[إبراهيمء]

السلام عليكم

اقتباس إذا نظرنا لحال بعض المطاوعة لا ألوم الآباء بعدم تزويجهم والخوف منهم بعيداً عن أي دفاع أهوج عنهم

عفوا
أنت تتكلم عن شخص يطول لحية ويقصر ثوبه مهب عن شعب المطاوعه او عن عائلة المطاوعه او عن مخلوقات المطاوعه او عن قبيلة المطاوعه
وهذا من واجبات الدين (اللحية وتقصير الثوب)

وأعتقد إن تجنب مضاهر التدين الي امرنا بها الإسلام والي أقتدا بها الرسول صلى الله عليه وسلم امر فاحش بلا شك
وغير دقيق ولا يصدر إلا من إنسان سطحي

اقتباس من مخالطتي للكثير أجد في البعض منهم جفاء الطباع وغلظة المعاملة وشين النفس مع " أهلهم وزوجاتهم "

من مخالطتك ؟
غريبه يطلع منك هالكلام مع أنك تخالطهم
تأكد اخوي جبل عمر أن شوفت المطوع بالشارع او بمحل خضره أو شوفته على كرسي الإدارة أو شوفته كزميل او كقريب ايضا لا تكفي

وأنت تحكم عليهم حتى مع تصرفاتهم مع اهلهم وزوجاتهم
وهذا دليل على عدم الواقعية بالنضرة
فهل يعقل أن تستكشف علاقات المطوع مع الاخرين حتى مع زوجته !!!!!!!!!!!
معليش بس بعد اذن الاخوة القراء / أنت شفته وهو يعامل زوجته من فجر الله إلى فجر الله الثاني
يعني فطوره الصبح , إطمئنانه على زوجته فترة الدوام , رجعته من الدوام وسلامه على زوجته , طلباته من زوجته , غداوة مع زوجته , تقيلته مع زوجته , تقضيت بعض المشاوير مع زوجته , التقهوي مع زوجته , العشاء مع زوجته , النوم مع زوجته وربما المعاشره كل هالاشياء مستحيل تشوفهن او تكتشفهن إلا إن كنت مطوع ومخربه مع مرك

اقتباس تجدهم مع زملائهم قمة في الأخلاق وقمة في الخدمة وقمة التعامل وابتسامه تعلو محياهم طول الوقت

الحمد لله على العلاقة الرائعة مع الزملاء
مع أنه وفي بعض الاحيان يشوبها ما ينغصها وهذا طبيعي جدا

اقتباس أما مع أهلهم نار موقده ووجه عبوووس وألفاظ قاسية و أعينٌ حمراء.....

بالنسبه لي الحمد لله
لا عيون حمرا ولا يحزنون
صحيح أنك تلفع أخوك بعض الأحيان (بس بحدود المعقول وبحك الاخوة)
أما اني اهزء امي و مادري ايش هذي الي ماجت ولا قعدت

وهذا أيضا يؤكد مصداقية أتهامي لك بعدم الواقعية لانك وبكل بساطة عاجز عن القطه مع أحد العوائل ورؤية مايفعل بهم أبنهم المطوع
إلا إذا كنت مطوع ومخربه مع اهلك

اقتباس الدليل على كلامي أن أغلب من يخدم الأهل إذا كان عندهم عيال كثاريين العاديين أما المطوع فممسوح عن القائمة الخدمية للأهل

شوف عزيزي
الأخوة واحد بالنسبة لخدمة الاهل .............. الحبابة طبع وتطبع
وماله دخل بمطوع ولا لا

بالنسبه لي مشاوير اهلي قليلة وربما معدومه
لكن احد زملائي يقوم من جلستنا الربوع وبالساعة الي تحدده أمه وخواته (ما أدري بالظبط) علشان يجيبهن من اقصى بريدة
وماعمرنا هشناه او قلناله وين علوم الرجال والشنبات تقوم وتخلينا !!!!!!!
وللمعلومية عمرة حول الـ 30

اقتباس كيف سيخدمهم وهو يوم الخميس عنده طلعة المجموعة ويوم السبت طلعة الجامعة ويوم الأحد طلعة الحلقة ويوم الاثنين طلعت خويا الثانوي ويوم الأربعاء قد يكون هناك فراغ !!!!

البعض وللأسف يضيع وقته بشي ماينفعه
بس تاكد إن هذا نتاج الفراغ ولو الاهل مللين ولدهم من الطلعات تسان ماشفته حريص عليه لدرجه غير معقوله

ومع ذلك لا اتفق معك في هذه
فالشباب الي تسميهم عاديين يضيعون وقتهم بالدوران والتفحيط والمباريات والسفريات لمكة ولا للرياض وإن طرطعو الشرقية
وأنا اعرف واحد (متطور مره) يسافر ليل ارمضان للشرقية ويشوف الشمس إذا طلعت ثمن يرجع
عاد لا تسألن وش يزين مع زملاوه
وأعتقد لو كان مع مجموعة او ناس تضبطه تسان ما استهبل زياده عن الازم

اقتباس نعم الطلعات ليس لها علاقة تدينهم لكن لو كان هناك ذوق وتفكير لفضل الجلسة والأكل أمام أعين والديه وأهله على فلان وفلنتان ويأتيك أحدهم ويقول أفى هذي طلعت الشباب لشخص قال أبجلس مع أهلي وكأن الشباب أبا أبكر وعمر وجابر وابن مسعود !!!!!

طيب انت قاعدن تسب المطاوعه وبنفس الوقت تتكلم عن ذوقيات !! يعني وش دخل الذوق بالمطوع ؟
ممكن تفسير لماتقول
يبدو انك مشحون أو ماخذن موقف ...

اقتباس المشكلة أن المطوع وأنا لا أحب هذا اللفظ لأنه خاص بديرتنا يعتبر الطوع مظاهر و مجالسة من هم على شاكلته فقط لا يعلم أن الالتزام سلوك وتعامل وتقديم خدمة الوالدين على أي فرد كان وتعامل زوجي حسن ورحوم ومخافة المولى وحفظ اللسان من أكل لحوم الناس وخاصة بعض العلماء و الحفاظ على السنن الرواتب والأعمال الخفية بينه وبين الله

مادري يأنك تعلم ماتبطن القلوب او انك مطوع ؟

ثمن انا مطوع ومنب حريص على المظاهر زي ماتقول ولا أشوف الضواهر الي تتكلم عنها
أنت تجزم بتهمك وعلى أشياء يستحيل انك تعرفه إلا إذا كنت مطوع
ثمن تجز ان المطوع ما يهتم بالأشياء الخفية بينه وبين الله ......... مادري يأنك مطوع او انك تعلم بواطن القلوب

اقتباس بكل أمانة لا ألوم كل أب منع مطوع عن ابنته لكثرة ما نسمع عنهم من جفاء تعاملهم بالذات مع الزوجات وحرمانهن مما أحله الله وكل شي عنه " حرام " و " لالالا " و" عيب " يا أخي الفيصل بينك وبينها هل ما طلبت في دائرة الحلال أو الحرام !!؟؟

والله أعرف واحد شديد مع اهله .............. بس أنه مهب ملتحي ويلبس سروال فق الركبه ويركضبه علشان يخفف!!!
مادي هل المطاوعة ينتمون لعرق معين ولذلك هم يمتازون بطباع معينه ؟

ثم أن الأباء الي تتكلم عنه (لوصحة روايتك) لو كانوا حريصين فعلا على بناتهم لبحثو عمن يامن لهم حياة هانئة وليست حياة بهيمة (يعني الي يوفر اكل وفراش ليّن مايكفي)

اقتباس حتى تصرفاتهم مع المجتمع والعامة تجد فيها نوع من قلة الذوق وتمييز في التعامل مع من يعتبر مطوع وغير مطوع

والله وبكل امانه
بعض اخوياي بالمجموعه يحلقون إلحاهم ويلبسون عقل وبدون مرزام بعد وماشاء الله العلاقة فل
ولي زملاء عزيزين علي وهم حلقين ويسبلون ويتعشون من ماكدونلز بعد (متطورين) ومافيه تمييز ولا شيئ من هالقبيل
إلا إذا تبين اتكي بحدى الربوع وازعر الغنى علشان ما اصير عنصري ؟
ملاحظة صغيرة / علاقتي المميزة مع المقصرين لا تعني ابدا ذوباني معهم بلتعني الإصرار على المبدا الصحيح ومناصحتهم بالتي هي احسن والتاثير عليهم لا العكس . زي مايسوي بعض المطاوعة الخاوين

اقتباس بتصرفاتهم تلك جعلت الكل ينتقدهم ويكون له مدخل عليهم بالذات من الناس العاديييين تجدهم بكل مكان يقول " واااك مطوع الله يعين الأرض "

واوك ما اسمعه إلا من الناس الصايعة صدق
والدليل لو تجيب حدى هلي يقولون واوك لحدى المشايخ المناسبين له ولأشكاله
تسان ما إرتاح

بعدين تعال
أعتقد أن العادي هو الي يتبع الإسلام
مهب الي تضهر عليه مضاهر التقصير .............. صح ولا لا ؟

أخوي
تصدق ذكرتن ايام اول
يوم كنت اتوقع إن العالم بالدين لازم يلبس بشت ولازم يطلع برنامج فتاوى ولازم يصير 25 ساعة برى البيت ويوم كنت أتوقع أن المطاوعه يحرمون الطب ويدخلون الشريعه علشلن هالسبب
ويوم كنت اتوقع أن المطاوعه اعداء التقنية ويوم كنت اتوقع أن المطاوعه منعزلين ولا لهم علاقات مع المجتمع وكنت أستغرب لو يضحك واحد مطوع مع واحد عادي على قولتك .......... مع ان المشهد يتكررويوم كنت أشوف المطوع الي متوسخ ثوبه واتوقع انه مزين تسذا من باب الزهد
وكل هذا بسبب الخيال الواسع وعدم إحتكاكي مع المطوع الإحتكاك المطلوب لإطلاق حكم عادل عليه
وأحب ابشرك إني منب مزوج بنتي لواحد يطول لحيته ويقصر ثوبه إذا صار
مدود ولا يسبح
بخيل
ثوبه بتله وسخ
غير مناسب لبنتي
ماوافقت عليه بنتي (طبعا بتوافق على غيره ومطوع بعد إن شاء الله)
راعي صيد واجد ولهب معطين بنتي وجه
مشغول بالتجاره
وكل هالأشياء راجعه لعادة الشخص وطباعه وليس لانه مطوع أو عادي على قولتك

نظرة عامة / أكثر الي يسافرون باهلهم وعيالهم المطاوعه واكثر الي يكشتون باهلهم المطاوعه
وقليل أشوف واحد عادس على قولتك يزين كذا
لان المطوع ماعنده غلا اخوياوه وأهله
وماعنده دش (مرته ماليتن عينه)
وماعنده شفريات دشاره (أخوياوه مسكينه الجاده .......... كفو)

وعلى طاري سفريات
يمكن واحد يقول إن المطاوعه يخطفونك من بين اهلك
أقول يمكن إذا صار الواحد مضيع
يعني مطوع مع الخيل ياشقرى
قالوله أخوياوه المطاوعه باول العطله نبيك تخاوينا . قال مافيه أشكال
وبنص العطله أخويا ثانين قالوله نبيك تخاوينا . قال مافيه أشكال
وباخر العطله قالوله اخوياوه الثالثين << حلوه نبيك تخاوين . قال مافيه أشكال
إذا الشيئ هذا عائد على التربيه لانه وبكل بساطه أخوياوه عاجزين عن معرفة ضروفه الحقيقية وضروف اهل ويج أنه يكون رجال ويقول ما أقدر اهلي يبونن

وبه الحاله تاكد أن اخوياوه المطاوعه الرجال ماراح يكون عندهم إشكال
مثال مجموعتان لان حدى اخويانا الي ينشد بهم الحيل ومن روسنا امتنع عن السفر معنا بسبب السفر مع اهله
وما قلناله انت فيك وفيج ومافيش ........... وبعد هو ناوي يسافر مع شباب الحارة الي يرجيبهم خير . تحسب عليك يوم قلتلنا غننا عنصريين


رأي شخصي / أكثر من يكتب على المطاوعه ويسبهم يانه سطحي وماخذ موقف أو كارهن للإلتزام اصلا او مطوع متخلف ترك اللحية وتقصير الثوب الي حاطهن شكل
وسخر أمراضه وخيالة ضد اصحابه سابقا
والذين لم يحققو مطالبه فهو شخيف أصلا ولا يرتقي لفكرهم الهادف
فصار يفرغ شحناته الناتجه عن أسقامه ضد المطاوعه وهذا ديدن أي شخ يصاب بردة فعل (حسنة كانت أو سيئة)

عذرا على الإطاله وربما القسوه ............ فأنت من سبني وهمش قدري ووافق من اتهمني بمشاهدة الفجور وأيضا اتهمتني بالسطحية وعدم السعي لرضوان الله من بطاعتة في الخفاء
والكثر من الإتهامات التي تلقي بها جزافا لسبب او لاخر دون لإصلاح الخلل بشكل جاد

والسلام عليكم