|
وات دو يو ثنك .. ؟
قبل أمس كنت باجتماع عائلي..
وأنا من طبعي أموت بالبزران.. وماغير تمطيخ ومايمكن يعدي بزر من عندي من غير ما أجمركه .. ياهم قمة البراءة هالاطفال.. ودك من زينهم تقعد تعضض فيهم يوم كامل.. المهم.. جاء واحد من البزران عمره سنتين تقريبا.. قالي بصوت بزراني عذب (هاو آر يو) ونطقها (هرايو) طبعا أنا ماركزت بالكلمة.. بس اخوه قال يقولك (هاو آر يو..؟) وعلى طول مطخته ذيك المطخة وقلت له (آم فاين.. وبخير وعافية) مشيتها.. بعد شوي.. جت بزرة.. يمكن عمرها بهالثلاث سنين.. وكالعادة.. مسكتها وقعدت اسولف معها.. وكانت سيارة اخوها قريبة من خيمة الرجال.. قلت لها وأنا اتبيزر.. يعني اسوي روحي بزر (من حقته هذي..؟) ردت علي وقالت (هذي كار برذر محمد..) يعني سيارة اخوي محمد.. وقعدت اسولف معها.. وكان كثير من كلامها بكلمات انجليزية.. (ووتر.. جوس.. برد.. سويت.. نايس.. ثانك..) وغيرها كثير.. برضه.. كافأتها بمطخة من اللي يحبها قلبك.. وقلت شاطرة.. ومن حظي اني صرت بجنب اخوها محمد.. قلت له ماشاء الله شكل امك مدرسة انجليزي.. ضحك وقال هه.. لامدرسة ولا شي.. حدها شهادة الكفاءة.. قلت طيب وش سالفة اختك مع الانجليزي.. قال بثقة.. عادي.. وش فيها..؟ قلت مو مسألة غلط.. لكن اشوف فيه اهتمام زايد بهالشي.. قال اللغة الحين صارت اهم شي.. ولازم تتعلمها من بدري.. قلت بنفسي (الله يخلف بس عليك) ورفعت صوتي وأنا اقوله.. (كلن حر برأيه..) وهالي صار بالمخيم هو مجرد نمونة لحالات كثيرة شفتها .. وهناك اهتمام زايد عن حده بتعليم الاطفال الانجليزي.. حتى الروضة الحين يدورون اللي فيها انجليزي مكثف..!! وما أدري وش هالافتتان باللغة وتعلمها..؟ وهل مابقى لنا ونتطور ونصير احسن شي الا تصير لغتنا انجليزية..؟ بس لا أحد يجي ويقول متقوقع.. والا متخلف.. والا رجعي انا اعرف ان الانجليزية مطلوبة.. بس مو لدرجة نخلي حتى بزراننا يهذرون به.. |
يقولون إنه لغة العصر .! |
الطفل إلى سن ست سنوات يكون قابل لتعلم اللغة بشكل كبير، لذلك يجب أن ننمي فيه تعلم اللغة العربية ثم تعلم اللغات الأجنبية، لكن أن تطغى عليه اللغة الأجنبية على اللغة العربية فهذا دليل على انهزاميتنا.
|
اقتباس:
ويعني... هو ضر الجيل الاول اللي تخرج ودرس بلغته العربية..؟ بس هي مثل ماقال مناحي.. يعني اننننني.... :) |
اقتباس:
كثير تلقى اللي مفتونين باللغة الانجليزية.. خرمس بالعربي... ماعندهم وعند جدتي.. قبل فترة كنت جالس مع شباب الاسرة وقدام الضو.. عقب المغرب... وابريق الشاي يفوح.. فخطم واحد بجملة مالم امها سنع... وعشان اسلوب التدريج في توصيل المعلومة.. سالت قلت مم تتكون الجملة الاسمية..؟ تصدق.. شباب متخرجين من ثانوي.. وبعضهم بمتوسط.... وماغير يتناظرون.. واللي يقول اسم.. واللي يقول فعل مضارع.. وهذي دارسينه من يوم حنا برابع ابتدائي.. |
أن تعلم الاطفال بعض الكلمات الاجنبيه تفسد قدراتهم في للغه العربيه ويصبح الطفل مشتت ومعروف أي شخص خلال 3 أشهر يستطيع تحدث الانجليزي بطلاقه
|
يمكن دور الشغالات بالبيت اشتغل
يعني عندك شغالة فلبينية يتكلمون اولاد انقليزي عندك شغالة اندنوسية يتكلمون اولاد اندنوسي واستغربت من بنت تقرب لي يوم قالت عن البطنية سليموت وقلت وش سليموت قالولي البطنية بالغة الاندنوسية واذا جبت شغالة اثيوبية يبي يقلون اعيالك كيف انكي يعني كيف الحال وغير عجب دمتم بخير |
اقتباس:
قصدي.. كلام سليم :) وتاكيدا لكلامك فان اللغة العربية اكثر تعقيدا من الانجليزية وتعلمها في وقت مبكر مهم جدا حتى لاينساها الطفل |
اقتباس:
مع الاحتراه لرائيك اختي الفاضلة اصلن حنا ماعندنا لغة عربية سليمة يقول سمو الامير وزير التعليم مخاطبآ المعلمين المتخرجين ولم يجد وظيفة يقول من يستطيع كتابة سطرين لغة عربية سليمة مستعد اوظفه .. يعني تصريح من امير ولا وزير ولا وزير تعليم بعد ........... وش معناه تجدين معلمين الغة العربية والمثقفين يتكلمون بعد المحاضرة او الحصة لغة عامية بحته يعني تعلم فن وليس علم اما ثلاث شهور يتعلم الانقليزي وبطلاقة بعد والله ياهي مبالغة ومشكورة على حسن الضن بقدراتنا العضيمة .... والله لو نبتلين تشرحين اقلينزي ماراح نفهم لو بعد اربع سنين ... واسئلي المتخرجين من كليات الانقليزي يعلمونك ... يتخرج الواحد منهم مايجيد يكتب صطرين انقليزي سليمة .. ارجوا قبول تعليقي بصدرآ رحب ..... وشكرآ دمتم بخير |
اقتباس:
مدري بالنسبه للأمير فهو غالبا يقصد الإملاء ولا أعتقد أنه يقصد القواعد اللغه وأما بالنسبه لتعلم للغه الانجليزيه إذا عندك إراده قويه وحب التعلم تتعلمها في 3أشهر |
خليهم يحكو لغة الإسكيمو بس يكونو ناجحين بحياتهم وأخلاقهم وتعاملهم مع البشر .. القرآن نزل باللغة العربية حتى نفقه تعاليمه وأحكامه ليس إلا .. وبالمقابل ربنا خلقنا شعوب وقبائل بقصد التعارف وتبادل الثقافات .
|
اخي طرحك للموضوع رااائع السوق عايز كدالكن عتبي اخي الفاضل بتهميشك لهذه اللغه وانا لا ادافع عنها كونها مجال تخصصي في التدريس ولكن الست معي بأنها لغه عالميه وعصريه والدليل الاجهزه وحتى من يبحثون عن وظائف يشترط اجااااااادتها وهي اللغه الوحيده المتداوله عالميا وانا ممن يؤيدون دراستها وتدريسها واحرص على تعليمها طفلي ذو الخمس سنوات واخطط ان تكون دراسته بمدارس تهتم بهذه اللغه كمدرارس التمييز ملاحظه انا مع هذه اللغه ليس تقليلا من شأن لغه الضاد لغتنا الجميله وانما من باب ماوصلنا اليه ومن باب المطلوب والمرغوب يعني بعباره عاميه: |
اللغة الانجليزية صحيح ان لها اهميتها في هذا الوقت وكما قال البعض هي اللغة العالمية او لغة العصر ..
لكن أن يعلم الطفل لغة أخرى غير لغته الأصلية هذا من الاعتداء والاجحاف بحق الطفل , فمن حق الطفل ان يتعلم ويُلِم بلغته الاصليه لغة آبائه وأجداده وبعد ذلك ان شئت علمه اللغة البرتغالية , لكن لايكون ذلك إلا بعد أن يلم بلغته الاصليه سواءً العربية أو غيرها من اللغات :) |
ي آنـآ أحمق لآشفت آلي يحتسوون ب مصطلحـآت آنجليزيه .. ووش عــآد هذي بزره , شكلي لو آنـي ب آشووفه آبسطره على كـل كلمه :mad:.. آؤؤؤف قسم قهر آللي ترطن عنقليززي .. وسآهجتن لغه آلأم ..آللغه آلعربيه..:i121 << مووب مكآنه هآلحتسي بهآللغه بين عرب لا وبعد قصمآآآن :d.. هههههه يآحبني لهم |
| الساعة الآن +4: 12:07 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.