|
ابغض يوم بحياتي هاليوم اثقل علي من جبل احد...
السلام عليكم من دون مقدمات انا مدرس مرحلة متوسطه ومستوى الطلاب عندي متدني اختبرتهم ووضعت الدرجات وغباء مني كوني مدرس جديد بكرتوني اعطيتهم اوراق الاجابات حتى الكل يعرف خطأه ويقتنع بأجابته ولايناقشني بشي وتركت اوراق الاجابات معهم قلت وش ابيبه طبعا درجاتهم ضعيفه مره وكنت والله ناوي اساعدهم وازودهم درجات لكنهم لاعابين بالمره ومايستاهلون الصراحه قلت في نفسي النصف الاول اعطيهم حقهم فقط يعني مازود احد ابد اعطيه حقه من دون زياده او نقصان حتى في النصف الثاني يعرفون مستواهم ويشدون حيلهم واساعدهم انا ايضا بس ابي الفصل يكون حي ومافيه قلة ادب ولاراح يسقط عندي احد بأذن الله راح اتساعد معهم ولكن قصدي في النصف الاول انهم يعرفون مستواهم ويشدون معي ويخلون اللعب لكن اليوم طلعة الشهادات الله لايوريكم تقل مافيه غيري بالمدرسه ذا يدعي علي الله لايوفقك وذاك يهدد خصوصا اني بمدرسه اغلبها عقول متحجره بكل صراحه والبعض يقول حرام عليك ضلمتنا والبعض يهدد يبي يجيب ابوه بكرا وغلطتي الوحيده اني عطيتهم اوراق اجاباتهم وراح الدليل الوحيد اللي اقدر احج ابأهم بهن طبعا اسألة الاختبار اللي عطيتهم تقريبا المنهج 16 ورقه وعطيتهم 9 اسئله يجاوب على 4 فقط ومررررررررررررره سهلات ومع ذالك يلومنن ابي ارائكم الله يخليكم لاهنتو
|
اخوي .‘ خلك واثق من نفسك .. وانت الحمد لله سويت اللي عليك واكثر .. وصدقن .. انت بموقفك هذا تقدر تغلبهم بالهرج .. مجرد انك تقولهم معطيهم 9 اسئله ويجاوبون على 4 ويدرسون على 16 ورقة .. يعني ولا مدرسة اهليه .. ولو انا مكانك كان اشد على الطلاب .. واقولهم ترا كل بداية حصة .. بحط كويز على موضوع اللي قبل .. يعني تخليه غصصب يدرس .. وحتى لو جاب ابوه وجلس يحاجك .. قله انا هذا شغلي .. تساهلت معهم ومانفع .. وشديت عليهم .. ومانفع .. اذا العيب بالبيت .. والولد .. والمفروض انت يا ابوه تنتبه لولدك .. وتناظر هو يدرس ولا لا .. والله يوفق دنيا واخرهـ :) |
والله انك مدلعهم كذا
وبعدين اذا جاب ابوه يبي يضربك مثلا ؟؟ تذكر كلامي يبي يشكرك ويقول جزاك الله خير ومن هالكلام ولا جت المره الجايه يبي يخلي ولده يشد بالاختبار تقبل تحياتي كبرياء الجرح(h) |
انا لما قلت اليوم ابغض يوم بحياتي من القهر اللي فيني والله طالع من المدرسه وكلي قهر اتعب واتعب وبالاخير يلومك الطالب وهو يدري بمستواه ودرجاته لا ويحاجك ويهددك ومادري كيف انا ماهمن احد لابوه ولاغيره بس فعلا تجتهد والمحصله صفر واللوم عليك انا لله وانا اليه راجعون اشكركم لمروركم
|
الله يعينك وكل مدرس مثلك يتعب مع الطلبه و لا يجد الإهتمام .. |
سويت اللي عليك ولاتنتظر منهم شكر شي طبيعي بيحطون اللوم عليك وانهم الصح وانت الخطأ ..
ولايضيق صدرك ولاشي.. |
]سو اللي بينك وبين الله وبإخلاص وبكيف الطلاب وآبآئهم
|
ياأخي أنت مدرس وأعلم منهم بمصلحتهم وأنت ترى إن هالوضع أنسب وضع لهم
لذا لايهمك أحد خلك حازم واللي يبي ينجح يجتهد النصف الثاني تصدق سواها بنا مدرس عندما كنت بثالث ثانوي ماهنا شيء ماقلناوه فيه بس النصف الثاني صرنا مثل الألف . ماعليك أنت تطبق المثل ( شد وجهك وارخ يديك ) |
لا بالعكس والله انك معطيهم وجه اكثر من الازم ولايهمك اذا دعوا عليك هذا واجبك ولاز تقوم فيه واذا هي على والد الطالب اذا جاء بالعكس هو بيشكرك اذا هو حريص على مصلحة اولاده تمنياتي لك بالتوفيق |
هذا حال مدارسنا هالسنين لا أحترام للمعلمين ولا تقدير من أولياء الآمور يبون نجاح وأمتياز
بدون جهد ولا تعب والنقد أكثر من الثناء والشكر قليل الله يعينكم يا المدرسين مهمتكم صعبة حيل لا ومحسودين من المجتمع ... |
شوف عزيزي ، أنت تقول ( اعطيتهم اوراق الاجابات بعد الاختبار ) يعني ماساعدتهم في شي :) ومسألة ( كنت بتساعدهم ) هذي وعود فقط بينك وبين نفسك .. لكن الواقع من خلال قصتك " ماقدمت لهم أي مساعدة " وبصراحة أحس ( اسئلتك فيها صعوبة لأنهم اختاروك أنت بالذات بصعوبة أسئلتك ، بعكس المدرسين الموجودين) ويبدو أنك بأحد القرى أو أحد الهجر ، الي بعضهم تفكيره ( محدود ) .. :) عموماً ( لوتحط سؤال من الفهرس وموجود بالكتاب ماحد مسك عليك شي ، ومسألة انهم يبغون اسئلة على الكيف ماصارت دراسة، واذاجاء ولي أمر أحدهم ، أرمي الكتاب بوجهه وقل وشرايك تخلي ولدك يختار الاسئلة ) طبعاّ هذا نظام التعليم الموجود ..،:) لكن ياعزيزي " وجهة نظر فقط " أنك تتجاوز وتسهل بحدود العدل بينهم يعني المجتهد تميزه ، بحيث أنهم ينجحون ، لأن المرحلة " المتوسط " ماهي ذيك المرحلة الحساسة الي تحتاج نسبة أو حتى اذا رسب راح تستفيد شي ، وحتى لو نجح وبعد سنوات تخرج من الجامعة يعني هالوظايف تنتظره عند الباب ياشيخ يبي يتمرمط ماتوظف ويمكن أنت مدرس جديد وجربت ، فلاحقين على المرمطة ، وخلهم يعيشون الأحلام وأيام الدراسة خصوصاً المتوسط أحسها أجمل المراحل ..،:f: أتمنى كونك معلم جديد ( لايؤثر عليك الإندفاع الزائد ) و( المثالية احياناً ماتنفع ) ، أو بالاصح صارت تقاس بالتعامل وليس بتطبيق النظام ، وأنت كونك جديد راح تتنقل بين المدارس فضع بصمة ( بيضاء ) باسم ( الذكريات) ،.. خصوصاً بهالعمر " وياما معلمين المتوسط أتجاهلهم " والسبب ليس باخلاقهم بل بشدتهم الزائدة ".، :f: ملاحظة : واضح أنك حساس من خلال طرحك فياليت تعرف أن في أمور راح تمر فيها أكبر من هذي ، ومن هالبزرين الي عقولهم متحجره ، وأيضاً لاتنسى أن في رجال قامت بإدارة شركات ووزارت بل حتى مناطق بسلبياتها وايجابياتها، وأنت ماينقصك شي فما أعتقد مثل هالموضوع راح يؤثر عليك وتأخذه بذيك الأهمية والتفكير ومعليش لأني حكمت من " العنوان" .، بالتوفييييق وتقبل مروري : 12(f) |
عااااادي قل إذا أنا ضالمك
خلاص أبختبركم مره ثانيه ونشوف أنا ضالمك ولا لا...... |
اقتباس:
وجهة نضرك احترمه لكن يبدولي انك ماقريت الموضوع زين منهج محدد 16 ورقه 9 اسئله تجاوب على 4 فقط ومنتهى السهوله وتجي تلومن بالاخير مع العلم عندي اول متوسط مؤدبين والله مساعدهم بالدرجات وانواع التسهيل لكن ثاني متوسط والله طلعو روحي ومع ذالك متساهل معهم بالمنهج والاسئله انت حكمة علي بالشده واني ماراح اتساعد معهم بالدرجات وانا الان اقولك والله مايسقط منهم احد عندي ولكن ابشد عليهم النصف الاول حتى يتأدبون واساعدهم النصف الثاني اتمنى تكون فهمت كلامي شاكر لك مداخلتك..........؟ |
بيض الله وجهك
ماقصرت مع طلابك..سويت الي عليك. |
| الساعة الآن +4: 05:18 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.