[أبو شهـــــد]

موضوعك بالثمنيات حبيبي أبو ريان ..

أبقسم ردي هنا لثلاث أشياء .. ( تجربة - أقتراحات - أسئلة )

التجربة :
قبل تقريباً 3 سنوات كلفون ( أو إجبرت ) أسوي برنامج العيد .. ( إعداد بدون تقديم )
وسويت البرنامج كامل تقريباً .. ولا حضرت .. لأني بيني وبينك مالي خلق المسابقات ووو .. وكنت مقتنع باللي يقول ( مركز صيفي ولا جمعة عائلية ) .. بعدها لم أعمل مع اللجان حتى العيد الماضي ..
والحمد لله الوضع جايزن لي الأن .. وحنا حالياً جالسين نرتب لعيد الأضحى ..

المقترحات :
* أن لا يكون البرنامج المقدم ( ياكل الجو ) وتكون أشياء ما تشغل الضيف حال الإجتماع
مثلاً : العرض التقديمي : بدل برجكتر وقلق .. حطه على سيدي ووزعه للحضور ( وتكلفة السيدي زهيدة )
أو مثلاً الحفل العام : ( قرآن , كلمه الشيخ / ... , كلمة الشباب ... الخ بغض النظر عن الفقرات ) بدال ما تكون بالحفل تكون على سيدي والكل يشغله بالسيارة ..
لأن بالحفل ياخي أنت جامعنا تبي تقرق علينا ؟ ولا تبينا نتشاوف ..

* الحمد لله .. منذ فترة كانت هناك فكرة جيدة للأطفال وهي الفرق الترفيهية .. وهي وإن كانت مرهقة مالياً بشكل كبييير .. ( 2000 ريـال ) إلا أنها تريح الحضور بشكل كبير , لأن في السابق كانت تقدم برامج الأطفال أم الكبار .. ويتذمر المقدم .. ما أحد يعطينا وجة ؟ يعني تبي أحد يعطيك وجه وأنت تهيض بزر تبيه ياقف وكاس الماء على راسه .. أنا وش يهمن يا أبو 30 سنه بها الشيء ؟
ويمكن الإستعاضه عنها بملعب كرة قدم وتحط عليهم عريف
لأن الأطفال يا عزيزي ذو نفوووذ وخصوصاً داخل المحيط العائلي فيالله يالله ( مسايس ) وعسانا نسلم من الأب

* تابع لفقرة الأطفال .. وهو إعطاء جميع الأطفال جوائز ..
لأنك لمنك وصلت للبيت .. تلقى الطفل يقول : والله يالعزيمه كسل .. وراه؟ ما عطون هدية مثل خالد أو صالح ..


( قد تكون المقترحين الأولين أقرب للأجتماعات العائلية الكبيرة .. )

أما جماعات الأهل الشهرية أو الأسبوعية ..
فالعوائل تختلف كثثثيراً .. فيه ناس لاجلست وأنت مبسووط وتلقاك متحمس للجية .. وناس من يوم تدخل وهذا يهاوش وهذا يلج والثاني ( يكد )

اللي أباصل له : أنك ما تقدر تقترح برنامج لين تعرف طبع الجمعه والحضور ..
لكن كخطوط عرييضة ..
- كن متسامحاً أثناء البرنامج ( سواء مقدم أو جمهور )
- كن متفهم للبرنامج جيداً
- ألتزم بالوقت ( ولا يكون البرنامج مالغ )
- لا تسوي إعلان .. وخل الأمر عفوي .. مثلاً تقول ( وش رايكم يا عيال أجيب ألعاب الذكاء اللي بالسيارة ؟ ) , أو ( يا عيال .. أبي واحد قد التحدي )
- الحرص على السرعه والسلاسة في التقديم وإضافة الطابع الحماسي
- العفوية وإضافة طابع الضحك في الجوائز .. ( مثلاً : سطل بصل أو فانيله علاق ذذ )
<== وعلى هذا أذكر كنا بكشته مع العمومه أيام الأبتدائية .. وزارنا أحد الأقارب وجاب معك كرتون دجاج مليان جوائز .. ووزع علينا حنا الصغيرين الهدايا .. السالفة أنهن مضححكه ( رضاعه - جزر .. الخ ) الجدير .. أننا حتى الأن ما نسينا هالشيء ولما اللحين أذكره أنا وعيال عمي ..
- تأكد أنه مو لازم الكل يشارك معك ..


أسئلة :
- ممكن تعطونا تجاربكم في تقسيم اللجان ؟
- كيف أقدر أسوي فريق عمل .. أيش الأشياء اللي تهمن بالعضو ؟


شكراً لكم .. وياليت يكون التفاعل بها الموضوع أكثر ..
في أمان الله .