|
يقول المثل الدايتي{{تزوج من القصيم ولاتزوجهم}}؟؟؟؟
مساكم الله بالخير ياحلوينات (ترى حلوينات هذي جمع نفر سالم خايف ينبط لي هالحين واحد مسوي نفسه فاهم ويقول هذا مؤنث والا مذكر ) كيف أحوالكمينات عساكم مبسوطينات ومستانسينات أبد أبد استريحوا حلفت ماحد يقوم من مكانه القصة وما فيها ياحلوينات إني ضايق صدري:( من طبعنا يالقصيميينات وبالخصوص ديرتي بريدة. تدرون ليه ؟؟؟ أقولكم بس اصبروا شوي لين أتعدى هالملف إيه أقولكم ضايق صدري على شأن هالمسيكينات حريِّمنا أحس أننا ظالمينهن وما نعرف قدرهن لين نشوف أطباع غيرهن ! تلقى الوحده من حريمنا ذابحتن رويحتها على شان زوجها ماتبيع ولا تشري فيه حتى لو كان شيفه ساترتن عليه وقايمتن على بيته وعييله كان عنده عيال حتى أهلها مايدرون وش حاته مع رجيله؟ تلقاه أول عرسه مبسوطه مع هالرجال اللي مامثله بالرومانسية سفرات وطلعات وكلام يشرح النفس - ياهلا والله - وش هالزين - يابعد عمري- تصدقين اني ماني مصدق ان القمر هذا هي زوجتي - خلاص ابغى أحط بكل زاوية بالبيت صوره لس ونبي نشيل اللمبات يكفي نورس- هذا غير الهدايا اللي يجيبه له . سنتين بالكثير ثم تعال شف ----------------------------------------------------> هي:الله يخليك قم ودن لاهلي أبشوف امي وخواتي مجتمعات اليوم هو:أقول تراني مانب فاضي لس انتي واهلس ــــــــــــــــــــــــــــــــــ هي:حبيبي وش رايك اليوم نروح للملاهي نفرح العيال شوي هو:أقول ابلعي العافيه لاتشغلينا انتي وبزارينس تراي دايخ ابنام ــــــــــــــــــــــــــــــــــــــــ هي :اليوم عندي موعد اسنان أنا والعيال لاتنسى الله يخليك تودينا هو:أقول تراي اليوم عندي تمرين شوفي حدا اخوانس يوديس ماني فاضي ـــــــــــــــــــــــــــــــــــ هو: أنتي ترى اليوم نبي نروح لأهلي مجتمعين بالأستراحه يالله لبسي العيال. هي: هماك مواعدن تودين لامي أشوفه بعد جيته من مكة وبعدين انا مكلمتن امي وقايلتله نجيسز اليوم ومعلمتن خواتي حتى نجتمع ونتشاوف !لنا شهر ماشفنا بعض هو: أمسز بعدين تشوفينه اتصلي عليه هالحين وقولي جونا ناس وربطونا مانقدر نجي يالله لانتأخر على أهلي ــــــــــــــــــــــــــــ هي: حبيبي وش تذكرك هالليلة هو: تذكرن بمثل أمس هالحزة هي: لالا أقصد ماتذكرك بمناسبة زينه :eek5 هو: لا تذكرن بمناسبة (نحُّول ) هاها. أقول قومي بس سكتي بزرانس ولايكثر هرجس هي: ياشينك عاد صدق والله ماتذكرك بليلة زواجنا هو : قصدس تذكرَّن يوم تصكين على روحس بالمقلط وتخليني لحالي بالغرفة ماسنَّه ليلة عرسنا هي: خلاص خلاص ليتني ماقلتلك شئ أعوذبالله ماتَّذكر إلا هذي بس ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــ تبون الصدق ياجماعة أنا واحدن من عرضكم ياهل ديرتي مثلي مثلكم وما أبرء نفسي الغالب منا هذا طبعه مع حريمته يبيه تقوم بواجبه هو واهله وهو مايقوم بواجبه وبواجب أهلها صدقوني ماراح نلقى مثل حريَّمنا يصبرن علينا وما راح ينفعنا غيرهن بنات حمايل ساترات ومستورات ودودات مع رجالهن لاجيت للدين والى مامثلهن وان جيت للطبخ والاهن طباخات وخبازات وراعيات ذوق والعيب اللي عندهن يغطيه الزين اللي فيهن بس يبن منا كم كلمة حلوة ويطيرن من الفرح وما هي كثيرة عليهن وأنا الصراحة ماخفي عليكم سر حسيت بمعانات حريمتي يوم اني شفت معانات اخيياتي مع ارجالهن الواحد منهم كنَّه ضب مايتعدى جحرة نفسه شينه مع مرته وعياله دايم ماله خلق يوديهم ويجيبهم ومع غيرهم ياسلام سلم هذا هو عيبنا يالرجال! هالحين عرفتوا ليه أنا زهكان وعرفتوا ليه أنا أقول ((تزوج من القصيم ولا تزوجهم)))))) |
قصيمي داااااااايت .. يعني قصيمي بدون سكر .. تدري وراه مابك سكر .. لأنك كلك سكر يابعدي .. أنا معك بكلمة تزوج من القصيم .. أما لاتزوجهم .. فهذي يبي له وقفة بخريص .. يالبي الكثير من الجميع .. <<((== الله من زين الهرج بعد .. ياحبيب البي الكل يتمنى القصيميه من البدو والحضر .. لأنهم يعرفونهن قرمااااااااااااات وسنعاااااااااااااااات .. وربااااااااااات بيوت .. ماتسمع اللي بالمجد تقول .. امي ربة بيت .. يعني امي قاعدة تربي البيت .. من يوم هو بيت غرفة واحده الين كبر وصار فلة دورين وبوه 16 غرفة .. وهي قاعدة تربيه .. <<((== مسك المطينة الهدر .. يالبي القصيمية راعية بيت .. وبالأخص البريداوية والله ياهي دووووووووووووووووووواء .. ولايهونن بنات باقي مدن القصيم .. بس البريداوية غييييييييييييييييييييييييير يالبي غييييييييييييييييييير .. أما رجااااااااااااال القصيم فزوجهم وأنت مغمض يابعدي ولا يهمك قول الحاسدين .. تبي رجاااااااااااااااال أهل كرم وجود وفزعاااااااات ودين .. قالت قصيمي !!! قالت قصيمي قلت فخر ومعزة ****** أهل الكرم والعلم والحلم والباس قالت قصيمي قصدها بي تهزة ****** ماتدري اني بفتخر وارفــع الراس الحمــــــــــدلله روسنا دوم رزة ****** اللي خلقنا بس نحني له الــراس صافي نسبنا والحسب فية عزة ****أصلٍ أصيل وفصل والعرق دساس أهل الوفاء والدين صـــافي منزه ****** عن كل ماشاب العقيده من أدلاس حنا العقيلات انشدي رجال غزه ****** حنا هل الدنيا وللدين حــــــــراس حنا سنايد نجد في كل حــــزه ****** لا خانت حلوق الرجاجيل الأنفـــاس حنا اجبال يعجز الريـــح هـــــزه ****** حنا لنجد حزام وعصابة الـــراس نارد حياض المرجـــــلات ونلــزه ****** مانمشي دروب الرذيله والأدناس من يغلط لسانه علينــا نجــــزه ****** واللي يحقر قدر الرجــــــاجيل ينداس منا العدو تكفيه بالعين خــــــزه ****** يقضي عليه الخوف مع كل هوجـاس من ذكرنا في قلبه تثور نـــــــزه****** من طاري القصمــــان يبلاه وسواس نومه كوابيس وروعه وفـــــــــزه ****** دقت نواقيس الخطر له والأجراس وان هو لقي له من علينا يــوزه ****** هون له الصعبات وابليس خنــــــاس مايدري انه للمهالـــــك يــــدزه ****** عجل علي مبناه يمحي من الســــاس يابنت حنا من نخانا نعــــــــزه ****** يأمن بنا الملهوف وتهابنـــا النــاس مرسولنا للخير دايـــــــم نكـــزه ****** ولصرخة المحتاج نرخي الأكياس تاريخنا مجـــــد لبسناه بــــــزه ****** نمشي بوسط السوق ماندحم! السـاس لك ماتركنا بكاس الأمجاد مـزه ****** واجد عليك ومثلك حثالة الكــــاس وش جاب حر الطير لفريـخ وزه ****** منهو يساوي جوهر الماس بنحاس لاتحسبين انك لنا مــسـتفـــزه****** وش ياخذ الباعوض من ريش قرنـاس وجوق بي جوق .. |
اقتباس:
|
جميع العلاقات الزوجية يدب فيها الفتور بعد أشهر ، وهذا في جميع دول العالم يا عزيزي ، وأعلمُ أنّ هذا لا يخفاك ، بيد أنّك فيما يبدو تريد [ المزح أو الإستفزاز ] أو شيء من ذلك ، فخصصت هذا في رجال القصيم حتى تستثير هذه العواطف التي يلهبها أيّ شيء ... ;)
أما لو صبرت قليلاً حتى أتزوج ، ثم نشرت موضوعك هذا ؟! من سيزوج [ القصمنجي ] بعد كلامك ؟! يا لله .. كيف سأقنع حصه بعد اليوم .. لا سيما أنّ أباها ممن يتابع بريدة ستي بكثره ، لكي يتتبع ردودي .. راصداً أيّ زلة ، كاشفاً أيّ هفوة ونزوة !! اللهم اجعل من بين أيديه سداً ومن خلفه سدا .. :i121 |
أهلا بك معنا تصدقونعاد فيه أمريكي مسلم يدور قصيميه :D ليش أترك لكم الإجابة :confused: لكن الله يخلف بنات القصيم ذاك منول السنع اما اللحين الله يهديهن هن سنعات لكن مهب مثل منول :o الا على هونك لاتقول شي لشباب القصيم (بريدة) هذولا الرجال في زمن قل فيه الرجل لله درهم :) |
اقتباس:
هاه أفضحك و يالله تبلش من يبي يزوجك عقب كلام هالرجال . . يقول ( لا تزوجهم ) وش قلت . . أفضح وإلا أسكت . . صدقت أنت الحين . . تراي أمزح |
أهلاً بك أخي قصيمي دايت المفترض على نساء هذا الوقت حمد الله والشكر على أن جعلهُن من أهل هذا الجيل فالرجال بهم من الطيبة والحبابة و ((( الرومانسية :cool: ))) ما لم يوجد في الأجيال السابقة فنسمع عن شيباننا رحمهم الله وهدى بقيتهم من مُعاملات القسوة والشدّة ما يجعلك تفرح بأن الله لم يخلقك أنثى فحتى مجلس الرجال تُمنع من دخوله .. والقهوة لا يكُن لها نصيب في إعدادها والسيارة لا تركبها إلا بالخلف .. وحتى أنهم يفشلون من تسميتها بإسمها فيقولون : معي ( الأنثى ) الله يكرمك :bad |
والله يا جماعت الخير الي لا حظ إن العطله هذي
والي راحت إن أغلب الزواجات البنات من القصيم والشباب من الرياض الله يستر مهب باقين لي شي |
يعطيك العافيه اخوي قصيمي دايت
لا تنسون اننا افضل الشعوب اخلاق, لان عندنا اسلام يحكمنا ورسول نقتدي به في تعاملاتنا مع ازواجنا وفي جميع امورنا. |
والله كلام يضيق الصدر
وفعلاً ( هذا اللي حاصل ) يعني الكثير من الرجال يهين الحرمه يبغاها تقوم بحقوقه لا يبغى يقوم بحقوقها المسيكينه هذولا الله يهديهم ( ما زالوا عايشين في الجاهلية ) ++++++ المرأة في الجاهلية مُهانة ، ذليلة جاء الإسلام ووضع لها العز والشرف والمكانه والحقوق ومع ذلك الكثير من الرجال ما زال يقوم بأعمال الجاهلية اللهم اهدهم واصلحهم اللهم آآآآآآآمين أخوكم ملكي القطوع |
رجال بريدة الحين صارو أزين من بناتهم ...
رجال دين وعز وكرم ... أما بناتنا الحين الله يهديهن ... ( دلع وقلة حياء ) لا أقصد كلهم لكن شرذمة قليلة منهم ... تحياتي ... |
أضم صوتي لصوت الملكي وترى كلامك ملكي
|
| الساعة الآن +4: 02:48 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.