في إحصائيةٍ أجريتها على جهات الاتصال عندي في الماسنجر ، النتائج سببت لي صدمة اجتماعية على مايبدو ..!
جربت الإحصائية على اشياء ثانية ، نفس النتائج ..!
ياه !
شنو الي قاعد يصير !
شنو الشعب الرومنسي دهـ !
الله ! قرى ايه !
يا إما ان الشعب عاشق بشكل ان الرومانسية تذرف مع اذانه ، أو انه مغفل !
توبيكات بالمسن ، أسماء عضويات ، اسم البلوتوث ، ستكرات السيارات ، خلفية سطح المكتب ، صور الجوال .....
شوفو واحكمو :
آهٍ وضآقت بي ~ ღ قلوبـآ ღ كنتـ أعشقها ..
[
صورة قلب حب تدرجات الأحمر مع خلفية سوداء فيها لمعة وحروف انجليزية ]
اقعد !
اقعد يابوصالح !
منتب سهل !
أبوصالح ذا شكلكم ماتعرفونه ، حلو نعرفكم عليه ..
أبوصالح عرفته من حدى المنتديات واكتشفت انه يقرب لحدى اخوياي وتعرفت عليه عن قرب ، قسمن بالله وجهه مب وجه حب وعشق !
من وين لك هالحركات يابوصالح !
طيب نمشيها ..
تَناثر داخـLـي نبضي .دخيـLـك بس أبي لحظه [تلملـمني] على بعضي ~
[
صورة وردة بطرف شاطئ عليه شوي رمل وشوي ماء كأنو فيه احد واطيه برجله ]
للأسف هذا أخوي !
يعني لو اني مادري انه اخوي كان أتخيل واحد أصفر وطويل وعيونه زرق وشعرهـ أشقراني يبلش بالطاقية مايقدر يلبسه من نعومته ومعه هوندا أكورد أنوااااع الأناقة !!
أجل تبيه تلملمك !
من وين لك ياخيي هالأمور !!
أنا ودي أمسكه لي يوم أصارحه .. من هي أولاه هالي أنت حاب ؟
أي بنات الخوال أو العمومة !! أو بنات الجيران !!
ما اذكر انك تسد طلعت برى قعدت لك 5 سنين ماندري عنك .. من عرفت اني اخوك وانا أدري وين أنت بالحارة ولا بالمدرسة . من نزل هالحب عليك اولاه علمن ؟
الله العظيم حاله !
خذ خذ هالرجل الطيب /
يا " رضاها " وقف وناظر شوي .. شف " غلاها " ايش سوى بـ شخص حي
[
صورة بنت طالع نص وجهه وشعره منتثر بلون أحادي ]
عاد هذا لو يدري بدر بن عبدالمحسن انه حاطن هالبيت توبيك له ان يشقق دفاتره وأبونورة يهتدي ويمسك مآذنة !
هذا الله يسلمكم حدى عيال الخوال ..
ما قلت لكم أنا تبي تجين صدمة - شكله جتن والله - !!
وش سوى بك غلاها يا أخ !
مامن شافك تنشق رجى منك وله وعشق ، يالربع هذا عقدته من يوم هو صغير النشقة .. سبحان الله العظيم عجز يتخلص منه ، أهله ياويلي مابوه طبيب نفسي مادقو عليه .. ماش الولد إلا ينشق !
حتى مهيب أي نشقة ، عنيفة له صوت بشع !
الله يستر عليك بس .. اجل وقف وناظر شوي ..! آخ بس !
[ أنت ] آلدفآ لآ ذبحنّي بـرّد آلآحزآن ~
هذا واحد من الشباب الي تعرفت عليهم أيام المتوسطة !
طبعا الي مايعرفه يقول حرام عليك يابورايد باين من الولد انه عاشق ، الي يبي يتأكد يشوفه تراوه يلعب كوره قدام باب بيتهم كل يوم مع عيال الحارة ، المارية قزم وسميّن شوي وصناديح ويعض ثوبه لا جاء يشوت فاول ! فيه واحد يشبه له ترى فيه فرق ، رفيقنا لا عض ثوبه يطلع سرواله سروال نص أصفر .. هذا الفرق ..
جاين يقولي أنت الدفا لا ذبحني برد لاأجزان !
ياعمي طيييييييييييييييييير !
واحد من الشبيبة بالقاعة يبي يرسل لي بالبلوتوث ..
وش اسمك يابو فلان ؟
يحلت علي نظرة ويقول (
الجرح أرحم ) وهو يهز حجاجه !
أنا نسيت الي هو يبي يرسل لي .. قلت :
الجرح أرحم من ايش !؟ 
قال بلحن نشاز :
الجرح أرحم من فراقك دقيقه ..
انا :
ايوهـ ! 
هو :
ولو ترحلي .. اعيش من غير مادري انتي الخيال العذب وانتي الحقيقه ! آهـ آهـ ! 
ذابحك عبادي ياوخيي !
ماتنفس !
لالا أنا ابنهبل !
أنا ؟
خلاص انهبلت !
على الـ آهـ ذي تقول هذا الولد الذي رومنسي .. هذا هو !
هذا الي يحلفون ان روايات شكسبير وشخصياته كلهن مستوحات من الشخص هذا العاشق المتيم !
مابدي والله أغرقكم بالأمثلة !
ولا ماسنجري مليان هالأجناس .. ودي أصدق انه عاطفيين ويحبون وياويلي ذابحهم الشوق . بس المشكلة كلهم اعرفهم .. شهبااااااااااااااااااان .. وعندما أقول شهبان فأنا اقصد المعنى الحرفي البحت أي أنها مأخوذتن من الشهابة ! >> لا ياشيخ !
رأيي ، هو ان 90% ممن يستخدمون هذه العبارات هم متطفلون على هذا العالم الجميل من الخارج المحرق لمن دخله !
العشاق الحقيقيون غالباً ما يكتمون العشق ، ولذا يحترقون .. وقد قالو : الحب عذاب !
في الأخير ،
أتمنى أن تمنحني حكومة خادم الحرمين الشريفين صلاحيات وزير الداخلية لمدة 5 ساعات بس ودي أجلس انا والحبايب ذولا أبكفخهووووووم لما تلين ظهورهم ، همن أبتفاهم أنا وياهم ..
طلبتك يابومتعب ..
دمتم طيبين ..