[الفـــارس]

[ 5 ]

على وقت موديل 91 ..
شرى أبوي كابريس 91 وكالة
<< المحششة !

تقريباً بعد ماشراه بـ اسبوع ..
كنا [ ساكنين ] ببيت المزرعة ذيك الأيام !
عاد طلعت أنا وولد عمي أكبر من بـ 4 سنوات !
وش جابه لي ما أدري
قاعدين نسولف عند باب البيت ..
أنا بزر قوووة لا تحسبونن كبير <<

عاد يوم انتبهت وإلا فيه بس [ قطو ] فوق الكابريس !
أخذت حصاته وحلته عليه !
لعله صارت بالقزازة اللي ورى
ودخلت داخل السيارة !
يعني انكسرت القزازة !

أنا قلت وااااااوتس .. ياويلي !
أصلاً الطلعة الظهر ممنوعة !
واجتمعت طلعة الظهر وجريمة .. ياسلاااام ! : (

ولد عمي فرح انه مسك علي شي .. !
وأنا كنت بزر ذيك الأيّام !
عاد ذلن .. سو كذا وإلا ترى أبعلم !
جب لي ماء وإلا ترى أبعلم !
وأنا أتطلبه أقول تكفى قل انه حدى التكرن !
<< ياويلي باليهم !

ماش الرجّال ذلّن ذلّة ! : (
أذن العصر ودخلت البيت وتفرقنا .. !

وأنا داخل لقيت مرة عمي أم هذا
قلت : نورة
ترى تو قاعد أويدز على الشارع
وشفت ولدتس خليل حلت حصاته
على قزازة كابريس أبوي وانكسرت !
وشوله يسوي كذا ؟!
على كيفه هي ؟!
قالت اخس أوريك به !

بعد الصلاة شفت عمي الحار
قلت عم .. ترى خليل قبل الصلاة قاعد أويدز
وشفته كسر قزازة كابريس أبوي الجديدة !
<< الله من اللعانة ! : (

وبعد شوي شفت أبوي ..
وقلت يبه ترى خليل كسر قزازة الكابريس !
أبوي قال الحمد لله حصل خير ! << انقهرت أنا
صح انه ضاق صدره .. بس ما توقعته كذا !
قلت بنفسي ليتي معترف دامه تسذا مبرّد !

طبعاً ولد عمي ياويلي مايدري وش السالفة ..
مايدري إني قلبته عليه !

كان بالمزرعة .. يوم دخل ويقابله عمي !
قال عمي من اللي كسر القزازة ؟!
قال هو : حدى الدقر مر بالسيكل وكسره وهج !
عمي .. قال : أنت الدقري والله .. والفعه !

وكلن يهوشه المسكين !
ولا دري هو إني قلبته عليه

عاد ولد عمي هذا متزوج الحين
قلت له السالفة هالايّام !
والله ياهو حمق علي

وهذي الكذبة الوحيدة اللي كذبتها بحياتي

لهن بقية باقية !