[بدر بن عبدالله]

السلام عليكم:
أما أنا فالراجحي من زمان رافع ضغطي على كثر صرافاته إلا إنك إذا جيت تبي تنفذ عملية إلا الصراف خربان طيب على ويش كثر الصرافات أنا ما أدري، المشكلة ليت عليه قاصر هالراجحي عنده قروش إلى بكرا ليه مايركب له نظام زي الناس يريحنا ويريح نفسه كل شوي الصرافات خربانه وإلا النظام معلق وإلا ما أدري أيش وما يدري إن هالطريقة تجذب له عملاء أكثر، وش الفائدة إنك تحط بكل زاوية صراف وكل شوي طالعي بفرع جديد وآخر شيء الخدمة دمار، والله أكثر من مرة أجي أبنفذ عملية ( سحب، تحويل، تسديد فواتير)وألقى الصراف خربان المشكلة تصير أحياناً ضروري تبي تنفذ العملية خصوصاً بالذات التحويل وآخر شيء يقول لك لا يمكن تنفيذ العملية ثمن شف السب الي يجيه.
لكن نصيحة دور غير الراجحي صح إن العالم كلهم عليه وهاذي المشكلة الي ممكن تخليك ما تتركه وتصبر عليه وعلى غثاه لكن أنت لو تركته والثاني والثالث صح إنك تبي تقول هي واقفتن عليك عنده عملاء بالمليارات طيب إذا صار عنده عملاء بالمليارات أنا وش دخلن أدور البنك الي خدمته زينه وخل حسابك مفتوح عنده ومتى ما احتجته سو عليه العمليات وأقنع الي تتعامل معهم بشكل دايم إنهم يفتحون حسابات ببنوك ثانية وتفتك من مذلة هالراجحي.
وأبشرك أنا فاتح حساب ببنك ( البلاد) أول ما طلع وأبشرك إني مرتاح صح تخرب صرافاته بعض الأحيان بس مهب كلهن ومهب دايم يخربن، وإذا دخلت عليهم بالبنك يحطونك فوق روسهم وشاهي وحركات وخدمة زينة واحترام للعميل قروشه واجده وإلا شوي ما في فرق مهب مثل الراجحي كنهم يكدون عليك، ولا ميزة بعد عندهم إنهم ما يأخذون (ريالين ونص إذا قل رصيدك عن ألف ريال)، وإذا دخلت الفرع إلا ديكور زين الناس يفتح النفس شوي.
نصيحة لك افتح حساب ببنك ( البلاد) وبتدعي لي، ولا تحسبن موظف عندهم مثلي مثل أي واحد فاتح حساب عندهم.
ملحوظة: ما عليش طولت عليكم بالرد لكن ماجاء هالكلام كله إلا من كثر المناكح ألي آكله من الراجحي دايم.
مع تحيات: كربة النخلة.
والسلام خير ختام.