معاناتنا مع مرتادي محلّات الجوّالات !!!
 

بسم الله الرحمن الرحيم , والصلاة والسلام على نبيّنا محمّد , وعلى آله وصحبه أجمعين , أمّا بعد :

لا أخفيكم إني ما أدري وشلون أبدأ بموضوعي ومن الغبنة اللي ماليتن لغاليغي قاعدن آكل تفاحة واشهد يا تاريخ !!

قدّر الله علينا وشرينا بيت غرب النافورة ,, وقدّر الله علينا تربيع وحطّينا باب كهرب ,, وقدّر الله علينا تكعيب وصرنا بجانب حثالة المجتمع , وأقصد به محل الجوالات !!

أول أيام سكننا بالبيت ,, ما مثلنا مبسوطين وخبركم فرحة البيت الجديد ماشاء الله علينا , ويا فرحة ما تمّت ولا هوب تامّة دام الحثالة حولك حواليك !!

أستغرب من عقول بعض الناس كيف يلبّق سيارته أمام باب الكهرب بلا مبالاة ولا إحترام لصاحب المنزل !!

ياناس يا عالم ياهووووه ,, تراي قسم بالله بي حرقة واصلتن لغاليغي ,, ياناس يا عالم يا هوووه لحد يلبّق قدّام البيت بلا فشكلكم !

أول الأمر ويوم بدت المشكلة تتفاقم ,, وأعداد الملبّقين تتزايد يوما بعد يوم ,, وواصلي يا بلادي !!

اقترح الوالد يحط لوحة ممنوع الوقوف ,, يقول أخاف الحثالة يحسبون الوقوف قدّام باب الكهرب نو بروبلم

حطّينا اللوحة بحمد الله ,, وما زالت المشكلة قائمة على أكمل وجه ,,
بدأ الوالد يقضي وقته بأكمله بتنسيم كفرات المخالف الهمجي والحمد لله إنه متقاعد يطوّلي بعمره !!

مرّت الأيام والليالي يا كرام ,, ولا يوجد عندنا حل إلا تنسيم الكفرات ويا بلف ما بعدك بلف !!

للأسف تنسيم الكفرات ما أعطى رسالة للمتخلّفين ,, فهم بلا عقول من الأساس ,, فأصحاب العقول لا يفعلون هذه الفعلة !!

هنا يهمهم الوالد بفكرة جهنّمية وهي وضع ماصورتين أمام الباب , علّها أن تصل مشكلتنا لعقولهم الخاوية !!

وأقسم بالله وتالله , بأن وضع الماصورتين لم تغني من الأمر شيء ,, والأدهى بأنهم يبعدون المواصير حتى يتسنّى لهم وضع السيارة بشكل آمن !!

يعني بالله عليكم تخيّلوا معي دقيقة ولا عليكم أمر ,, أبجي أفتح باب الكهرب عشان أطلع وبالأخير ألقى خشّة الموتر حاكّتن باب الكهرب ( حكّم ضميرك ,, والمصيبة هيّا هيّا ,, لكن قبل شويّات زادت شويّا )

يا أخواني , يا من تلبّقون مواتركم أمام باب بيتنا ,, الله يرضى عليكم ويسعدكم ويزوّجكم ماكو مشكلة يا حبايب قلبي أنتوا يا حلوين إنكم تلبقون قدّام باب البيت الرئيسي وعساكم بحل ولو تبون أمسّح القزازة القدّامية نقول تم لعيونكم !!

لكن تلبقون قدّام باب الكهرب لا وألف لا ,, فلا الدين ولا العقل ولا المنطق يسمح بذلك وعلى فكرة ما هو المنطق ؟!!

يا ناس يا عالم يا هووه تخيّلوا معي تكون فيه حالة حرجة بالبيت وتلزم منّا نطلّع السيارة , ويكون وقوفك قدّام باب الكهرب عائق لإسعاف حالتنا !!!

أبعطيكم فرصة حبايبي القرّاء تتخيّلون معي المواقف اللي يمكن تصير ولا يمكن حصرها

قبل شوي وقسما عظما ويا عساي أموت كل سنة هذا ما حصل معي ,, وهذا اللي خلّاني أجزم على كتابة الموضوع وآكل التفاحة من الحرقة !!

جاي للبيت في أمان الله عند الساعة الثانية والنصف فجرا ,, وفوجئت إنه فيه سيارة عند باب الكهرب ,, والمصيبة الشارع فاضي ,, وبإمكانه يقدّم خطوتين ولا يرجع خطوتين وصلّى الله على محمّد ولكن عقولهم تأبى !!

إنتظرت أخونا في الله يطلع من محل الجوالات ,, ومشكلتي ما معي مفتاح البيت وملزوم إني أدخل سيارتي !!

تأخر حبيبنا قرابة الربع ساعة ,, إضطريت أتصل على المنقذين لله درّهم !!

عطيته رقم لوحة السيارة ,, دق عليه وقال الحين يبي يجيك !!

إنتظرت الفرج ولعله تأخر سموّه ,, طفّيت السيارة خفت ترتفع الحرارة وتصير المصيبة مصيبتين !!

فقلت : فرصة أتمشى بالشارع رايح جاي والرياضة ملك للجميع

فجأة ,, وقفت هايلوكس عند باب الكهرب ,, ونزل منه حبيبنا الشهم ,, وقسما عظما توّه جاي متسحّر من الرومانسية والمنقاش بإثمه !!!

ويقول حبيبنا : والله اللي ملبقن سيارتي ولد عمتي , وإدع عليه إن الله ما يوفقه ( بقعه تصوعش )

هنا أتوقف فليس بعد هذا الموقف شيء يستدعي ذكره !!!

وختاما : واصبر وما صبرك إلا بالله !!!

أخواني أتركم لكم التعليق وإقتراح حلول لهذه المشكلة مع حثالة المجتمع !!

إذ لم تستحي فاصنع ماشئت


استغرب من بعض الشباب يآخذه المسآئله عناد يشوف لوحة ممنوع الوقوف ويآقف

الله يعينكم آخوي وخاصة العيد قرب وبتشوف الزحمة من جد

هههههههههههه الله يعينكم .. والله اني اشوف الحي ذاك وخاصه الجهه الغربيه اكثر البيوت حاطين ممنوع الوقوف وكذا ذذ والصدز بعذرهم قسم بالله انه شينه تجي تبي تطلع وتلقى سيارة واحد سادن عليك الباب يعني (هاينك عن حريك) شوري عليك يا الغالي لا شفت تسذا عامل لك سطحه ذذ تشقله وتحلته بعيد او ااتصل ع المرور وشوفون لك صرفه :p والصدز ما يلبق قدام باب كهرب او باب رئيسي الا مع كل احترامي عنز .. لانه ما يفهم ان راعي هالبيت اكيد ما راح يطلع ويدخل الا من عند الباب شلون تحكم حريته ..

وشسمه صدز اصلح معزز ذذ

تشكر يا غالي وعسى الله يعينكم ع هالبليه ..

وشسمه تقل مكان الموضوع الساحه صح ذذ

\

أسلوبك وعباراتك شوهت موضوعك لللأسف

احسن حل إنك تنسم الكفرات ولازم تحط لوحه عشان يكون لك عذر

إنك تبي تنسم الكفرات بسلوبك .

إن شاء الله ماياقفون

حاسن بك اخوي مجنون بريدة
اتفق مع اخوي اللي فوقي ^^^
الله يعينك

فيه خطه مجرربه ومدروسه من كل النواحي ولا تضر احد
بس كم تدفع واعطيك الخطه:d:d:d

شف اخوي هنا في مصر يسوون حركة غريبة شويا بس مافي حل غيره

يجيبون ماسورتين واحدة يغرزها في الأرض والثانية تدخل فيها ويحط بينهم قفل

طبعا تحط الماسورة في المكان اللي ما تبي احد يوقف فيه واذا احتجت تدخل تفتح القفل وتشيل الماسورة اللي من فوق وتدخل

الحل إنك تشتري سلسلة قوية وأي سيارة تشوفه واقفه قدام الباب تشنكره وتسحبه ولاتوقفه نظامي

أقرب شارع رئيسي وقفه عرض عشان يسحبه المرور
لأن اللي مايستحي منك دوس عليه

انا من رايي انك تحط اقناع قدام البايكه والقنع هو الي يحطونه عند التفتيش

ولا برميل وحط اسمنت واغرس ما صوره يصير ثقيل وحطها قدام الباب طبعا متحركه

وانشالله الفرسيين وخواننا الخبوبيين يوقفون زين

واذا ما نفع اشتر جمس شفر ووقفه على ورا اذا احد وقف ونت بتطلع دفه بالجمس وطلع موترك :41

والله شكلك حمق قوه
الله يكون بالعون
بس الله الله بتنسيم كفووو