[داع الحق]

قال الذي يازن كــــــــلام يقــــولــه *** نوى يعــــبر بالتماثــيل ويقـول
يقول هرج مايجـــي به ميــــــــوله *** إليا أستمع له عاقل قال معقـول
عن الذي يخفى عن الناس زولــــه *** واليا بغيته قالو الناس مجهــول
يمشي مع العالم ويشعب ذلــولـــــه *** وله كلمة ماينقله كود مغلـــــول
يفرح بها خبل قليل الرجولـــــــــه *** زوله كبير والحيا منه مشيـــول
شر على جاره ومن صار حولـــــــه *** ثورالرجال اللي على الهرج مجـبول
يلحق بشـــره عالـــم مادرو لـــــــه *** وخلى الأوادم بين عاذل ومعــــذول
تلقاه مثل أبليس بين الحمــــــولــه *** يشيل ذولا يم ذولاك ويصـــــــــول
في هرج سو بينهم ماحسـبو لــــه *** وعقب الصداقة حبلهم صار مشلول
واشره على بعض الرجال الزحولــه *** تاخذ حساب مروج الهرج طهــبول
ماتنحرف مع سيرته في سهولـــــه *** لازم تحضر من حكى له على طول
إما يثبـــت منطقــــه في حلـــولـــه *** والا عذابه جاهز له ومعمـــــــــول
حتى يثوب ويعترف في فعولــــــه ***ويحط بلسانه كوالين وقفـــــــــــول
واليا تعذب خبر اللي حكو لــــــــه *** إنه لقى له ناس ماتاخذ القــــــــــول
ناس تعرف العلم عرضه وطولـــه *** الله عطاهم ميزة العرف وعقـــــول
لاجاهم الهـــــراج ماطبلــــو لــــه *** ماتستمع لاقوال سافر ومرحـــــول

خلف بن غالب الحربي