|
مشكلة يعاني منها الكثير ارجو من رأي او حل لها بأأذن الله
السلام عليكم
المشكلة بإختصار هي الدجة " اي بمعنا ثاني ديون وأقساط وإيجار وكهرب وجوال ومصاريف وخلافة والراتب أربع آلاف " مشكلة يعاني منها الكثير وأولهم انا فالإيجار يحل يوم 1/4 والرصيد مافية ولا ريال والراتب عليه أقساط حقت الزواج وغيرة والناس كله داجة ماتسلف وش الحل برأيكم وشلون الواحد يحسن دخلة ويحل مشكلة الأزمة المالية العالمية التي أمر بها وغيري . * أرجو من الاخوان ابداء الرأي والمشورة والحل لهذا الموضوع الحيوي الذي يؤرق مضاجع الكثيرين وأولهم أنا . ولا يقولي أحد رح لم الجمعية تراه شينه بحقي وبحق الشباب ؟؟؟ |
كل هذا يدور حول كيف تصرف راتبك
لو إنك تقتصد بالمصاريف قدرت توفر من راتبك خصوصا لو كنت متزوج قريب يعني ما عندك عائله كبيره المشكله بحب الناس للمظاهر اللي أخذ شقه إيجار بأغلى حي وشاري سياره موديل جديد على البنك يا أخوي مد رجولك على قد لحافك ( من تجربه أخوي متزوج من سنه ونصف ويشتكي من أقساط البنك والإيجار مع إن راتبه حوالي 7000 ريال يقول ما يبقى من راتبي شيء ودايم سلفياااات ) |
احوي مشكور على ردك
بس وش توفر وش تخلي الواقع شي والتنظير شي ثاني لا زم تمشي ممشى الناس ولا خلك بنت الحلال لازم تستأجر بيت ولازم يصير عليك ديون من الزواج محدن فاتحلك بيته ومحدن مزوجك بنته ببلاش والدنيا كلما لها بغلى وزيادة ومااقول الا المثل الشعبي " تكبر ياخريفنا ونجسك" |
الوظيفة اسمها معااااااااااااااش !! يعني يعيشك فقط ؟ أما رفع مستواك المعيشي فهذا حسب اهتمامتك وميولك ومن معك من الربع ؟؟ أعرفلك شباب طاحوا ببيع فراخة الحمام وعندهم مئات الأجواز ودخلهم مزبوووط ! وأعرفلك شباب يروحون الفجر لسوق الخضرة ويبيعون ويشرون بنفس اليوم والمكسب أقل شيء 300 ريال يومي !!!!!!!!!! بس لازم تغامر على سنع وممارسة وعلى شوي شوي ............... ترى ملينا من سيطرة الاجانب على أسواقنا .... ولامانع من التتكيس :048:أحياناً على حسب الفرغة ؟؟؟؟؟؟؟؟:41 |
ترا السلف مهب حل (مانشقت ...بس تخر) الحل انك تكلم اهلك وتسكن عندهم و فلوس الايجار تضبطلك جناح ببيت اهلك وبعدها انس الايجار وعاد لاتصير ماتنعطا وجه تقعد عند اهلك لين يعرسون عيالك بس لين تضبط ميزانيتك وتواسا وتركد وحاول تتفق انت وزوجتك على الاقتصاد وتقليل التسوق المشتروات وانشالله امورك تزين وترا مايمنع تشتغل مسائي زياده على شغلك الرسمي عشان تزين دخلك وترا الناس مهب نافعينك لاخويا ولاغيره ولاتقول ابطلع وابروح وابجي وابكشت الله ييسر امرنا وامرك ويرزقنا ولايحيجنا لحد ولايلهينا عن ديننا ولايجعل الدنيا اكبر همنا آآآآمين |
.. أنصحك يا أخي تدخل بجمعية مع بعض زملائك أو إخوانك ، و احرص أن قيمتها تكون مكافئة لقيمة الإيجار .. و إذا حصلت شقة تمليك احرص عليها لأن قيمة أقساطها قريبة من قمية الإيجارات ، و تدفع أموالك على شيء تملكه بعدين .. مهب مثل الإيجار ( دم فاسد ) على قولة الشيبان .. و إن تيسر لك ترى فيه دورات تعتني بأمور الإدارة المالية للمنزل .. أحيانا مشكلتنا من الفوضوية في صرف الأموال .. |
أخي لا بد أن تضع لكـ ميزانية مثلاً
2000 سداد فواتير تشمل الكهرباء والماء والجوال 1000 حاجات خاصة 200 بنزين 2000 دفع إيجار وهكذا .. ولابد مثلا تدور لكـ شغل .. مثلا تبيع تمر أو أي شي ثاني .. |
فعلاً على حسب ماقالوا البعض دور لك وظيفة مسائية أو ياخي إشتغل في سوق الخضرة الفجر قبل يبدأ الدوام إشتغل دلال أو إشتر بعد الفجر على طول وبع قبل تروح للدوام وإن شايء الله المكسب يكون طيب أنا أعرف واحد متزوج وعنده بنت ويشتغل براتب 4500 ويشتغل بعد صلاةالفجر لمدة3ساعات دلال في سوق الخضار وماشاء الله سيارة جديدة وبيت ويبقى من راتبه فلوس يشتري فيها ويبيع في سوق الخضار. وتذكر قوله عليه الصلاة والسلام(بورك لأُمتي في بكورها) |
ما قول غير الله يرزقك مد نضرك ووفقك
وعليك بدعاااء تقبل مروري |
اخي فيه دورات لمثل مشكلتك كيف نتصرف في رواتبنا لعلك تلقى حل
|
الاقتصاد هو خير معين رتب وضعك عل قد راتبك وفقك الله ورزقك من حيث لاتحتسب |
استعمل النظام الأقتصادي في كل شيء ولاتسرف لشكليات والمباهات وسترى ان مالك لن ينقص منه الا القليل.. وادعو دائما بأن الله يطرح في مالك البركه ويعوضك خيرا عن ماذهب وتصدق بمالك ولو بالقليل... |
لاإله إلا الله محمداًُ رسول الله اخوي انا عرفت ان راتبك 4000 ريال والله يكون بعونك انا اعرف واحد كان راتبه .. 2800 < ويكد على اسره .> ودخل ليله .. وتخرج من المتوسطه والحين راتبه 4800 .. زاد 2000 والله يوفقك ونا من رأي انك تدخل دورات .. برامج حاسب آلـي وهاالدورات ترا تزيد من الراتب .. وتزود من مستواك الأجتماعي والله يكون بعونك ويوفقك .. |
مشكورين اخواني على التفاعل
لكن اخوي مع شهادة الكلية وشغال حكومي مافي أمل اترقى وياجماعة تعالوا نقسمة قسمة بسيطة 1200قسط بنك الراجحي +1300ايجار شقة +200جوال +200ريال بنزين+70كهرب+ 400مصاريف البيت +مصاريف الاهل+ مصاريفك الشخصية + قطة الدوام للشاهي +اشياء طارئة وش تخلي وش توفر ؟؟؟؟؟؟؟؟؟؟؟؟؟؟؟؟ * الحياة كفاح خاصة للمتزوجين |
| الساعة الآن +4: 10:52 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.