بريدة ستي - صوتك حلو .. بس جرّب ! ( الحلقه الأول )

سلام علاكم ..

ماهي من عادتي أني أكتب عن مثل هالأمور الصوتيه .. لكن اليوم غزّتني نفسي وقالت ( ياولد .. أكتب ... وش فرقك عن هالناس اللي كل يوم منزّلين لهم صوتيات تهزّ الخفوق .. وتخلي الواحد يحك ظهره من دون شعور ! ) :i125

البارح .. مرّني ( زيد الملتوي ) .. وقال .. حبيبي " مُدمن " : عندي لك شي هبااال .. تعال وانا أخوك .. وشرط أن تحبني زود على حبّك لي << مصدّق أني أحبّه أكثر من راشد !

قلت .. براسك .. أنا وش وراي .. ماعندي إلا قراية جرايد " حقت الاسبوع الماضي " .. أو تحويم الحمام في السطح <<< لايروح بالكم بعيد .. وتحسبون أني أطلّ على شغّالات الجيران ! :eek:

خمس دقايق ونصف إلا وخوينا " زيد " مرتزّ قدّام الباب يحتري ( طويل العمر ) .. طلع طويل العمر يسحّب رجليه (( لاتتوقعون أن طويل العمر بس الملك عبدالله .. ترى فيه ناس واجد طوال عمر ! )) .. !

زرقنا وخذنا اثنين معصوب زياده عســـــــــل .. واثنين شاهي حليب << حسبي الله عليك يازيد ... فيه أحد يشرب حليب شاهي في الحرّ ؟

شوي إلا وزيد مطابق بي قدّام بيت واحد من الشباب يسمونه ( هيثم الاعور ) .. فلسطيني متسعود .. وماخذ الأوّل على المدرسه .. ويقولون أنه يحب يفطر " سندويش زعتر " .. بس ان " اللقمه " ماتعوق معه .. راعي أكل .. والسندويش الوحده ماتكفيه .. يالله أربع أو خمس سندويشات << يارب سترك ! :oo

أستقبلنا أخونا ( هيثم ) ومن أسمه تدري أن الرجّال مؤدب وعاقل .. مهوب مهبول زي راشد الاقرع وزيد الملتوي .. ولايهون ماهر السوداني - الله يردّه - وباقي " الطقّه " ! :i128

استقبلنا أخونا : هيثم بِكُل بحفاوه وتكريم .. وقلّطنا في المجلس .. وانا قاعد أدربي راسي ورى " زيد " .. شوي إلا ويجيب العصير .. والكنافه ... وشويّة فطاير ( المشكله أن هيثم جاب الفطاير .. وهو اللي أكلها .. وانا قاعد أتفرّج عليه ) !

قال : زيد الملتوي .. هذا أخونا : مدمن شاهي .. خريّج كبينة تلفون .. وماخذ الماجستير من محلات الخُضار اللي في عتيقه .. ومُصرّ على أنّه يكمّل دراسته في الخارج - على أن أبوه مُعارض هالشي - لأن أخوي مُدمن يبغى يجيب شهادة دبلوم ( شمّام وتفاح سكّري ) ! ... والعجيب أن أخونا مُدمن يا أخ : هيثم ... من الشباب اللي يمتلكون صوت عذب وعنده " قرار " حلو و " جواب " متفركش << مدري وش دخّل متفركش .. بس لايقه على الكلمه اللي قبلها ! :D

طيّرت عيوني في زيد .. وقعدت أقول في نفسي ( ياكذّاب يابن الأييييه ) .. أنا صوتي حلو ؟ !

شوي إلا واخونا ( هيثم ) يحطّ عيونه في عيوني .. وصراحه أنا استحيت ونزّلت عيوني تحت .. وحاولت أني أصرّف الموضوع .. وقعدت " أقحن " لي عصير منقا خاثر !

قال لي أخونا : هيثم ... أنت يامُدمن ( موهِبه ) عظيمه .. لابد أننا نستغلك في خير .. قبل لايجي واحد من هالسلنتح ويخطفك ويوديك لابها .. ونشوفك بعد كم سنه واقف على ( مسرح المفتاحه ) وماسك المايك بيدك " الشمال " وتجلس تهزّ .. وتكسب ذنوب .. !

لابُد أننا نطورك .. ونركّب لك جنوط .. وننزل " السست " ونخليك تصير أحلى مُنشد على " وشّ الأرض " .. لابُد أننا نستغلّك في الإنشــاد .. ! وبِما أني صاحب مؤسسه إعلاميه .. فبخليك تنشد لين يبنحّ حلقك .. واعطيك طفسه .. واخذ الباقي ! :eek5

أنت موهِبه عظيمه يامُدمن .. خاصّه أنك جاي من طرف " زيد الملتوي " اللي وكّلته من تالي أنه يصطاد " صِغار السن والأحداث " .. قصدي ( أصحاب الحلوق والحناجر والرِقاب الذهبيه ) !

يامُدمن .. أنت ماتدري أن شريط الأناشيد من تالي صار سعره بـ ( 10 ) ريال .. بدال ماكان بـ ( 3 ) ريال .. يعني آلحين الواحد إذا صار يبي يشتري الشريط .. يروح يدبّر عمره .. يسرق من امه ... يبيع غاز .. يسرق جوّال .. المهم أنّه يدبّر عمره .. لأن [ حقوق الشريط محفوظه ] << أحلق حواجبي إذا مانزّلو الشريط بعد يومين في النت !

شوي إلا وعيوني بغت تطلع من ( مَهدِها ) ! .. فلوس .. ودراهم .. وشُهره .. وانتشار شريط .. واسمي على واجهة كل تسجيلات ! :o

من قدّك يامُدمن .. بعد ماكنت تبيع ( كيلو خيار ) و ( نصف كيلو جزر ) صرت اليوم مشهور !

من قدّك يامُدمن .. بعد ماكنت تجلس على الكرسي في الكبينه .. وريحة " التتن " تشقّ الخشم .. وهذا يدفع الحساب والثاني يطلع ماحاسب .. صرت اليوم مشهور .. وتطلع في برنامج كشتات و " ألو ياسمين " !

الله عليك يامُدمن .. الله الله ..

إلى هُنا .. أنتهت الحلقه الأولى .. الحلقه الثانيه بتقرونها بعد كم يوم .. بروح آلحين ( أشرب عصير ليمون .. عشان يطلع الصوت صح ) ! :)

سلام علاكم .. :)

مدمن شاهي