|
هل انت مطوع أو مهستر ؟! قضية للنقاش
بسم الله الرحمن الرحيم اعضاء منتدانا الحبيب .. السلام عليكم ورحمة الله وبركاته .. لدي موضوع اراه في غاية الاهمية أريد مناقشته معكم .. (" اقرأ الموضوع كاملاً ") .. الا وهو في مجتمعنا النجدي وبالأخص القصيمي هناك عادات وأشياء من يراها ويتتبعها يصاب بحالة ذهول من هول التناقضات الموجوده .. كيف ؟ في مجتمعنا لابد ان تكون مطوع حتى تتزوج من اللي تبي لابد ان تكون مربي لحية عشان تجلس بصدر المجلس وتتكلم لابد ان تكون مقصر ثوبك عشان تتناقش مع كبار السن لابد ولا بد ولابد .. لا اريد شخص يقولي هذا ماهو صحيح ولا مو من الواقع او فيه شيء من المبالغة بالعكس هذا الكلام واقعي كنا نسمع مثل هذه القصص في السابق ولكن يبدو انها حقيقة ونحن نحسبها تعليقات لا اقل ولا اكثر .. أنا لست ضد المتدينين وادعو ربي كل يوم ان أكون منهم ويرزقنا الهدايه .. ولكن هل تريدون ان اكون متدينا شكلاً لامضموناً , هل تريدون ان أعفي لحيتي واغتاب الناس في كل مجلس , هل تريدون ان أئم المسلمين في الصلوات وأسرق أراضي المساكين , هل تريدون أن أخطب بالناس الجمعة وانا أظلم زوجتي وأبنائي , هل تريدون أن آمر بالمعروف وأنا افعل المنكر , هل تريدون أن أحدث الناس في كل مجلس بسيرة الرسول والصحابة وأنا اغش في سوق التمور , هل تريدون وهل تريدون وهل تريدون ..! أحبتي أين الوضوح في كل هذا ! ديننا دين وضوح ودين تطبيق لادين مظاهر وجلبة واستغلال ..! كل ما أقصدهـ وأغزو إليه هو ألا نستغل الدين في الوصول للغايات وليس كل شخص اعفى لحيته " مطوع " وليس كل شخص حلق لحيته شاب " مهستر " فوالله في هذا الزمن من هم من طوال اللحى وهم أشد خبثاً وغشاُ ومكراً ممن حلقو لحيتهم ؟! غش وسرقات واغتصاب أراضي وظلم وغيبة ونميمة تحت ستار الدين ؟! لاحول ولا قوة إلا بالله , وربي ما يحزنني هو ان المجتمع مغشوش بالكثير من الأشكال والضحية من نحن الشباب من نحلق لحانا ونطيل ثيابنا لاننا في ظاهرنا امام كبار السن أننا شباب " مهستر " فينا مافينا .. اللهم أهدنا وارزقنا الثبات وأجعلنا ممن نعفي لحانا ونقصر ثيابنا وممن يطبقون دينك وسنة نبيك عن قناعة وليس مظهراً .. من يشكك في شيء من كلامي فلدي من القصص مايشيب لها البدن .. دمتم ,, |
موضوع ولاأرووع ,, قبل ثلاث ايام كنا نتناقش فيه أنا وقريباتي,,
بصرااحه مجتمعنا يهتم بالشكليات بشكل كبييرررر ,, ليه مانؤمن أن اللي فيه خير يبقى أنسان طيب حتى لو كان شكله غير ملتزم ,, لايعني أنه حلق لحيته يصير مافيه خير ابد ولايزوج ,, خلونا واقعيين ,, اغلب العوائل الملتزمه لاتزوج الحليق أو اللي يتابع التلفاز ليه ؟؟؟ <<يقولون مايناسبنا :D مصدقين أعمارهم وش هالنظره القاصره اللي فيه خير يبقى الخير موجود فيه وبعدين الرجال مخابر مهب مناظر .. بصرااحه قهر نفرق بينهم لهدرجه ,, حتى البنات صارت افكارهن كذاا,, هذا يوافقن عليه والثاني يردونه لهاسبب التافه لاوأزيدك من الشعر بيت ليته بس إذا جاء توافق الا بعد يروحن هدايا لعيونهم والتعليل هذولا ملتزمين نشريهم :confused: .. << الحمد لله على العافيه. مابقى الا هي . مع أني من عائله ملتزمه لكن مرض الشكليات لم يصبنا ولله الحمد .. مرره وحده تقول لي رجال خواتك وشوو؟ قلت اشكال منهم طالب العلم ومنهم العادي .. قالت: اقوول ابعدي بس أنتي وأخوانك اقالكم مطاوعه .. :D قلت: لا ,, حنا مطرطعين لعيونك هههههههههههههه قالت: وشلون يجتمع طالب علم وواحد عادي ؟ قلت: مهب فيه أخوان كذا ومع ذلك أجتمعوا ! قلت: أيه بس مابي العادي .. << اللي يسمعه يقول رجله خخخخخخ ملقوفه شفتوا العقلياات ؟؟ وكيف يفكروون خلق الله ؟؟ مادري هم يظنون أن الجنه لهم بس وغيرهم بالناار .. << أكره اللي كذا تفكيره وأعتبره سقيم.. ياااااااااجماعه هالنظره لازم تتغير ,,, |
حبر شفاف .. شكرا لمرورك وردك الجميل .. نعم اختي مجتمعنا يعيش في عصر الشكليات والمظاهر لماذا نحكم على الأشخاص من أشكالهم لماذا لانتبين عن معدنهم وجوهرهم قبل ان نحكم عليهم ..
للأسف أن بعض العوائل يتفاخرون بان ليس من ازواج بناتهم من يحلق لحيته ؟! هل نحن كفار لأننا نحلق لحانا .. وربي حال صعب ومجتمع يحتاج للكثير والكثير لفك شفراته المعقده والمنعقده بأفكار تنادي وتدعو للشكلانية .. |
والله شووف ياشيخ ,, العوايل الملتزمه قسمين :: قسم :: ينظرون لغير الملتزم نظرة أنتقااص << شيء شفته بعيني من البعض الله يهديهم,, قسم:: لاااا يعترفون ويقولون أن اللي خطب بنتهم رجل ولا مثله لكن المشكله أنه ماراح يدخل الدرجه << على قولتهم لان أخوان البنت ملتزمين ورجال خواته كذلك يعني بس رجله هي بيصير شاذ بينهم.. <<يمكن يزوجون. ويمكن يردون. على حسب المزاج .. وبصرااحه مافيه شيء أسمه مايدخل الدرجه ,, وأنا أتكلم عن تجربه .. رجال خواتي كوكتيييييييل ومع ذلك ماشيه حياتنا .. مع ان أخواني عن بكرة أبيهم ملتزمين بل منهم طلبة علم ودعااة ,, ومن المعرووف ان طالب العلم لايجالس الا طلبة علم لانهم يتناقشون دايم بمسائل علميه ليس كغيرهم من الملتزمين ومع ذلك تعايشوا مع بعض أزواج خواتي ..<< يعني مامدى صحة مايدخل الدرجه ؟ ياليت اللي يؤمن بالشكليااات يجاوبني ... ومشكوووور .. |
اخي الفارس
بارك الله لك وعليك ونفع بك ولك سلام الله عليك اشكرك على تسطير حروفك وكلماتك وموضوعك اخي الا توافقني ان ارخاء اللحية امر بها رسول الله صلى الله عليه وسلم ( ارخوا اللحى وحفوا الشوارب ) اخي الا توافقني ان اسبال الثياب مخالف للسنة قال صلى الله عليه وسلم ( ما اسفل من الكعبين من الازار ففي النار ) اخي لماذا كثير من كلامنا وحديثنا يكون التعميم فيه انا لا اخالفك انه يوجد اناس اساءوا ببعض الاخطاء ولكن لماذا كان التعميم على المجتمع عذراً ان هذا التعميم ينبأ عن نقص في عقليه وتفكير الشخص هل اذا عمل شخص طول عمره خيراً ثم زل مره خلاص يذهب كل عمله السابق . وهل اذا عمل شخص طول عمره شراً ثم عمل خيراً خلاص تختلف النظره تجاهه 100% كفى تعميم كثير من المواضيع اصبحت لجلب الانتباه وكثرة الردود ... اخي الفارس تقبل شكري ووجهة نظري القاصرة ..... |
موضوع أكثر من رائع ":/، جبتها على الجرح :/ اللهم ارزقنا الاخلاص في القول والعمل "/، بارك الله فيك اخوي ونفع بعلمك :/ |
حبر شفاف .. شكرا لتواصلك مع الموضوع .. ما اجمل الأخلاق .. عزيزي انا لم اكتب الموضوع عداء في المتدينين او انتقاماً بل وربي هم اخواتي واصدقائي ويارب اكون مثلهم ومنهم .. وانا في طيات موضوعي لم أعمم على جميع المتدينين ولست هنا أمر بحلق اللحى واطالة الثياب نعم هي ذنوب ومعاصي الله يبعدنا عنها .. همسة في أذنك المنافقون في زمن الرسول صلى الله عليه وسلم كان يخرجون معه للغزوات وغزوة تبوك خير دليل على ذلك , فمبال زمننا هذا فهو مليء بالشكليات .. وبالنسبة للفت الانتباه والجذب فلو أردت لفت الانتباه والجذب والجلبة فأنا أعرف كيف اعمل ولست بحاجه لنصح منك او تشكيك ياعزيزي .. على العموم شكراً لمرورك ولمشاركتك المتأرجحة .. هلالي موت .. عزيزي مثل هالمواضيع اللي تجي على الجرح هي اللي مفروض تنطرح مو مواضيع مواقف طريفة وقصص من نسج الخيال نضيع اوقتنا فيما لا طائل منه .. المواضيع اللي يكون في لمس للواقع وفي الصميم ستجد المحابرون كثير لانهم هم المعنيون هنا واقسم بالذي خلقني انني لم اكتب الموضوع استهزاء او سخرية ولا ورب البيت وانما طرح موضوع موجود في المجتمع وانا جزء منه .. ودمتم .. |
أهـــــــم شــي الأخــــــــــلاق .. ملتزم مهستر اللي هو هو .. مايعنيني انا .. الــدين حــــــــسن الـخُــلـــــــــــــق .. يعني واحد دين واخلاقه ولا شي .. هذا ما احترمه ولاكنه مخلوق .. وواحد مهستر وأخلاقه عاليه .. احطـــــــه عـلــــى راســـــــي من فـــــــوق والله .. السالفه وما فيها ان الملتزم دينه له والمهستر كذلك انا مايطولني الا المعامله الحسنه .. ومجتمعي مايفرق والله وانا مافرق .. مشكــــــــور أخـــــــــوي عــلى الطــــــــرح .. تحياتي .. |
اقتباس:
الدين المعاملة انسان وسيم وذو اخلاق عاليه ومثالي بس مشكلته صاحب علاقات ((غير شرعية ))) وش تنفع الاخلاق الدين و حسن الخلق لا يمكن فصل احدهما عن الاخر !!! |
اقتباس:
|
اقتباس:
وش مفهوم الدين عندك تالي حياتي موت !!! |
اقتباس:
الـــــديـن حُــســــــن الخـلــــــــــق .. ولو فـكــــــرت شـوي فيـهــــــا عــرفـت .. |
انا عارف !! ان رسول الله صلى الله عليه وسلم قال (معنى الحديث ))( من جاءكم من ترضون دينه وخلقه فزوجوه ) قرن الدين بالاخلاق لكن ما هو الدين في مفهومنا ؟؟؟ لماذا لم يقل الدين وانتهى !!! بما ان الدين كامل وافضل الاديان !!!! |
اقتباس:
اخوي انا وضحت لك وشو الدين عندي .. وانا باصمه مليوون بالميه انك انت كذاا .. يعني بالله عليك .. يجيك واحد ملتزم ولا يحترمك .. او غير ملتزم ويحترمك وعلى راسه .. منو تفضل ..؟ اكـيـــــــــد الثــانــــي ولا الفـــــــــرق .. تخـيــــــــــل هالموقف التااافه من بعض النااس .. ولد خالي يشتغل بالبنك وهو حليق وكان صاحبه بالعمل ملتحي .. المهم انه ماعليه سوووق ابد يعني الناااس سرااا على الملتحي وتاركين ولد خالي .. وسألهم الملتحي قال روحوا لم رفيقي قالوا لا هذا يشيل لحيته نبيك انت<..<.. الحمد لله على نعمة العقل تدري انه مثل ولد خااااااالي بالضبط .. يقول انا مربي اللحيه عشاان ابوووي وبس .. والناااس المغفله مغتره فيه .. هـــــــذا اللي ما طـيـقـــــــــه .. معليش اخوي .. تحياتي .. |
| الساعة الآن +4: 06:53 AM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.