[الـصـمـصـام]

بسم الله الرحمن الرحيم










قبل أبدا أحمد ربي على سلامة أمي ، و أشكر كل واحد دعا أو سأل عن حال أمي..
و الله يشكر سعيكم و يحفظكم و لا يريكم مكروهـ فيمن تحبون ..

اليوم قمت الصبح و مباشرة مريت خالتي و أختي و رحنا للمستشفى نشوف الوالدة ، لأنها أمس كانت في العمليات من الساعة 8 الصباح إلى الساعة 3 العصر .. و بعد نهاية العملية طلعت للعناية المركزة ، و في العناية ما تسمح الزيارة إلا من الساعة 4 إلى 5 بس ..

أمس شفنا الوالدة و لكنها مبنجه بالكامل ، يعني : ما تحرك و لا ترد ولا شي ، بس حبينا نشوفها عشان نتطمن .. و رجعت للبيت ..

أما اليوم .. يوم وصلت المستشفى نزلت أختي و خالتي داخل المبنى .. و رحت أوقف السيارة برا بالمواقف ، و هم سبقوني للوالده .. و دخلوا عندها في الغرفة في العناية المركزة .. و كانت الساعة عشر تقريبًا أو قبلها بشوي ..

الوالده كانت توها صاحية من البنج .. و قالت لهم إني ما سويت العملية ( المسيكينة تحسبه ما راح إلا ساعتين ) ما تدري أنه راح على وقت وضع البنج 26 ساعة .. اختي انهبلت .. و خالتي قالت لها : أجل وش هالأجهزة اللي عند راسك ؟ .. قالت أمي بكل ثقة : هذولي استعدادات العملية .. ولا اقتنعت انها سوت العملية إلا بعد سؤال الممرضة .. فالحمد لله أنها ما حست بآلام .. مع أنها عملية قلب مفتوح ..

و أما انا جيت متأخر و حاولت أدخل لغرفة العناية المركزة .. بس عيوا علي .. ( أثر خالتي و اختي داخلين تهريب بطرق غير مشروعة ) <=== أو الله عربجيات ..!

و آخرتها كلمت أحد الموظفين يطلب من اللي بالعناية يسمحون لي بالدخول عشان أشوف أمي ..
و فعلا دخلت و لقيت الوالده الله يقومها بالسلامة تقضي الصلوات اللي فاتتها أمس وهي جالسة على السرير .. و انتظرت إلين خلصت من صلاتها و سلمت عليها .. و عليها بسمة العافية إن شاء الله .. ماجلست دقيقتين ..


و الآن خرجت من العناية المركزة إلى العناية الفائقة ..
و الحمد لله على سلامة أم عبدالله ، و اللهم تمم عليها الشفاء حتى ترجع للبيت



و والله ما أنسى كل اتصال يسأل عن صحة الوالدة ..
و الله يديم عليكم و على أهاليكم و أحبابكم الصحة و العافية ..