستشارين والعباقرة والعلماء والفلتات عن مثل هالوضع كيف غاب عنهم أو تخيل واحد كرف كرف بالدراسة وحصل على الشهادة الجامعية ويجي واحد معه الثانوي أو أقل من الثانوي ويصير مثل الجامعي أو أرفع منه لأن خدمته أكثر منه بشهر أو شهرين أو بأيام يعني أبو الثانوي كمل الثلاث سنوات بالتمام والكمال والجامعي بقى عليه أيام يمكن يوم أو يومين ويكمل الثلاث سنوات لكن هذاك تحسب له الخدمة والثاني ما تحسب له علشان خدمته ناقصة يوم أو يومين الزبدة لكل نظام ضحايا |
والله انك صادق أنا على هالوظيفه لي هالحين أكثر من 6 سنوات ولا فيه ترقية ولا شي .. والله المستعان ..
والله يوفق اللي رسموا ويوفقهم ويستاهلون .. |
<<<<<<<<<<<<<<<<< المسكينه هذي 6 سنوات بدون ترقيه او تحسين مستوى :bad |
0 0 زميلي خريج أول دفعة في الثانوية التجارية 1407 هـ وقد تعيّن في نفس العام 28/12/1407 هـ على المرتبة الخامسـة حيث كانت التجارية يتعيّن خريجها على المرتبة الخامسـة أي له في الخـمدة 21 سـنة وهو الآن في المرتبة السـابعة 0 0 وأخيه يشــغل وظفية مسـتخدم ومعه الثانوية التجارية المفروض (يعين على المرتبة الرابعة) لإنها نزلت فيما بعد وله في المرتبة قرابة 15 عـاماً ,, ومن ثم يأتي الترسـيم ويحصل الصغير على المرتبة الثامنة ؟؟ وقد كان يعمل على وظيفة مكتبية بسـيطة ولايمارس أعمال المسـتخدم في حين أن أخيه الأكبر يشــغل وظيفة مدير ؟؟,, الترســيم أســعد الجميع ولاشـك لإنه أفـاد الكثير من الشـباب ومن كبار السـن من المحتاجين وممن يعولون أسـر إلا أنه في المقـابل هناك فئة أو شـريحة أكبر تضررت ليس من التثبيت وإنما من عـدم الإنصاف والنظر في وضعهم وهم شـريحة أكبر وقـد خـدموا الدولة أكثر وأكثر على مراتب قيادية وأعطـوا من أوقاتهم وانفسـهم الكثير والكثير ,, 0 0 القضية تحتاج إلى تفعيل وإلى تصعيد على نطاق أوسـع ودائـرة أكبر من خلال الإعـلام الرسـمي المقروء ,, شــكراً لك ,, 0 0 |
بسم الله الرحمن الرحيم الأخوان الكرام .. مدحت شوقي بريده .. أبومحمد 605 .. ولد سليم .. ابو ربا .. عاشقة باريس نجد .. حفيد اعقيل . أشكر لكم تشريفكم للموضوع ومشاركتكم وآراءكم .. مافيه شك الفساد واصل لكل الإدارات في بلدنا وتضرر منه الكثير من الناس , وعسى الله يفرجها من عنده . كل التمنيات لكم بالتوفيق .. مع جزيل الشكر والتقدير . |
| الساعة الآن +4: 12:37 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.