[صمت النار]

الصراحة وبكل صراحة واللي مايعجبه أكيد يعرف شيء إسمه جدار , واللي بيزعل يزعل ولا يرضى أبداً , ومن زعل خله يولي ومن رضى نكسب رضاه ..

اشوف مشاركات وردود بين الجنسين فيها مبالغة شوي وثناء وإطراء ماله أي داعي ..

بعض الكلمات ممكن نتقبلها لكن لو يكون فيها شوية رسمية أو جلافة , مالها داعي تحريك مشاعر البنات .. وفي ذمتي إن الكثير هنا طريقة ردهم على البنات وكلماتهم لايقولونها لأخواتهم أو زواجتهم ..
( حضور جميل ورائع وبهىء , وحضور برد على قلبي قصدي اثلج صدري , وكلماتك اضافات لصفحتي الجمال < وبينه وبين نفسه يقول ياجميله بس مايقدر يكتبها > ,,, ودمتي لمن تحبين < والله يستر لايقول بينه وبين نفسه يارب اكون أنا > ,, وغيرها من العبارات اللي مالها داعي وفيها مبالغة )

وماننسى بعض البنات وردودهم على بعض الأعضاء كلمات منمقة ومدح ليس له مثيل ( طبعاً الرد بطابع إسلامي ) , ومايحتاج نذكر امثلة على بعض الردود ..
لكن ياليت الوحدة تبتعد عن كتابة حبيبتي ويابعد عمري , او ياعمري انتي .. تبغين تتغزلين فيها روحي هناك تغزلي مو قدام الرجال وخاصة العزابية ..
بعضهن ترد ولا تتوقع إن ردها فيه فتنة وهي ماتدري إنه كم واحد وواحد جاء على وجهه ..

أما الصور الرمزية ( الشخصية ) فحدث ولا حرج وماراح اتكلم عن البنات لأنه ماراح اقول ناقصات عقل لكن خفيفات عقل ..
لكن الشرهه على الذكور اللي المفروض يكونون رجال , مو يجيني من يحط صورة واحد وماسك وردة , والا اللي حاط صورة واحد حزين وجالس فوق طعس او على بحر , او صورة قلب او غيرها من الصور , ويعني اني تراني كذا ..

طولنا بالكلام , لكن ماسبق اعتبره حرية شخصية وكلن حر في كتابته وفي صورته اللي تبي تحط صورة شاكيرا بقريح هي وشاكيرا , واللي بيحط صورة توم كروز بقريح هو وتوم كروز , كلن ذنبه على جنبه ..

صراحة وحبيت اقولها واللي مايعجبه اقوله شوي شوي على الجدار الله لايهينك