[ترنجه]

جوابي مطول شوي

أنتم ليه دائما حاطين الطلاق مشكلة مالها حل؟
وتعدون العدد لحلها والقضاء عليها

صحيح انكم مشكورين على جهودكم ولكن لي وجهة نظر بما إني مطلقه بلا فخر :

الطلاق مايعني نقص بالبنت وأغلب البنات تكون ضحية لواحد مايقدر المسئولية ومايعي كلمة طلاق <<

طيب إذا كانت البنت كاملة والكامل الله سبحانه وماينقصها شي ليه مجبرة تاخذ واحد متزوج وعمره فوق الاربعينات خصوصا لما تكون صغيرة بالسن؟

لاتكونون أنانيين
أوك الله قدر لها هالشي بس حرام عليكم تظلمونها وتحصرون خياراتها بالزواج بواحد متزوج وعمره كبير
أقل شي بيكون مافي توافق بينهم وتكثر المشاكل
وعموما الرزق والنصيب بيد الله سبحانه

ولكن وسعوا مدارككم شوي
مع احترامي لكل من يحترم كل مطلقه

وأنا ضد من يقول اتزوجها بشرط تعطوني بيت أو سيارة أو أرض ... خيررر ان شاء الله؟
مشارك بمسابقة بمول والا جريدة وفيه سحب والا ايش؟

أنت تبي تتزوج لمصلحتك أو علشان أنت محتاج للزواج فعلا ومستعد تسعدها وتعوضها وتضحي عشانها "وكانك متزوج تعدل بينها وبين زوجتك الأولى"!!

فيه شغلات تقهر وتنرفز بصراحة

أنا بتكلم من واقع تجربتي وماني منحرجة لأني ماني مجرمة ولاسويت شي غلط والحمدلله واثقة بنفسي:

تجيك وحدة مطفية النور تتصل بالوالدة نبي نخطب بنتك فلانه لأخوي الكبير متزوج وبكره بالجامعه<< وعمره فوق ال 48 ويقول أهم شي السنع
ترد عليها الوالدة بكل هدووء نتشرف والله بس مايناسبها... تدرين ان عمرها 25 ؟
ترد الحرمة اي وبعدين؟؟ ماهيب امخــــلّات ؟ <= مخلات = يعني مطلقه


يخررب ابووو بيت تفكيرها اللي مدري شيبي
والمخلاة على قولتها ناقصة والا فيها بلاء تاخذ شايب؟؟!!!!

اتمنى ان كل حرمة تحط نفسها بهالموقف وتخطب لاخوها والا ابوها وتستنقص بنات الناس تحط بنتها بمكان المطلقه خصوصا لما تنظلم بزواجه وطلاقه

شي من جد غرييييب
وبالنسبة لي أقسم بجلال الله ماهمني ومبسوطة جدا الحمدلله بحالي ووضعي وواثقة بنفسي ومؤمنة بقضاء الله وقدره ومستحيل احقر نفسي وأتزوج واحد أي كلام بس علشاني مطلقه
ولايعني كلامي إن طموحاتي كبيرة ومستحيلة.. أنا أبغى بس يكون فيه توافق بين الخاطب والمخطوبة بالعمر والمستوى الثقافي والاجتماعي وكذا

ولاتشنّعون على المطلقة إذا انخطبت وقالت "لا"
عشانها بس مطلقه ومطلوب منها توافق على أي واحد حتى لو هو عاهه بكبره !<العاهه لاتنحصر بالعاهات الجسدية وانما العقلية والأخلاقية وماعليكم قصور فهم


آسفة طولت عليكم <= بعد ايش


ويسلمووو يابن الفايزية على طرحك ونتمنى يكون فيه حلول كويسه وعملية موب بس ملاقط بين الحريم والرجال