[الـصـمـصـام]

..



نرجع لكم ياشباب مع فصل ( البصابيص ) تحفة التحفة ، كل اللي فيه بصابيص صغار ، حتى أصواتهم تقل أصوات خامس ( ب ) مرة قلت لهم : و الله أنكم بزران صدز و زعلوا علي ، بس الحمد لله راضيناهم ، أذكر أول مرة دخلت عليهم واحدن منهم أبلشن يتطنز باللهجة ( قصيمية طبعًا ) مع إني أحاول أتكلم بلهجة عادية ، من باب التنزل مع الخصم المهم ..

فيه طالب بهاكـ الفصل راسه كبير ما شاء الله ، أسميه ( أبو راس ) ما شاء الله راسه تقل سطل و شعره عكاريش مدري وشلون قايل <== يستانس على هالشعور يمعطهن كان أبو راس ذا بتله يتمرجح بالكرسي <== حركة معروفة اعتقد ، اللي يتركى على الجدار و رجلين الكرسي اللي قدام متعلقات <== إيقالكم فهمتوا .. ههه

الشاهد أن الولد المسكين خاش جو ، و أنا 60 مرة أعطيه تنبيه ، و مرات أقوله ياولد اقضب الأرض لا امسط بك ، بس الله يهديه لازم يمارس هوايته المفضلة و بعد شوي ما دريت إلا يطيح طيحة محترمة ، و يصك راسه ( الكبير ) بالجدار .. هههه عاد جيت أركض أتطمن على ... سلامة الجدار بديت ألمس الجدار و أقوله بسم الله عليك و أخوياه فاقعين ضحك عليه و الله ما بقى الا العصافير اللي يدورن فوق راسه ... مير عيونه ما تشوف الا بياض .. مدرين وين راحن الزيتونات .. آخرته جته حالة هستيرية و بدا يضحك معهم .. و ضحك الجميع

هالولد ذا نشبه من جد ، تقل علك عسل لامنه صكته الشمس ، عشان كذا صاروا أخوياه إذا بغوا شيء يرسلونه لي ، و أنا أول كنت أسوي اللي ببالي و أطقع ما أشوف هو و أخوياهـ ، بس الولد نشبة الصدز ، مرة قلت أبشوف وش آخرتها معه ، و الله و يقعد ثلاث حصص يترجان أحذف شيء من الاختبار جاب لي الضغط و المغص ، تخيلوا مضيع على روحه ثلاث حصص و يطاردن أخوكم في الله يكاسرن بالمنهج ، بس والله سوينا له تخفيض ، الله يتوب علينا ..

هذا أول اختبار لهم ، و أثناء الدرس إذا حطيت عيني بعينه ، فتح لي كشرته بدا يوزع ابتسامات و يطلع لسانه أبلش به ذا ، لازم يخليك تضحك ، و آخرتها ضرب الميانة .. بدا يقول ( عبودي ) ويييين يابو الشباب أصغر اخوانك أنا ...! بعدها صرت أعطيه وجه شوي ( اتقاء شره ) و مرتن من المرات الحصة الثانية قاعد أشرح ، و أشوفه يحبرش بشي مدري وشو ، و الله و أروح لمكان بعيد عن مكانه ، و أتغيفله و أشوف وش عنده ، و التفت على طالب ثاني بعيد عنه .. إلا و يطلع سندويشة ماهنا أكبر منه ، بيزرط منه شوي ، لعلي التفت عليه بسرعه ، و تعلق السندويشة بفمه و يغص المسيكين ههههه طلعته على حسابي برا يشري عصير

مرة جيتهم ، و أنا خااااثر و دااايخ ، و ضغطي منخفض ، و جا عندي ، قلت له لو سمحت اجلس ترى ضغطي منخفض و منب فاضي لك ، قال فرصة نرفعه لك شوي تبلش والله و مرة نشب لي يقول أبيك أنت اللي تقرأ الآيات ... لا تخلي الطلاب يقرون ، أصواتهم زي وجيههم ، قلت اجلس طيب .. قال لا قلت اجلس .. قال لا منب جالس إلين تقرأ أنت .. قلت تكفى اجلس و اغني لك أن بغيت قال أجل أبي أغنية لأم كلثوم قلت أبشر بس اجلس .. ههه من باب التصريف طبعًا .. و ينشب لي طول السنة يبي هالأغنية اللي مهب سامعه .. و إلى يومك وهو يرسل لي و مبلشنا كان بالمدرسه ( تراك واعدنا بأغنية لأم كلثوم ) و آية المنافق ثلاث ( إذا وعد أخلف ) <=== هالطلاب لا اهتووا للشيء طلع الدين اخس ..

و الله من سعة الصدر بعد ، و الحمد لله هذا من الأوائل ، و كان ممثل منطقة الرياض في احد المسابقات بالرياضيات ، لكن .. قبل فترة أخذت و أعطيت معه بالسواليف ، و لا توقعت المسكين عنده ظروف ، و مصائب ، و بدا يتكلم حسبته يستهبل ( كعادته ) .. لكن تعجبت في النهاية يقول ( أتمنى أفارق أهلي ) ..! لييش يابوي .؟ يقول يحس بطفش و مدري إيش .. ما ادري الولد هو متأثر بمسلسلات .. لكن نصحته ، و الحمد لله بعض الطلاب على صغر سنهم إلا عندهم وعي من أنفسهم ، و عارف مصلحته من هالعمر ، و هذا منهم ..

اللهم وفق الطالب ( أبو راس ) في حله و ترحاله و احفظه لوالديه ..

قبل ننتهي من هالجزء ، أبوريكم درس عن حسن الظن عطيته الطلاب ، مر على الـ 12 فصل كلهم و شافوه و كانوا متحمسين أول ما بدا العرض ، إن شاء الله أنهم تأثروا به ، و قلت للطلاب هذا من أعظم الدروس عن خصلة حسن الظن ، و هي من الخصال الحميدة .. مهما قلت من الكلمات و الدروس عن إحسان الظن ، و مدى الخلل اللي عندنا فيه ، ما نقدر نجيب زي هالمقطع يبين لنا حجم المشكلة المتأصلية فينا ..

::: مع المقطع :::