بريدة ستي - متى على الله يخشع القلب لله ؛؛وتهتز من ذكره محاني ضلوعى +يوتيوب

متى على الله يخشع القلب لله **وتهتز من ذكره محاني ضلوعى
متى تتوب النفس وتدور رضاه**وتفيض عيني والخلايق هجوعي
اللـه من قلبٍ غدى ساهيٍ لاه**حرصٍ على الدنيا هلوعٍ جزوعي
من اول اقدر فيه وآمره وانهاه **واليوم لايسمع ولا منه طوعي
ياقلب وش حدك على الذنب تنصاه ** وانته خلقك الله كريم الطبوعي
ياقلب وان جاك الملك في مفاجاه ** واستلفظ انفاسك بليا رجوعي
ياليت شعري فــالقبر وش تمناه ** وراحوا وكلٍ يستفيض الدموعي
وبكاك كل اللي تحبه وترجاه **ونساك ماكمّل عليك السبوعي
في برزخ كل على رهن يمناه**وتصحى على يومٍ نهاره يروعي
وجاك السجل اللي تخافه وتخشاه **فضايحٍ من كل شكلٍ ونوعي
ياثقل حمل ٍ شاله القلب ثقلاه **وياكثر ماشال المعاصي تبوعي
لطفك علي ياواحدٍ ماله اشباه **لاغرغرت روحي بيوم النزوعي
ان كان قلبي جملة الكون غطاه**فانت العفو يشمل جميع الوسوعي
ويالله ترحم وقت حرّ الملاقاه**ذل الوقوف بيوم عرض الجموعي
انا ومن يسمع كلامي ويقراه**وتجعل كلامي حجةٍ لي شفوعي