[loquacious]

يازين أيام أول كانت فسحتي بيض مع كتشب
وإذا كانت امي تعبانه والا المزاج نص ونص تدهن لي جبن كرافت ع الماشي
مع عصير سنتوب وريالين , وإذا كنت مسوية كشخة أجيب عصير سن كولا
وإذا كانت بدايات الدراسه وتونا راجعين من سفر كانت تعطيني ثلاث ريال بخشيش عشان اروح بدون صياح
مايصير اسبوعين إلا راجع المصروف زي أول ريالين
وكنت عادي راضية بالعكس ما أطمح لرفع المصروف , لأن كل اللي حولي نفس الوضع ..
ومن زود البركة فيهم كنت اشتري فيهم بالويكند آيسكريم ابو اربع حبات بنص والنص الثاني توفي ..

وبالمتوسط زادت صارت خمسة ريال بدون ساندويش وعصير , والثنوي كان يعطوني مصروف كل اسبوع أو اسبوعين متضمن الفسحه
وغيرها ...

الله يخلف على هالجيل مهيأ لهم كل أنواع الترفيه ولكن لا يوجد إنتاج ..

ماعندنا أطفال لذلك ما أعرف عن نظام الفسحة الآن ....

عندنا مراهقين أنواع الصرف عليهم وأنواع المقارنات بنوعية السيارات والاب توبات والجوالات ..

ولكن الإنتاج ( اكس ) الله يعينك لما يكبروا أطفالك ,,

أعجبتني فكرة مدرسة في أحد القرى , أول ماتعين أخوي كان يقول : الطلاب يجون بدون فلوس فيوزع عليهم

قبل الفسحة وجبات متضمنة ( ساندويش جبن مع عصير وشيبس ) فقط

كان كلهم يآخذون نفس بعض والفسحة تكون طويلة عليهم مافيها بيع وطوابير زحمة على المقصف ..

وكل شهر أو شهرين توزع ظروف على الطلاب حتى يضع الوالد الفلوس , ومن بكرا يجيب الظرف الطالب ..