..





|| السلام عليكم ورحمة الله وبركاته ||
صبااح / مسااء .. السعاده والرضا >> يقالي لــغه ..:d


ي / هلا و غلا فيكم ..
كل السالفه إن ودي اكتب موضوع
وقلت ليوزر الأنا هو خلينيا نسيّر عليهم
نسلم / نتقهوى / نشيش / نسولف / نشتشت



~


" إذا حجت البقر على قرونه ..! "

كلمه رددوها أهالينا أكثر من أسمائنا ..
مير أهلي من تالي لو أبفتح أفمي أبي شي منهم قالوا جملتهم الشهيره
( أيه أنشاء الله لاحجت البقر على قرونه )
منوّل يقولون لي لين أعرستي .. بس شكلم غسلوا أيديهم من هالموضوع خخخخخ :d
من طلعت للدنيا وأهلي على ثلاث كلمات علومنا إياه ..
( حرام/ عيب / يجيب السرطان ) بالإضافه ل " إذا حجت البقره "

طيب ماسألوا أنفسهم شوله جايبينا دامهم بيحرمونا من أشياء نبيها و ننبسط ونستانس عليها ..
أتكلم عن الأشياء المعقوله اللي مامنها مضره لايروح بالكم لشي ثاني << وشو فودكاه ياناس !

نرجع لبقرتنا اللي مهيب طايعتن تكمل معروفها وتحج وتفكني و تفك الناس من شرها
بعض الأهالي الله يهديهم ( باقة ورد لأهلي ) :)
على اللي يسوا و اللي مايسوى يقولونها .. لو أبقول بروح للحمام و أنتوا بكرامه قالوا مع رجلتس
أنا مدري وش يحتري ابن اللذينا لين الحين مايشرّف << الله من زين المره :d
أقولكم عاد أهلي الظاهر آخذين المسأله عناد .. :(
أقول لأبوي بروح لزميلي يوافق , بعد فتره أقوله بروح لزميلي ( غير الاولى ترا لا تحسبون نشبه )
يقولون لا ماعندنا هالمسايير أذا رحت بيت رجلك سوي اللي تبي أن بغيت روح لقريح << و إلا بشاورك وقتها خخخخ :d

و كله كوم و لاقاموا الأخوان العيال يقطون وجيههم و يتدخلون باللي مالهم فيه ..
عندي أخو ما عنده غير ( أنا ماشوف له داعي هالروحه )
عاد أرد عليه بيني و بين نفسي و لا لو أقولها له كان أبوي يخلي أكبر قطعه بجسمي كبر ظفري
كلش عاد و لا الولد يقال له شي تقل أنه من الملائكه !!
و اللي صدز يقهر الشي اللي كان معارض عليه هالحين مرته تسويه و قدام عيونه و لا يسوي لها شي ,
من حيني قايلتن لكم أهلي ماعندهم مبدأ
ما اقول إلا ياكثركم يالعيال وياقل بركتم ..! :mad:
مزاحميننا ومضايقيننا بكل مكان شوارع مراكز اسواق مطاعم مستشفيات منتديات
ولين بغينا نعرس ماحولنا أحد ! :oo


~


" .. حط نفسك في مكاني .. كيف بتتحمل ماسنجري .."

قدمت لنا شركة مايكروسوفت العملاقه و المختصه ب برامج الكمبيوتر خدمات كثيره و متعدده ..
المهم ( الله البلشه ماعرفت أكمل ):cool:
من أحد ه البرامج المقدمه .. برنامج الماسنجر واللي ماهنا أحد مايعرفه أو ماله إيميلات يستخدمها
حتى الهندي اللي يبيع ببقالتنا عنده إيميل :098:
ذاك اليوم دقيت عليه و أهاوش وراه مايجيب سنكرز البرتقالي الجديد
قال لي / مدام أنتا سجل هذا أكتراحات بعدين سوي أرسل إيميل حق أنا ;)

..

من الأشياء اللي لاحظتها ب الماسنجر و يمكن الغالبيه ملاحظين معي
( قولوا أيه حنا بعد مثلك .. لا تفشلونن )
أن العالم طايحه بشغلة المشغول / ب الخارج
ناس تحطها على سنع وناس مع الخيل ي قمرا
من أول ماتسجل الدخول تغير الحاله ل بالخارج .. شلون بالخارج و أنت جاي
أو تحطها ع مشغول و تقعد بالساعات وأحيان إلين بكرا و تصادف تلقاهم ب جماعي تسولف ..
و ربي ما أبالغ عندي كذا إيميل من أول ما أضفتهم و حالتهم بالخارج
هذا الشي موب جديد علي و عليكم ..
ثلاث أرباع الماسن يكون ب الخارج أو مشغول و الباقي متصل ..

طبعا الي خلاني أكتب لكم ه الموضوع الجميل < أيه هيّن بس :cool:
شغله صارت لي من فتره وخلتني أكره شي اسمه ماسنجر بقولها لكم في طيات الموضوع <-

قبل فتره .. سوالف وضحك بالماسن و قاعده ب آمان الله و أمانه ( واضح اللي قاعدن يسمع ل حامد زيد الشاعر لا تفــهمون غــلط .. )
قــهرن وحد من العيال ( للمعلوميه حالته ع بالخارج الظاهر من ثلاث شهور )
و أخبارك وشلونكـ و من هالكلام .. و تتشره علي أني من زمان عنه و سذا
قلت له يا محمد أنت ما اشوفك متصل دايما ي مشغول أو ب الخارج !
قالت لي و بكل برود .. أيه أكون موجود
طيب ليه تخلي حالتك الخارج ؟! .. قال لي / بريستيج !
ياناس وش أسوي فيه.. اخــلطه الخبوبي :d ..؟
والله ياهو فاهم البريستيج بالمقلوب ..

فيه ناس تقولي نحط كذا لان فيه ناس ما نبغاهم ..
هذولا ما ألومهم و لا حتى أعطيهم العذر لان من البدايه أذا شخص ماتبيه أو ما تهضمه ليه تضيفه أو تقبل إضافته !
أوكي نجامل و نساير الناس بحدود المعقول ، لكن موب على حساب راحتنا ..
و لا قش لك هاللي بتجاملهم و حط لهم إيميل بلحاله و أتوقع هذا اللي صاير مع الأغلبيه

..




~




" صكي ه البلا ..!! "

من يشوفونن حاضنته ومنسجمه إلا يقولون لي
اييه عند جهازتس قومي اجل اكوي ثوب اخوتس يبي يروح يشوف المباراة ..
تعالي بدال قعدتس ساعديني شوفي الملابس اللي تبي غسل فوق جمعيهن كلهن ونزليهن ..:mad:
ما عندتس شغل يالله بيجون الحريم باتسر عجلي سوي لي حلا مع القهوه ,
معطينا الاستاذ واجب انقليزي دامتس فاضيه حلي لي الاسئله و الكلمات ..
اشوا قاعدة خذي دفتر المتابعه و أرصدي الاسماء بتجي بكرا الموجهه و أنا ماسويت شي ...

مشكله لا صاروا أهلك معتبرين النت مضيعة وقت و ما تجيهم الأشغال
إلا لين شافوك فاتح جهازك " فيلم – منتدى – ماسن "
و إلا لو بتتأخر بالنوم أو تنسى تسوي شي حطوه ب هالضعيف
" لو نسلم من هالنت اللي انتي مقابلته كان حنا بخير "
أهلي يكرهون النت بشكل عدائي معني منب بلمره اطول عليه ..
و لو هه صار شي قالوا بسببه .. قبل امس أكح عند أمي قالت ايه هذا من قعدة النت :d

و الله من دعوه جت لهم ه اللي صنعوا ه المتصفط أعماكم و أشغلكم و ما خلانا ندري عنكم !
يقولون انت مانشوفك ابد ي طالع ي نايم ي عند النت

فيه ناس أنترنتيين بزياده أنقطعوا عن العالم والأجتماعات وصاروا بيتوتيين ..
علاقاتهم محدوده و طلعاتهم قليله و كل وقتهم ب النت
ه الشي يأثر عليهم و يعزلهم عن أهاليهم و أقاربهم و يبعدهم عن بعض توصل عند بعضهم لمرحلة الإدمان !
يعني لو بتعذب ه الشخص أحرمه من الجهاز يوم و بيجن جنوونه :S



~




بالختآم ..
أتمنى لكم أطيب الاوقات و أسعدها <- بتال على غفله خخخخ :d

( سبحانك اللهم و بحمدك , أشهد أن لا إله إلا أنت .. أستغفرك و أتوب إليك )