هذا ما رأيته أثناء الترقيد في المستشفى !!!
 

الحمد لله وكفى .. والصلاة والسلام على المصطفى نبينا محمد وعلى آله وصحبه أجمعين . وبعد :

بداية .. شكري وعرفاني وامتناني الكبير للعضو الفعال " أبو الفهوووود" على روحه الطيبة وكل جهد بذله وكل خدمة قدمها للمنتدى عامة .. وما قدمه لي خااااااصة قبل وأثناء وبعد العملية داخل المستشفى وخارجها ...لافله كل الشكر والتقدير .. ولن نوفيك حقك يابو الفهوووود الله لا يريك مكروه وجميع المسلمين .. آآآآآآآميييييييييييين .

والشكر موصول لكل من زارني ودعا لي وسأل عني ... الله يكتب لكم دوام الصحة والعافية .



· أولا: المصلى لا يتوفر للمرضى والمرافقين .. فليس من المعقول أن ينزل المريض أو المرافق ويترك مريضه إلى الدور الأرضي في كل وقت ... لا .. لا .. لا .. نسيت ... صحيح يوجد هناك مصلى لكن !!! في الطرقات " الأسياب " ... نرجو مراعاة ذلك خاصة أن الصلاة هي العبادة التي لا يجوز تركها حتى للمريض ولا تسقط عنه مهما كانت الأحوال والظروف إلا في حالة الإغماء الطويل .

· بكل صراحة .. النظافة عالية الجودة.

· حدث مؤسف وغريب ... تدرون ماهو ؟ ....... وأنا جالس ليلاً أنتظر العملية التي ستجرى لي في الصباح .. إذ أتي برجل " بنغالي " قد عمل عملية .. طبعاً حتى الحين ما صحا من البنج .. لما وصل الغرفة والسرير اللي يبي ينام فيه ـ وهو بجواري ـ ... أتفاجأ بطبيب يأتي مسرعاً ويتكلم بكلام لا أفهمه مع السستر والممرض ... فجأة إذاهم يعيدون المريض مرة أخرى !!!!!!!! .. مسكين هذا المريض ما يدري وش يسوون فيه ... الصراحة حتى الحين مادري وش السالفة ـ يمكن ناسين مقص داخل بطنه ـ !!! تراهم يسوونها ... صراحة أنا خفت ... بكرا عمليتي وش راح يسوون بي مثل هالمسكين .... لكن الحمد للح ستر الله ... نسيت أقولكم إن المريض "البنغالي" رجع ويوم صحا كل شوي " يون " ـ اطمئنوا ياشباب لا يزال طبنا بخير ـ

· الوجبات وما أدراك ما الوجبات .... يوم صراحة ممتازة جداً جداً ... ويوم لا لون ولا طعم ولا رائحة !!!!

· " السساتر " .. عمل بون إخلاص ولا مراقبة !!

· " الممرضين السعوديين " .. بكل أمانة .. بعضهم يستحق أن يكون "دكتور" .. إنه يعمل ويجتهد بكل إخلاص وتأني وأمانة .. يلبي الطلبات بكل رحب وسعة صدر .. فله مني جزيل الشكر ........ والبعض الآخر من الممرضين همه تسريح شعره وتخصير لباسه ونعاسة عينيه وتكبره في كلامه الذي يظن أنه يجيد وبطلاقة التحدث باللغة الإنجليزية .. وكأنه وبكل وقاحة " يترزق ........ " للأسف !

· الصلاة وبكل أسف مهملة من قِبل المرضى والمرافقين .. فكل يصلي على كيفه ومتى ما أراد .. وكأن الواحد ما يصدق خبر أنه مريض حتى ياخذ إجازة عن الصلاة .. ومن حيننا ضعاف بالصلاة وحنا مابنا شئ !!!!!

· فيه واحد بنفس الغرفة اللي أنا فيها أصله جاي مرافق مع أبوه الشايب المريض ... لكن صراحة مادري منهو المريض ومنهو المرافق .. الشايب هو اللي يصحَي ولده من النوم .. وهو اللي يقومه للصلاة .. ويقول له دايم: ياولدي قم صل .. ياولدي قم أفطر .. ياولدي قم تغد ......... .إلخ

· " سوداني " معي في نفس الغرفة .. فرحان جداً يوم جاء يبي يطلع .. قلت له: وش فيك ؟ قال: الحمد لله الله يجزي الحكومة خير لأنهم يبون يعالجونني ببلاش ... وسألته عن عمله قال: راعي غنم ...... { والله ما تسوى فرحتك يازول }

· حتى تصدقون إن بعض الممرضين السعوديين ما عندك أحد .... واحد جاني يبي يسحب مني دم ... جاء وشد يدي من عند الذراع حتى بان العرق وصار يشوفه الأعمى .. وضرب الإبرة وصار يسحب وأتفاجأ إنه ما سحب شئ .. حتى هو يقول وراه ما فيك دم ـ وش قالولك سرطان بحر ـ واضطرينا إننا نسحب من اليد الثانية .!!!!!

· في مكوثي بالمستشفى .. سأل عني مدير مستشفى الملك فهد التخصصي .. وبعده سأل عني مدير الشؤون الصحية بالقصيم .. فبدأت المعاملة المختلفة من الممرضين والسساتر ... حتى قالوا لي إذا عندك شكوى أو رأي قدمه لنا وبدأت السساتر كل شوي جايين عندي يسألوني عن الصحة والحال وإيش تبي وإيش تتطلب .........إخ ..... لا تعليق !

ولكم مني خالص الشكر والتقدير والعرفان والامتنان ... أدام الله لنا ولكم لباس الصحة والعافية ... آمييين . محبكم { أبو فهــBـــد }

الحمد لله على السلامة .......


تراي عضو جديد ما تعرفن


لاكن ..... على طاري العرق ..... اجتمعو خمسه شباب سعوديين
على أبوي يبي يطلعون العرق عجزو !!!!!!

جت الفلبينية ==== بدقيقه


ألف الحمدلله على السلامة

أهـــــــــــــــــلآ أبو فهــــــــد ...

حياك الله ونورت المنتدى بحضورك اليوم .

اخوي ابو فهد ..لا شكرعلى واجب وما قدمته لك جزء بسيط من حقك علي ... وهذا واجب المسلم على أخيه ...

واطلب من الله العلي القدير ان يتمم لك الشفاء العاجل ..

ونقلتك عما حصل لك في المستشفى هذه ممتازة ونسيت شئ ابو فهد ما قلته ..

اذكرك وشو ..

{{ البنغالي اللي بجنبك يوم يجيبونه من غرفة العمليات ... ما قلت للاعضاء طريقة تنزيله إلى السرير ............ اللي معافى يمرض لو يشوف طريقة تنزيل المريض من سرير العملية إلى سرير الغرفة }}

يدفه من سرير إلى سرير بدون حمل المريض ...

يعني ... يرجفك برجله لما تطيح بسريرك ...............هههههه

واللي ينزلونه عمال طوووووووووووووويق !!!!!

يعني الواحد مخدر ونيم وما يدري وش السالفه ..........

خله مستووووووووووره.

شكراً أخوي قناص الروس وأخوي abu saqer وشكراً أخوي ابو الفهوووود على الروح الطيبة والعالية .. وأزيد من الشعر بيتاً يابو الفهوووود .. أخوي كان قد سوى عملية زايدة ويوم جابوه من العملية كان فيه المرافق أخوي الثاني ينقل اللي حدث إنه جابوه واقلبوه من السرير إلى السرير الثاني وكأنهم ينزلون كياس رز !!!!!

الحمد لله على السلامه ابو فهد

خلوها مستورة
 

شكراً أبو سلطان ـ وفارس الميدان ... الله مير يسلمكم والله لا يريكم مكروه وجميع المسلمين .. آآآآآمين.

حمداً لله على سلامتك يا (أبوفهــbـــد) ..
واعلم أن ما أصابك لم يكن ليخطئك وما أخطئك لم يك ليصيبك ..
وأسأل الله الرحيم الغفور الكريم أن يكون ما أصابك تكفيراً وتمحيصاً لذنوبك وسيئاتك وخطاياك .. والحمدلله على خروجك سالماً معافا ..
وننتظر إبداعاتك ومواضيعك القيمة التي عودتنا عليها في هذا المنتدى الموقر .

الحمدلله على السلامة أخوي ابوفهد
ثم إن الناظر بعين البصيرة يشكر نعمة الله عليه
ثم إن الكمال لله عزوجل
والمملكة العربية السعودية أفضل من غيرها من كثير من الدول في خدمة المواطن
في جميع المجالات وإن كان هناك نقص أوعيب فهو عارض وليس مقصود

وإن ترى عيبافسد الخلال **** جل من لاعيب فيه وعلا .