[الـصـمـصـام]

السلام عليكم ..


هالموضوع مجرد سواليف و قصص و مواقف و شوارع و هوشات و نكت و بتاع كله .. سواليف صارت لي بهالسنة .. السنة الأولى لي بالتدريس باهليه .. طبعًا مع احترامي لجميع معلمين المدارس الاهليه ، أنا اقول ان المدرس الأهلي مثل الحمار الأهلي يكرف .. لازم يتحلى بالصبر .. ياكل تبن بس اذانه مهب طوال .. و الحمد لله افتكينا .. هههههه

أما بعد :

معاشر الوغادين ، الصراحة كنت متردد أحط الموضوع هنا و لا بالساحة ، بس قلت ياولد مالك و مال الرسميات ، بالساحة لازم تصير عاقل و تعصر روحك عشان تطلع فوائد و تراعي الألفاظ النابية و غير النابية <==== ناوي يجيب العيد ... و تسوي فيها مربى جح قصدي مربي أجيال ..

مرة من المرات و ليلة من الليالي رحت أحضر زواج واحدن حبيب اسمه ( عمر ) و طبعًا كان الزواج قبل بداية الفصل الأول من السنة الي فاتت و عدت على خير ، و كنت مقطعن السرير من النوم ، لأني قاعدن عطالي بطالي لمدة فصل كامل مشبوك مع الصيفية .. يعني حسيت مالي أي قيمة بالمجتمع البشري تصدقون من الفضاوة رايحن أقدم على الحرس الوطني .. بس عاد على دورة ضباط .. و لعلها خيرة ما انقبلت ..

بعد الفضاوة طرح على أحد الزملاء التقدم على مهنة التدريس عاد أنا قلت ما يمنع الواحد يجرب و الحياة بزعات و تجارب ، و بسم الله نتوكل على الله من الصبح و أروح أقدم على مدرسة أهلية معروفة على مستوى الرياض ، بدون ذكر أسماء لأننا ما ودنا بزود فضايح عاد <=== ناوي شر الأخ .

و نضبط الأوراق و الأمور ، و خبركم مكتب العمل و التأمينات و الحركات و البركات ، طبعًا قبلها فيه مقابلة و فيه اختبار تحريري ، يشوفون أنا صالح ولا عبدالله قصدي صالح للتدريس ..

الدراسة بدت و أنا إلى هالحين ما اكتملت أوراقي ، و يالله يالله قضينا يوم الإثنين ، و أثر المدرسه شغلهم حامي حامي ، مافيه أول ما خلصت أوراقي جابوا لي الجدول و يالله طلابك ينتظرونك بفصلهم ..! طبعًا أول مرة أدخل على طلابي الكرام في فصل أنواع الشغب و القلق و الإزعاج بلان الله بهم بلوى ..!

دخلت و أنا على الصامت .. طبعًا مدرس أول مرة يدخل .. لازم يعقلون و يشوفون وشو من لحية ... منجس والله العفاريت ، أنا ساكت لمدة ربع ساعة إلين تلقف واحد و قال ( وش اسمك يا أستاذ )

قلت لهم علمون أساميكم و أعلمكم .. والله و بدينا ناخذ الاسامي <=== إيقاله بيحفظهن ..
و أول موقف صار لي مع أحد الطلاب أبقوله لكم بعدين ..

نسيت أقول شيء مهم .. مسكت مادة التفسير . ثاني متوسط .. 12 فصل .. يعني الدرس الواحد أعيده 12 مرة ..


::: تعبت من الكتابة .. بعدين أكمل .. كونو باحترائي ::::