بريدة ستي - وحده تسب القصمان

وحده تسب القصمان ورد عليها قصيمي بهذي الابيات:

قالت قصيمي قلت فخر ومعزه 00000 اهل الكرم والعلم والحلم والباس

قالت قصيمي قصدها بي تهزه 00000 ماتدري اني بفتخر وارفع الراس

الحمدلله روسنا دوم رزه 00000 اللي خلقنا بس نحني له الراس

صافي نسبنا والحسب فيه عزه 00000 أصل أصيل وفصل العرق دساس

أهل الوفاء والدين صافي منزه 00000 عن كل ماشاب العقيده من أدلاس

حنا العقيلات انشدي رجال غزه 00000 حنا هل الدنيا وللدين حراس

حنا سنايد نجد في كل حزه 00000 لاخانت حلوق الرجاجيل الأنفاس

حنا اجبال يعجز الريح هزه 00000 حنا لنجد حزام وعصابة الراس

نارد حياض المرجلات ونلزه 00000 مانمشي دروب الرذيله والأدناس

من يغلط لسانه علينا نجزه 00000 واللي يحقر قدر الرجاجيل ينداس

منا العدو تكفيه بالعين خزه 00000 يقضي عليه الخوف مع كل هوجاس

من ذكرنا في قلبه تثور نزه 00000 من طاري القصمان يبلاه وسواس

نومه كوابيس وروعه وفزه 00000 دقت نواقيس الخطر له والاجراس

وان هو لقي له من علينا يوزه 00000 هون له الصعبات وابليس خناس

مايدري انه للمهالك يدزه 00000 عجل علي مبناه يمحي من الساس

يابنت حنا من نخانا نعزه 00000 يأمن بنا الملهوف وتهابنا الناس

مرسولنا للخير دايم نكزه 00000 ولصرخة المحتاج نرخي الاكياس

تاريخنا مجد لبسناه بزه 00000 نمشي بوسط السوق ماندحم الساس

لك ماتركنا بكاس الامجاد مزه 00000 واجد عليك ومثلك حثالة الكاس

وش جاب حر الطير لفريخ وزه 00000 منهو يساوي جوهر الماس بنحاس

لاتحسبين انك لنا مستفزه 00000 وش ياخذ الباعوض من ريش قرناس