[الـصـمـصـام]

[ 1 ]

::: يامن شرى له من حلاله علة :::



يوم وصل الرجال و نام خليناه يتلين إلى باتسر العصر .. عاد الوالدة الله يجزاه خير قالت لي : علمه إن اللي مهب يصلي ماله قعدتن عندنا <=== كفو الوالده سلفية الله يطول عمره .

يوم صار العصر مير أسأله أنت تعرف تسوق .. قال إإإإيوهـ .. معلوم ..(و يطلع لي رخصته ) <=== والله تعابير الوجه تقول مافيه معلوم أبد أبد .

من حسن الحظ إني ما صدقته .. قلت إمش نطلع لمخطط و تسوق هناكـ ..
و الله و أطلع الجمس من البيت .. مير يشوووفه .. و يقول .. هذا كبير أنا مافي معلوم .. أنا معلوم سيارة مدير <=== مدير اللي هو أنا الله يرفع قدره هالسيرلانكي ..

قلت أها بس .. محنب ناقصين تعدم موتري علي بس .. خلنا بهالجمس .. نهايته بمحرقة الله يدفع البلى و الله و أروح لمخطط .. حتى الآن أنا السواق وهو على يميني ..

و أشوف لي شارعن وسييييع .. قلت يالله يا محمد .. امتطي صهوة الجمس يا فارس الفرسان
والله و يركب .. و يقعد له ساعة وهو يقدم المرتبة و عشر ساعات يوزن الطارة

أُقسم بالله جان إحباط نفسي رهيب ..

و فعلا يحرك السيارة .. و أنا على أعصابي ..
واضح إن الرجال أول مرة بحياته يسوق .. شكل اللي معه .. رخصة قيادة ( سيسي ) <=== البغل .

و تحوم تسبدي من جد .. قلت إرجع للبيت .. الله يعيننا عليك ..

و يرجع للبيت .. سواقة لا بأس .. بس يوم وصل عند بيت جيراننا .. مير يوقف عنده . و يجيك بيدوس الفرامل .. و يدوووووووس البنزين لاااااااااااااااحول ..

والله باللحظة الأخيرة .. أنزل تحت و أدوس الفرامل بإيدي ..

و أنزله .. و أروح أوقف عند البيت و أسحب منه المفتاح ..

للحديث بقية ..