يابوي تذكر يوم أنا كنت أقهـويك = وأعطيك أنا الفنجال و تمدّ يمناك
تذكر يبه نار(ن) بجنبك تدفـّيـك = ولآمن لفاك الضـيف نـاديت حيّـاك
و لآمن لفاك اللّي يدوّر سواقيـك = شافك كريمٍ والكرم في عطايـاك
رجّال كلمة ما بها أي تشكيـك = بانـت معـانيـها بصافـي نوايـاك
كلّ(ن) بكاك اليوم ومحدٍ بناسيك = حتى صغير السن ما ظن يـنسـاك
ماني بناسي يوم أشيلك وأودّيك = يَمّ المنـام وتـرفـع إيـدك لمـولاك
وتقول ياربّي ابسألك وأرجيك = إنـّك تيـسر درب عـبـدك بدنـيـاك
ربّـيتـني يا جعل ربي يجازيك = خيره ويغفر ما مضى من خطاياك
وادعي لك الرحمَن إنّه يهنـّيك = ويسكنك بالفردوس والحور يجزاك
ويجري لك الأنهار من تحت رجليك = و يكرمك ياالغالي و يعـزّ مـثـواك
ماكان في بالي يجي يوم وأرثيك = هذي حروفـي لك ويا بعـد لقيـاك
ماأجمل تلك الكلمات وما أروووووووووع ذاك الأحساس سلمت يمينك ياأخي (د\ماسنجر)بعدما قراءة تلك الأبيات تذكرت والدي رحمه الله 