[** حَـنيـنُ الأُخـوَّة **]

اقتباس المشاركة الأساسية كتبها مهجوله -------------------------------------------------------------------------------- بننننات انا متووووورطه سااعدوووني زواجي بعد شهر بنات ب_ب انا جدا جدا متوورطه باقي شهر ع زواجي وانا اكبر وحده بالبيت وماعندي اخوان يعني محد يوديني اروح للسوق كثيير اغارضي نننصها ماااااخلصصصتها ولا قمصان النوم ولا شششي صديقتي قالت لي فيه موقع اسمه (تاتش إاليجنت ) للملابس الانجري تقول تطلبين منه وويوصل لك لحد بيتكم بنات اهي ما جربته اهي سسسمعت بس تكفوون فيه احد مجرربه فررجوها علي الله يفرجها عليكم احس مرره تعبببببت وومتوتررره بشكل كبيير جبت لكم رابط الموقع بس قولوا لي اللي مجربته ولا سمعت احد مجربه هل خاماتهم حلووه ب_ب ساعدوووني >>هذا الرااابط بنات فررجوها علي الله يفرجها علييكم بنات اكتبوا بمحرك البحث تاتش اليجنت ..مقدر احط الراابط ب_ب ساعدوني يابنات القصيييم يكفي اني من ديرتكم الله يحرم وجهها من النار اللي تساعدني

الله يوفقك يختي ...
بس ما انصحك تشترين عن طريق النت ..

يمكن تتأخر طلبيتك أو تضيع أو تصير لي عوائق همن تبلشين بعمرك

ترى المسألة أسهل من كذا

بس انتي لا تتوترين ..

التوتر يخرب عليك كللللللللللللللل شي

استهدي بالله وترى كثار اعرفهم جهزوا بشهر بس : )

مهب لازم تروحين للسوق مرات كثيرة

أول شي وعشان ترتاحين من هم كبير .. و جزء كبير من أغراضك .. روحي لمحل ملابس .. المحلات الكبار .. زي الحسون او مبارك في بريدة .. او الهرم بالرياض ..<< مدري انتي بالرياض الظاهر ..

وخوذي القمصان والبجامات والجلابيات العادية .. والملابس الداخلية .. و حاولي تنوعين باختياراتك .. تنويع بالموديلات و الألوان ..

لا تستهنين بالهرم وطقته ... لأن هذي القطع من الملابس تملينها بسرعة .. يعني ما تخسرين على شي ما راح تحللين فلوسه ..


و روحي يوم ثاني لمجمع كبير وفيه محلات ملابس كثيرة وماركات .. و طقمي لك كمن تايور .. ونوعي مابين فخم وناعم ..

و ممكن تمرين محلات فساتين جاهزة .. وتأخذين لك كمن واحد لأنك ما اعتقد يمديك تفصلين خلال شهر ...


وخلي نفس المحل يعدّل لك الفستان ويستّره ... انشبي بحلقه لو عيّا ..


و خصصي يوم و روحي لمجمع كبير من بعد العصر مباشرة إلى الليل و خلصي العطور والمكياج والمناكير لو كنتي من محبينه .. و الأكسسوار .. واكسسورات الشعر << نسقي حسب ملابسك .. عشان يكون لكل لبسة عندك اكسسورار شعر مناسب ..
و أيضا الاستشوار والجزم والشناط << طبعا اختاري الألوان حسب اللبس الي عندك..

وخوذي لك عباتين ومستلزماتهن ... وخلي معك نوتة صغيرة تكونين كاتبة فيها كل شي بتشترينه .. يعني اشياء محددة وواضحة .

ولا تنيسن أغراض العناية الشخصية .. من كريمات وشامبو .. الخ

وحاولي تطلعين للسوق مع احد يساعدك بالإختيار وذوقه حلو و راقي .. وخليك مروقة وانتي تشرين .. استمتعي .. تراه التسوق متعة : )

والذهب خليه آخر شي .. وطبعا بيكون حسب طريقة اهلك وعاداتهم ..

هذا اقتراحي للتجهيز السريع والعاجل .. وطبعا الي عندها وقت أطول بيكون افضل .. بس ما يمنع انه يمديك تخلصين كل شي بإذن الله ..

و نصيحة لله .. روحي لطبيبة جلدية واعرضي عليها نوعية بشرة وجهك ومشاكل جلدك .. وخليها تكتب لك مستحضرات عناية بالبشرة حسب نوعية بشرتك ... وتعطيك كريمات طبية للعناية .. بدال التخبط مع خلطات النت ...