جدتي موضي .. ومكينة الزئبق الأحمر .. سي يو ..
 

.

لاإله الا الله .. سبحان الله العظيم ياهيلة المحمد ..
من ياعي لتس .. مبطيه عنتس يادافع البلا من يوم اخذتي رجلتس هالتالي ماشفناتس ..
يوم هاك الحبيب الأول .. وانتي كل يوم نشوفتس .. وهاللحين لي سنتين ماشفتس ..


زاد يوم قالت لي بنتي نوال .. هذي هيلة المحمد ماصدقته ..
بس يوم سمعت هالخنة اللي بتس عرفتس :d..
ايه وشلونتس بشري عسى الله رزقك بعيال ..


اقول ياخاله .. انا طالبتس طلب .. وتكفين لاتردينن ..


ايه .. وماشاء الله .. وش الطلب اللي تبينه من ..


ابي المكينه اللي عندتس مجدوعة من سنين ..
خابرتس ماتبينه ..


ايه .. ايه .. ايه ..
<<((== وجدتي موضي تقول ايه وهي تقشقش بيده عودان وقشور فصفص من الفرشة ..


تبين المكينة حقـتي .. واثرتس زاهمة تبين بس المكينة ..
وانا احسبتس ولهتن علي ..

اقول هــه مير .. والمكينة خربااااااانه ولاتنفع ..
ولا ابيع شي بوه ريحة ( بعلي ) ابو سليمان ..


مهوب بغلي .. ياجعلتس البغل اللي يتودس بطنتس ..
اقول بعلي بعلي يعني زوجي ابو عيالي يامال الجنة ..
روحي بس يالله ماعندي شي للبيع .. مع السلاااااامة ..


****************




وراتس يمه .. وش بتس اليوم تهوشين وتلجلجين ..

ياوليدي من اليوم وهالتليفون .. كل شوي داقتن علي وحدة تنشدن عن هالمكينة ..
مادري وش جايهم عليه ..
ياوليدي حتى السودانية حقت الحناء زاهمة تقول ( دايرة المكينة )
قلت له لا المكينة منقطع سيرة .. ومهيب تدور عساتس الدورة .. :d:d:d


مير اغديك تروح لبيت الدرج وتجيب هالمكينة اشوفه ..
شفه اللي عليه صورة ( كلب ) لوه شوشة .. :d
مبطيتن عنه لاتصير بعد جادعته هالشغالة ..
بس وشلون تبي تدخل مع الباب يالدربية اخاف تنشب ياهالبرميل همن من يطلعك فرقعين جدي ..
:d:d:d

لا يمه انا ادخل وأجيبه .. الباب مقلوع .. بعدين هذا ( اسد ) مهوب كلب لوه شوشة ..


إيه .. هاته بهذا بس .. الله المستعان .. تذكرت سراويل جدك سليمان ..
عاااااد تصدق اني من يوم اخذت جدك وأنا حافظتن الشعار حق جدك ..
دايم يقول .. ( تعددت السراويل .. والربقة واحدة :d)
اذا انقطع السروال فكيت هالربقة هالمغاط .. وخيطته بهالمكينة على سروال ثاني ..
الين مات .. عقبه جدعنا السروال .. والربقة ربطة به مفتاح البسطه ..




****************





اقول يمه .. عااااااااد تدرين وشواله هالحريم يدقن عليتس ..
يبون هالمكينة .. يقولون ( الزئبق الأحمر ) اللي به .. علشان يآخذونه منه ..

وشو الزئبق الأحمر ياوليدي ..

الزئبق الأحمر .. هذا مثل اللي يجي بمقياس الحرارة .. بس هذاك ابيض واللي بالمكينة احمر ..

ايه عرفته اللي بمقاس الحرارة .. .. هاك اللي تقول ( سعبول :d) ماغير يرقى وينزل :d..
انا كل ماشفته حامت تسبدي ..
اتذكر سعابيلك اللي كل ماوصلن الأرض تشفطهن همن يرقن :d ..


طيب يمه ماأحد قالتس شغليه وحطي الجوال عنده ..


ايه الا الا ..
انا اقول ورى مزنة البراهيم تقولي .. شغليه وحومي عليه وانتي مشغلتن الجوال ..
اذا راحت الأبراج فتراي ابيه .. واذا ماراحت فخليه عندتس ..

قلت له اها بس اقطعي وأخسي .. وش احوم عليه .. ماتبين البس حرامي بعد ..
والله عااااااااد لو هي الكعبة علشان احوم عليه ..




****************


ياميمتي .. يابعد معاليق ركبتي .. هذولا نااااااااااااس الله يخلف مير ..
من زود الفراااااااااااااغ صارو يدورون أي شي يشغلون أنفسهم فيه ..
ياميمتي حطي عقلتس براستس واتركيهم .. واتركي هالخرابيط ..

اجل نااااااااااااس لك سنين ماسمعت اصواتهم .. يوم جاء طاري هالمكينة قعدوا يدورن بعض ..
ناسين بعض .. ويحركهم سبب تافه ضحك العالم علينا ..

اقول يمه .. الظاهر إن حنا شعب ( بدون مكينة :oo ) ..

ابدخل هالمكينة لبيت الدرج .. وروحي نامي باقي ساعتين على الفجر ..


سي يو ..

.

أنا جوالي فيه زئبق أحمر ومسيوم بعشرين ألف تشتري يابوإبراهيم؟؟
:d

الصراحه الوضع صار يبي له وقفه جاده من الجميع زين اليوم قريت انهم راح يشددون الرقابه على هالمرض الجديد

.

ههههههههههههههههه
ههههههههههههههههه
ههههههههههههههههه


تصدق أسمع بالسالفة ولا فهمته ,


وإلى اللحين مافهمته :113:


الله يخلف عليهم ,,


مشكور أبو ابرهيم :)

.

اجل جدتك موضي اها ...........

والله يالمكاين ماادري وش قصتهن ناس يقولون كذب وناس يقولون االمكيتة مسيومة 30000 ثلايين الف فقط كثر منها


انا بصراحة توي اعلم ان الشعب السعودي م ت خ ل ف .......

وشكرالك ....

ههههههههههههههههههههههههههههههههههههههه
هههههههههههههههههههههههههههههه
والله تضحك جدتك الله يسعدها

مشكور على الموضوع اللي وسع صدورنا

الصباخ ..

يابعدي انت .. اجل جواااالك فيه زئبق أحمر ..

طيب وش يدرينا إن جوالك بوه زئبق ..
بس يالبي الحل عندي ..

نجيب مكينة سنجر ونشغله عند الجوال ..
اذا اشتغلت المكينة يعني الجوال بوه زئبق ..


اقول دن هنااااك بس .. تحسبن جحة ابصدق إن الجوال بوه زئبق أحمر ..
ياعنبة اذا صار بوه زئبق أحمر يصيراستقبال بس ومايرسل ..


سي يو ..