|
موضوع ممتع اختي خالدية
اللي يخلي لهجتنا صعبة شوي عند غيرنا هي التس وهي قلبنا للكاف الى تس
ونقلا عن طالبات لغة عربية ان دكتور عندهم يقول لهجتكم يالقصمان اقرب اللهجات للسان بني تميم
وهو احد الألسن العربية الفصيحة
ويقولن بعد انه ذكر عدة مصطلحات انها من صميم اللغة مثل
عكاريش# وغادين#غدفة
وكلمات كثيرة ضحكنا منها هاك اليوم
لا وتقول فيه رسالة دراسات عليا مقدمة بالكلية عن هالموضوع
وانا من رأيي ان لهجتنا ممتعة وبسيطة غير متكلفة بالحروف الزائدة
على قولة احدى قريباتي تدرس في احدى كليات الرياض وقالن لها زميلاتها ان لهجتكم صعبة غير مفهومة
فردت رد مفحم ماشاء الله عليها
قالت ابسط حاجات الأنسان هي الماء
انتم يالسداراوية واهل الرياض والحجاز تسمون الماء موية
والشرقاوية والخليجيين يسمونه ماي
والشوام مي
والمصاريا ميه
وحنا القصمان نقول ماء مماثلين القرآن الكريم في لفظه
لا واعجبن اننا يالقصمان نماثل القرآن الكريم في تشديد نون المتكلم والوقف عندها مثل قولتنا
عطن ودن جبن كلمن حاتسن وووو
قال تعالى (فأما الإنسان إذا ما ابتلاه ربه فأكرمه ونعمه فيقول ربي أكرمن ( 15 ) وأما إذا ما ابتلاه فقدر عليه رزقه فيقول ربي أهانن )
وهذا فخر لنا فلا يوجد لهجة دارجة تستخدم هذا اللفظ الا نحن
وبعضنا يتدلع عطني خذني ودني
يضيفون ياء المتكلم مع ان لهجتنا تحذفها
اما عن موضوع ان بعض ابناء القصيم يتبرون من اللهجة
اقول للاسف ان كثير من ابناء القصيم مهب بس اللهجة اللي تبروا منها
وصل بعضهم رأس الهرم في وزارات ومناصب وسعيه في خدمة ديرته غير مرضي هذا ان كان فيه سعي اصلا
فكيف تبينه يتكلم قصيمي بمجلس وزاري والا مجلس مهم؟؟؟؟؟؟؟؟؟؟؟
بس يعجبن خالد الزامل ببرنامج الى السوق بالمجد
حتسيه قصيمي بحت
يسلم راسه والله
مشكورة على الموضوع التحفة
|