بريدة ستي - جولة (( مصورة )) في شوارع بريدة .. عادات ومظاهر.. طرائف وحقائق

السلام عليكم ورحمة الله وبركاته..
أسعد الله مساءكم بكل خير .. هذا ميمو يحييكم ويتمنى لكم أسعد الأوقات وأهنأها .. معكم من الإخراج ميمو ومن التصوير ميمو ومن وراء المايكروفون محدثكم ميمو--->>> خلاص عاد تراه مهب حلا..

سيداتي سادتي.. فيه مشكلة أرقتني--->> حلوة أرقتني هذي.. كل ما أمشي بالسيارة تجي على بالي .. اكيد عرفتوها!! هي مشكلة شوارع بريدة الحبيبة وتصرفات الناس اللي بهالشوارع.. ولعلي أركز في الحلقة القادمة على مشكلة الشوارع الشينة بصورة اكبر من هذه الحلقة .. لعلي أنبه من يهمه الأمر .. وللجميع مني خالص الود والتحايا..

أعزائي.. قررت آخذ الكاميرا لمدة ثلاثة أيام متفرقة بأوقات مختلفة وأحاول أصور بعض الأشياء اللي ماكان يفترض وجودها من شوارعٍ شينة .. وتصرفات من الناس مالها داعي وغير هذا وراح تكون هذي الحلقة الأولى من التحقيق وفي الحلقة الثانية راح نكمل معكم ما بدأناه في هذه الحلقة (ونستقبل منكم اقتراحات أماكن التصوير)..

انتظروا التحميل .. عدد الصور 27 صورة تتخللها بعض الفواصل اللتي لا علاقة لها بالموضوع :
( ملحوظة : أغلب الصور مأخوذة قبل شهر تقريبا )
( ملحوظة أخرى : لا تدققون بالتصوير لأني آخذ بعض الصور وأنا أمشي بالسيارة وأكثرهن بدون تركيز.. مشوها )
( ملحوظة ثالثة : فكرت وين أحط الموضوع بالمنتدى العام والا بمنتى التصوير؟؟ آخر شي قررت إني أحطه بالعام لأني اعتقد أن هذا الموضوع ليس المقصود منه الصور وإنما علاج بعض المشاكل .. فلا يناسبه منتدى التصوير )
( ملحوظة --->>> أقول ضف قبل يجيك كف ما تلا حظون غني زودتها؟؟)

نرجع حق محور حديثنا..

قبل ماتسرعون بالقراءة لازم نخليكم تهدون شوي وما راح يهديكم إلا هذا :
http://www.s3f.net/LG/LG/matap.jpg
أعوذ بالله يوم مريت من عنده والله العظيم بغت تعلق به سيارتي !!!!!

نروح للمشكلة الجديدة القديمة اللي ما ادري وش ينتظرون مايحلونها!!!! :
http://www.s3f.net/LG/LG/althmaneen1.jpg
http://www.s3f.net/LG/LG/althmaneen2.jpg
الله يستر والله إني لا مريت من عنده إني أرص ضلوعي..

نجي لشارع القناة.. نبد بالدوار الأول مشكلة المشكلات:
http://www.s3f.net/LG/LG/dwar_alganat.jpg
معقولة مايدرون عنه.. أبدا ..

أما دوار الغد أو بالأصح قبل الدوار بقليل للقادم من قصر بريدة فهو طامة.. لا تكاد تعلم بوجود الملف :
http://www.s3f.net/LG/LG/dwar_algd1.jpg
كان الطريق فيما سبق سالكا (مع الرصيف) ولكنهم رمموه ومع هذا بقيت بعض الآثار الحديثة :
http://www.s3f.net/LG/LG/dwar_algd2.jpg

فاصل مدود ( الشكل يهبل والصدق الله أعلم بالروايح ) :
http://www.s3f.net/LG/LG/bhyrah.jpg

******************************

مرة وأنا جاي للإشارة شفت واحد بالمسار الثالث أو الرابع يدق اشاره يسار قلت هذ خطمة جااااايدة تبين التصرفات الغلط لبعض الناس .. جهزت الكاميرا ولقطت له صورة بآخر لحظة :
http://www.s3f.net/LG/LG/khatem.jpg

بعدها مريت على هالمشافيح ( لاتلوموني لأني ما أطيق اللبن ) :
http://www.s3f.net/LG/LG/laban.jpg

ثم شفت بوجهي أشين شي يمكن تصادفه وهو
حفريااااااااااااااااااااااات :
http://www.s3f.net/LG/LG/hfryaaat1.jpg
http://www.s3f.net/LG/LG/hfryaaat2.jpg
مهب المشكلة بالحفريات بحد ذاتها.. المشكلة إنهم يبطووووون بطا مالأمه داعي.. يعني الشهرين ما بها طقة عصا .. وتعرفون قصة شارع المدينة يوم يجي سلطان .. حفروا الشارع ودفنوه وقشعوا الاسفلت الأول وسفلتوه مرة ثانية بيوم واحد.. ولعل السر في تأخر الحفريات يعبر عنها صورة رائعة وضعها مشرف منتدى بريدة الخاص : السكب روح الشفق في منتدى بريدة الآخر قبل فترة :
http://www.s3f.net/LG/LG/hfryaaat3.jpg

***

مريت من عند حديقة المنتزه .. بصراحة ضيقت صدري .. ليه ما يعتنون فيها والا يقشعونه ويستفيدون من مكانها :
http://www.s3f.net/LG/LG/hadegah.jpg

وأنا ماشي من عندها صدت واحد راعي عربجية معاكس :
http://www.s3f.net/LG/LG/mo3aks.jpg

بعدها وصلت للملف الخطير .. اللي عليمي يبي يروح فيها.. والطريف أني شفت مرة سيارة مرور ناشبة بالحفرة والناس متجمعين عنه يالله سحبوها بالونش :
http://www.s3f.net/LG/LG/lffat_almoot.jpg

****
فاصل:
http://www.s3f.net/LG/LG/alderar.jpg

اتصل علي واحد مرة وقال لي وين أنت قلت أصور الشوارع.. قال تكفى رح صور الحفرة اللي طبيت فيها قلت سلامات؟؟ قال مريت من عند الشارع الفلاني ووطيت خفس بالشارع ومن قوة الضربة نسم الكفر .. قلت ابشر عطنا مكانها بالضبط .. وفعلا رحت ووقفت بالشارع وشفت حال السيارات اللي يمرن تحس انهن تفككن .. عاد بعد فترة شفتهم يصلحونها.. ثم خربت وعادوا يصلحونها ثانية.. واظنها الآن مصلحة :
http://www.s3f.net/LG/LG/hofrah.jpg

بعدها رحت للإسكان وأول ما شفت هذولا المساكين :
http://www.s3f.net/LG/LG/sarrafh.jpg
رحمتهم.. وقلت يارجال وش تبي بالفلوس غثا وانتظار خل رصيدك صفر وترتاح--->>> إيه هين ،، واللي ما يطول العنب...

ثم مريت مع الدوار اللي عند مخطط النهضة اللي ما فيه أمل-->> ولا هدى.. تشوفه بالليل.. المشكلة غير انه ما فيه شي يوضحه انه غاااايص :
http://www.s3f.net/LG/LG/dwar_aleskan.jpg

بعد ما مشيت على طول شفت شي خلاني أفطس من الضحك.. قلت والله ما تفوت هذي :
http://www.s3f.net/LG/LG/dbbab.jpg

فاصل :
http://www.s3f.net/LG/LG/alotheem.jpg

*************************

مرة وأنا جاي من الجامعة مريت مع الماصورة اللي ما لأمها داعي .. المفروض تكون داخلة شوي :
http://www.s3f.net/LG/LG/masort_alsalmeyh.jpg

مريت بعدها على البصيرية وما أدراك ماالبصيرية.. كل شي أثري .. فاجأتني البحيرة الرائعة:
http://www.s3f.net/LG/LG/bhyrah2.jpg

واما الشيء الذي لا يختلف فيه اثنان ولا تنتطح فيه عنزان فهو:
http://www.s3f.net/LG/LG/byarh1.jpg
http://www.s3f.net/LG/LG/byarh2.jpg
حسبي الله عليكم هذا جبل ..

*******

مرة من ( المراير ) أخذت أخواتي للسوق يوم جينا نمشي ومار يجي حمار يسوق دايو ويسد علي ويحجرني حجرة بس قلت لو سمحت اطلع ابمشي الحين قال : معليش دقيقة هذاي أجي .. تعرفون الحمير ماتقدر .. ويروح للمحل اللي يبي وهو مسرع أنا نزلت قلت فرصة أصوره باعتباره انتهاكا للذوق وحقوق الآخرين .. وفعلا نزلت وصورته قبل يجي .. وعلى فكرة طلعت يوم طلع اللي قدامي والا الحمار تأخر شوي.. وما اكثر الحمير من أمثاله.. أهم شي نفسه والناس طزززز :
http://www.s3f.net/LG/LG/gellt_adb.jpg

*********

إلى هنا نصل إلى نهاية حلقتنا وأتمنى أن يكون فيها بعض النفع .. ونستقبل منكم مثل ماقلت قبل : اقتراح أماكن التصوير.. دامت أيامكم أفراح وسعادة تقبلوا تحياتي : ميمو:
http://www.s3f.net/LG/LG/albrj310.jpg
( برجنا المملوح فجر ثالث أيام العيد )

والسلام عليكم ورحمة الله وبركاته........