|
وين الشقرديه ؟؟؟
السلام عليكم يالربع كيف الحال
ياجماعه الخير انا عازمن 8 رجال على العشاء والعشاء بالبر يعني انا الي ابطبخ وانفخ .. والمشكله اني ماعرف اسوي شي << بلاك ثور يوم انك تعزمهم وانت ماتعرف http://www.buraydahcity.net/vb/image...es/biggrin.gif الزبده ياجماعه الخير ابيكم تعلمونن وشلون ازبط الكبسة على قدر الضغط وحبذا لو يكون الشرح بالصور واكون لكم شاكرا مقدرا .. وايظا وشلون اسوي حميسه لحم ؟ http://www.buraydahcity.net/vb/images/smilies/smile.gif انتظر الشقرديييين والنشامى .. لاتبطون علي العزيمه يوم الخميس الجاي !!! |
لك ما أردت ولعلي في الغد أضع لك ما تريد من أشكال وأنواع واختر ما شئت وتوكل على الله
|
الله يجزاك خير يبو لجين قل امين عساك تعرس وان كانك معرس تعرس على ثانيه وعقبال ماتصك الاربع ..
انتظرك يالغالي وانتظر طبخاتك عجل علينا يالذيب ... |
تسلم يا أبو رجلين ،، ما راح تقصر إن شاء الله
|
بسم الله الرحمن الرحيم أخي العزيز المنطول . . أما بالنسبة للكبسة فما أدري هي لحم غنم ولا لحم حاشي ولا دجاج ولا حمام . . !! عموما إليك الوصف بالتفصيل / 1 / الكشنة : بصل تحمسه على زيت هذا للحم أما إن كان دجاج أو حمام فيفضل أن يكون حمس البصل على زبدة . 2 / تضع ماشاء الله من جميع ماتجده من بهارات وروايحن زينهه على البصل المحموس ( بهارات ، ليمون اسود ، قرنفل ، دارسين ، شوي زنجبيل ) وكل ماتجده من أنواع البهارات موجودا في العزبة التي تستعملها . 3 / ضع قليلا من الثوم على حسب رغبتك أنت فإن كان اصحابك يحبون الصوم فخير بركة وإن ماكانوا يحبونه فضع قليلا للنكهة . 4 / ضع اللحم على هذه الكشنة المباركة بعد أن تزيد مقدار بيالتين ماء حتى لا تحترق ومن ثم تقلب اللحم لك ثلاث أربع دقائق ثم تضع المقدار الذي يناسب اللحم الذي تطبخه والأحسن ألا تكثر الماء بقدرما تستطيع حتى لا يضيع الطعم وإن احتجت لتكثير الماء لكثرة الرز فأقترح أن تضبط الطعم بالماجي . 5 / إذا وضعت الماء وصار الماء يغلي باللحم أضبط الملح ثم أضغط الكاتم وحط البلف واحسب له إن كان حاشي 25 دقيقة وإن كان غنمن صغير فعشرين أو بالكثير خمس وعشرين دقيقة بعد التسة بالضبط يعني أول ما يتس الكاتم أحسب حسابك 25 أو عشرين حسب ما قلنا . وإن كان حمام أو دجاج فربع ساعة فقط من تسة الكاتم ثم طف عليه وارفع البلف . 6 / على عدد الأشخاص الحا ضرين ضع لكل اثنين خمس بيالات رز من أبو كاس أو الشعلان ثم إذا انتهيت حط حق الطيور ( بيالتين ولا ثلاث ) وربصه بماء دافي بعد غسله . 7 / بعدما يتم الوقت تفك البلف وتخرج اللحم في ماعون آخر وتحط الرز وتوزن الماء بطريقة حلوة جدا وهذه الطريقة يلزم أن يكون الرز مربّص قبل . الطريقة / شف أصبعك السبابة ثلاث تقسيمات شف القسمة الفوقيّة حط ارتفاع الماء عن الرز بمقدار نصف القسمة الفوقية ثم أضغط الكاتم وحط البلف وشعلل النار بقدرما تستطيع ثم إذا دار البلف أقصر عليه مرة يعني خلّه لهب خفيف ومن ثم أحسب له من عشر إلى اثنا عشر دقيقة ومن ثم سكره وافتح البلف وخل الصحن جاهز بس أقلبه بالملاس وانثره وبالهنا والعافية لك أنت ومعازيمك وأنا منهم برسالة خاصة إن شاء الله تعالى كل التوفيق لك أخي العزيز . محبك / أسد . |
الله يعطيك العافية أبومالك ماقصرت ...
|
اقتباس:
كفييت ووفيت يالقرم وأعتقد الشرح وافي لك وإن كان فيه أشكال أنا تحت أمرك يالذيب وأطلب عزك والليلة بعد وحده بدخل وأرد على اي سؤال لا هنتم جميعاً ابولجين |
كفيت ووفيت يابو مالك
وعقبال مانذوق هالكبسة من يدينك :rolleyes: مشتاقين , والشكر أيضاً لأبو لجين شيخ الفزعات |
أبو لجين يلزمك تتم بما و عدت الرجال ، على الأقل لو رضاوه ..
هياااا يا أبويااا أسرع .. <==== قلب حجازي |
اقتباس:
تورطنا :oo طيب ... بما أن الدايل اب هو حليفي هاليومين لين تنتهي مشكلة الإتصالات لا بارك الله فيهم ... خذها شفويه ( طبخ اللحم المشلوط ) قبل كل شي .. جب لك قدر ( عادي ) للرز ... وحط فيه عظام اللحم مع لحيمات بسيطة ... ثم عبها ماء فقط وخله ع النار على ما تنتهي من سالفة تجهيز اللحم اللي بالكاتم ( بمعنى أنه العظيمات اللي بقدر الرز هو اللي تبدابهن قبل لا تقطع بصل وغيره وتجهز اللحم )) بعدها تجيب قدر الكاتم وتقطع هاك البصيلات اللي تفتح النفس ومع طيميطات قليله يعني وبما أنكم عشرة بعطيك وصفة لعشر اشخاص جب ثلاث بصيلات حليلات وطماطه وحده وقطعهن وحمسهن شوي مع الزبدة إذا كان لحم حاشي ولا زيت خفيف لين تحط اللحم النعيمي لأن الدهن فيه كافيه وبعد ما تحمس البصيلات شوي يعني دقيقتين تحط اللحم وتطعمها بهالحميسه شوي ثم عبها ماء لحد ما يغطي اللحم أو أقل شوي .. يعني خل اللحم يطلع شوي مره ثم حط البهارات خفيفه مع صلصة طماطم وملح خفيف ثم اكتمه وأحرقه بالبريمس لين يأذن:41 طبعاً خله يتشتش لين تبدأ تشم ريحة شواء ( قبل الحرق ) يعني يبيلك تشمها كل شوي إذا شميت ريحة الشواء على طول طلعه وخله قريب من الضوية علشان يحفظ الحرارة ( قريب لحد يحفظ الحرارة لا يكون قريب مره ويحرقه ) بعدها نجي لخوينا القدر اللي فيه العضيمات ونحط عليه الرز بعد ما يغسل وينقع لمدة ( ساعة تقريباً ) وتحط زيت تقريباً قدر فنجان ( الزيت سبب رئيسي لجله نثري ) وتحط بهارات خفيفه والملح وتخلي الماء يعلو الرز بصانتيين ثم تشب عليه بنار وشلوطه بالعالي لين يبدأ يظهر اللرز يعني يرتفع ويكون الماء على مستوى الرز تماماً بعدها خفف ع النار مره وضع مقدار نصف فنجان زيت على الرز ليجعل له نكهه ثانية وتابع الرز لين تحس إنه نشف ثم خذ الملاس وأدخله لين قاع الرز وشف إذا نشف طف النار عليه ثم بعد ما تطلعه غطه بغطاء القدر وقلب الرز شوي ثم ضعه على الصحن وأخرج اللحم من الكاتم ( بعد ما تبعد الصفيرة وينتهي الضغط اللي فيه ) وضعه على الرز وبالهناء والعافية وأعتذر على هذا السرد السريع لكنني والله مستعجل وأجبرني الغالي على وضع ماوعدت به أبولجين |
| الساعة الآن +4: 01:55 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.