|
اعطوني ارائكم والله العظيم زهقت...؟
السلام عليكم ورحمة الله وبركاته
اخواني راح ادش بالموضوع على طول انا متزوج لي ممكن سنتين وساكن مع الاهل والمشكله ان امي ماتبي زوجتي مع العلم ان زوجتي ماقصرت بشي ابد وتعبت من كثر المشاكل دايم الوالده زعله الله يهديه لو ابطلع انا وهي نتعشى برا كان زعلت ولو نسافر ايضا كذلك اما الوالد الله يحفظه بالعكس تماما وشرايكم ماهو الراي |
والله شف اخوي بر الوالدين واجب وانا اختك بالمقابل زوجتك لها حقوق الحل الوحيد استأجر شقه علشان تأخذ راحتك واذا كان ماودك تطلع عن اهلك تحمل اجل بس اوصيك على امك ثم امك ثم امك زعله اولى من كل شي بهالدنيا الله يخليه لك |
حاول تناقش أمك بالموضوع
أو خل أبوك يكلم أمك الله يكون بعونك |
ياخي لي الحين انتم جاهلين ياخي الام تراه تغير من الزوجه غيره عضيمه اقول وانا اخوك اذا الله رازقك اطلع في بيت لحلك صحيح في اول الااوقت امك تبي تزعل لكن مع الايام ترضى وماراح يساعدك غير ابوك علي اقناع امك انك تطلع من البيت ارجو ان اكون افدتك وترا الامهات عندهن مقواه يقولن( انا اربيه واتعب عليه بخرته تفر مخه هذي علي )هههه
|
اطلع ببيت لحالك..
معروف الي يعيش عند اهله مايسلم من المشاكل.. استغرب من بعض الامهات الله يهديها تنفر عيالها منها... الله يكون بعونك... اقتباس:
لكن لاتستغرب فأنت في مجتمع المتناقضات!!!!! ,, تقبلا مروري واحترامي,,, |
شوف كثير من الشباب الله يهديهم إذا بغى يسوي أي شي لازم يقول لأمه طبعا هذي أمك وما نختلف والبر فيها واجب لكن مو يعني إذا بغى يحضر مناسبه عند إنسباه يقوله أو يتعشى ويا زوجته يقوله لا إذا الشي ما فيه مصلحه إنك تعلم إمك مو لازم وإذا تقدر إستاجر شقه وارتاح لكن لا تنسى حق إمك عليك..... والله يوفقك للحل المناسب |
طبعاً هذا بكون بسبب غيرة من الأم وهذا طبيعي عند كثير من الأمهات حاول تدخل في الموضوع خالك أو خالتك بحيث تكلمها بدون ما تحس انها رسالة منك وتذكرها بأيام زمان يوم كانت في بداية زواجها وكيف كانت مع زوجها والبنات الحين يبن مثل ما بغيتي ومن هالسوالف حاول تخلي زوجتك تهديها هدية تحبها شاورها في أمورك وحسسها انك لا زلت بحاجتها ومو بالضرورة تنفذ رأيها ثم قلها والله رأيك كان موفق لا تظهر تعلقك بزوجتك أمامها ضع رأسك في حضنها أهم شيء تذكر انك رجل وبين أم لها حقوق وزوجة لها حقوق وازن وازن وازن إن لم تستطع الحل حاول أن تسافر لمدة ثلاثة أشهر كأن عندك دورة أو انتداب أو شهرين أو شهر وبعدها انتقل لبيت آخر |
يارجال إذا تبي الرأي السليم وشفت أمك بها الحالة أطلع من البيت
والبر وانا أخوك ماهب جلستك معها خذ لك شقة حولهم بالحي وادخل عليه كل يوم وجب له أغراضه وخل الدعوى من عندك لاتدخل زوجك بالموضوع وترى البداية به شوي زعل لكن زعل شوي ولا زعل كل يوم أعيد لك وانا أخوك إن كنت تبي البر ترى القعده بالبيت ماله دخل بالبر جربوا كثير زملاء والان هم وأزواجهم من أغلى الناس عند أمهاتهم البر بالأفعال ياخيي والله أسأل أن يرزقك الخير في حياتك واستخر والله يكتب لك اللي فيه الخير |
فكر بالآمور هذي . . هل آنت مضطر في السكن مع الآهل . . هل زوجتك عآطفية وتستطيع آن تمتص حآلة الغضب وتحترمهآ وتحبهآ كمآ لوو كآنت آمهآ . . ربمآ والدك بعيد عن آمك وغير مهتم فيهآ . . فآخبر والدك اذا كآن مقصر معهآ . . انت وزوجتك بستطآعتكم آن تغيرو آمك بمشآركتهآ معكم في كل شي سفر طلعة عشآء سهرهـ آي شي صدقني هي فترهـ وتبدآ تنسحب عن حيآتك الخآصة . . الله يسعدك يآرب ويخلي لك كل غآلي على قلبك . . |
تفاهم معها والله ماودي اقولك شي أخاف تسوية بعدين افرق بينكم
الله يعينكم |
لا أزيد على ما قاله أخواني ..ماتبي راي ..!! أطلع من البيت منعا" للمشاكل وخوفا" من أن تتطور ويحدث منك عقوق لوالدتك ..وهضم لحقوق زوجتك ..أصلح الله لك الأحوال .. |
مشكــــــــــــــله وللاسف كثيرة بمجتمعنا والغيره هي اساس المشكله صعب ترضي زوجتك على حساب زعل امك والعكس اصعب الله يعينك والحل تتفاهم مع امك والا اطلع ببيت لحالك وريح راسك من المشاكل الله يعينك |
رد
اشتر راحتك واطلع
|
اقتباس:
وأنا أضم صوتي لصوت أخي ( محب الفضيلة ) |
| الساعة الآن +4: 04:28 AM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.