[الفـــارس]

[ رحلة الساحل الغربي ]

هالرحلة عاد غير .. !
تدرون ليش ؟ اصبروا لين يجون أفراد الرحلة !
وهـ بس والله يانا إلى الحين أتطعّم به !!

أفراد الرحلـة : المستشار / الجني العبد [ وليف الروح ] / المنخـرش
أبورائـــد / الفــارس

مدّة الرحلة : ممممم .. اسبوع تقريباً !

هذي الرحلة مليئة جداً بالمواقف والذكريات !
وبعض ناس حمّق علي كم مرة بهالرحلة بس المسامح كريم
وهـ بس ياحبيلك يابو آدم !

طبعاً أنا بصراحة راعي نسيااااان .. لزلك أبسرد اللي أذكره !
واللي ما أذكره زين بوّلف به ! يعني زي الأوقات والله يانا أبذكرهن !
يعني جزاكم الله خير ياخويانا لا يجي أحد ينط بي يقول تكذب !
لأن الرحلة الآن لها سنة تقريباً ..

مشينا آخر العصر من بريدة .. وأثاري الكاميرا مع أخوي عدنان هو وخشته !
وأدقدق عليه ماعنده إرسال ضايقتن بي الدنيا يارب ألقاوه !
يوم مسكنا طريق حايل وأشوا ويرد .. لكن المشكلة صار جاي من أبا الدود
يعني يبيله 40 دقيقة تقريباً ويوصلنا !
أنا كنت راكب مع ابو آدم وقلت له خل نمشي بس .. وعيّا ياحبي لقليبه !
والله إنك عارفن لي ياوليف الروح !

أخذنا الكام وتوكلنا على الله لحـــايل حيث العقال المايل !

وحنا بالطريق .. وقّف أبو آدم عند بقالة !
المهم شرى اثنين فانتا فراولة قزاز !
يوم عطان إياوه وإلاوه حااااار .. وأنا ما أواطن المشروبات الغازية
لوهن بويردات << يعني باردات بس ماهوب قوة وشلون لا صار حار !
المهم فتحته وشربت ربعه يمكن أبسمح خاطره !
وكانت دريشتي مفتوحة .. وأحسبه مفتوحة كله !
وأمر آخذ عزم عشان أحلت الفانتا مع الدريشة ويطلع برا الزفلت
يوم جدعته ويصبخ الدريشة وينكب علينا كل أبوه !
وقفنا وجلسنا نمسح وإلا كل الحوض يخلف الله أحمر !
لين وصلنا بريدة والدنيا تدبّق !

طبعاً ماهوب عشان كذا حمق علي وليف الروح !
صدز إنه حليم ياحبي لقليبه !

وصلنا حايل وتعشينا وكذا ..
بالمناسبة .. كنت أنا وزير المالية والاقتصاد الوطني !

ثم مشينا ونمنا بالنفود الكبير .. وهنا صارت سالفة الكنوّد !
يوم أصبحنا تقهوينا ومشينا ومرينا جبّه وتمشينا شوي وأخذنا فطور من أحد المقاصف !

عاد تعرفون جبّه وحايل وذيك الديار راعين كرم ووناسة !
طلبنا من المطعم فطور .. وعلى ما يخلص رحنا ندوّر مسجد !
حسرانين بقوة !
المهم شفنا مسجد ما ادري وش الله قايلن به !
وكان جنبه فيه باب مفتوح .. وحنا منعمين شوي يعني منتهين
دخلنا من عند الباب على إنه تبع المسجد ..
المهم كان معي واحد من الشباب ما أدري أيهم والله ..
المراد إنه هو اللي دخل الأول لدورة المياه وأنتم بكرامه !
يود دريت ويطلع علينا رجّال ويناظرنا باستغراااب !
سلمت عليه وقلت هذا المسجد وإلا لا ؟ << اللي بطنه ذا ما ذاك
قال لا والله .. هذا بيتنا ! لكن حيّاكم الله !
قلنا المعذرة والله كنا نحسبه تبع المسجد وكذا قال عادي ادخلوا تقهووا !
قلنا نبي نمشي جزاك الله خير .. قال أبد ماتروحون ولزم مرة !
المهم أنا قلت له سم بس خل أبدخل دورة المياه
تقهوينا عندهم شوي ومشينا من جبة !

ياحبيلهم هالشمامرة !

صور من النفود الكبير :

آمووت وأدري وش يصوّر !

به أحد شاحطه قايله والله يانت جزوم <<

حبشة

المهم وقفنا بالعليم شوي وصورنا مع الغضا وسرينا !

وصلنا الجوف مسيّان .. وشفنا لنا مكان بين تبوك والجوف
وتقهوينا به وتعشينا ونمنا !
بس والله ياهو مكان .. خطير بالحيل الصراحة ..
صور له :

تبلش بالمراهقين

بغينا نرجع بدون حوض

بعد ما قمنا وتقهوينا .. سرينا متجهين إلى تبوك !
الحمد لله ماصار فيه مواقف بهالوقت

وصلنا تبوك .. وأفطرنا من بوفية والله ياطعمه إلى الحين براسي !
آويليه بس من راح أغطر بتبوك وجاء <<

بعد ما أفطرنا وأخذنا لنا لفتين بتبوك مسكنا خط حقل !
بصراحة الخط رووووووووعة .. يعني وناسة لآخر حد !!
مناظر تهول منها العقول

وصلنا حقل ولا كان اهنا شيء يسوى الروحة ..
يعني السفينة ذيك الغرقة والشاطي بس ..
بس ولو حلوة

الموقف اللي قفلت مع أبو آدم علي عشانه ..
بما إني وزير المالية شريت ثلج عشان نحطه وسط الحافظة !
المهم حطيته وراء مرتبة الحوض .. عشان لا وصلنا أفك الكيس وأكبه بالحافظة ..
لعلي نسيته .. ونمنا ذاك اليوم .. يوم ركبنا السيارة الصباح وإلاه وش تشوف
الفانتا أسكتنا عنه .. بس هذا ماعنه سكوت !
إيه وضبطنا الوضغ وشرينا ثلج جديد بس من حابي ماهوب من الميزانية

المواقف اللي بالرحلة هذي وااااجد .. وفيه شيء ما ينقال
لذلك لعل الشباب يساعدونن عليهن << يبي يفتك

نترككم مع الصور يا خلفاتهم أنتم !

هلا بيك .. سلاح أستغفر الله

هذي قلعة قديمة نسيت اسمه .. بس حلوة أوي !! <<

وهذي الديسة .. حياة الشقى هي وهـ بس !

اقلطوا ح ـياكم الله !

ودّي أكمل .. بس لعلي أكتفي بهذا القدر .. والجود من الماجود ..
عندي اختبار مقابلة الحين دعواتكم !

مايستفاد من الرحلة :
1/ إني متأخر وإذا جيت أعلمكم

آسفين على القصور .. وترقبوا الرحلة القادمة !