[الطيــــر]

السلام عليكم ..
حياكم الله ..
اختي اول سنة تدرس .. وليلة السبت 11/9 <<< مهب سهل إفرنجي
بذيك الليلة بدا ( وجع البطن ) .. وفي الصباح بدأت الكآبة .. والوجه متعرفط
والنفسية نعال ( تكرمون ) .. وديتهم للمدرسة مع اختي التي تكبرها بثلاث سنوات يعني خبرة بالمدرسه ثلاث سنين .. المهم عدى ذاك اليوم بسلام لأنهم طلعوهم الساعة 8

يوم الاحد .. راحت للمدرسه وبدأ الخوف يقل نوعاً ما .. بدت تسولف مع البنات على خفيف .. جيت آخذهم الساعه 10 وسألته وشلون المدرسه اليوم ؟
قالت : زينه
قلت لها : تعرفتي على صديقات ؟؟
قالت : قلت لوحده من البنات ممكن نصير صديقات قالت لي ما أعرف والله
( تحسب الصداقه بقروش )

قلت له : وش اسم اللي بالفصل ؟
قالت : فيه وحده مطيرينيه !

المهم .. البنت تغيرت يوم الأثنين بدت ما تآكل .. وحبيسة الغرفه .. الصراحة ضاقت صدورنا ..

يوم الثلاثاء .. قمت لصلاة الفجر وألقاه مرتزة ... ولابسه المريول .. والكشره مايحتاج
يوم جت الساعة 6.20 وحميت السيارة .. والله وتبدى تصيح وتقول بطني
والله ياهي بلشه .. طيب والمطلوب .. قالت ما ودي أروح .. قلت سمي ..
على راحتك .. وأنا جالس بالصاله جت لمي وقالت :
يا محمد أنا صغيره وما اتحمل اجلس إلى الظهر !!!!!!
قلت طيب .. روحي نامي ..
جاء الأربعاء ونفس الكلام .. مرتزة من الفجر بمريوله .. يوم قرب وقت الطلعة قالت بطني آآآآآآآآآآآآآآه .. وراحت للغرفه :D

الله يعين على السبت ..

ومن المواقف التي حصلت لي أيام الإبتدائية يقولون اول ما دخلت المدرسه وإلى المدير يقول والله اللي يجيب الكتب بسجادة لأعاقبه!
جلست اصيح قال لي أبوي وشبك قلت يقول إنه يبي يعاقبنا !! <<< هي اللي لقطته

تحياتي