[مدحت شوقي بريده]

آه يا علمٍ وصل والعلم كايدْ
والعلوم إنْ جات صارتْ لي وكيده

شبّ في قلبي لواهيب الوقايدْ
والوقيدةْ ليه سموّها الوقيدةْ

زاغ قلبي راحت أفكاري شرايدْ
وشْ بجمّع فكرةٍ راحت شريدةْ

يا فريدٍ راح وأحواله فرايدْ
يا عجايبْ جملةْ أفعاله فريده

خادم البيتين للبيتين شايد
وروّح المندوب للأقصى يشيده

البكا بيبكيه الأيتام وولايدْ
وشايبٍ يبكيه يبكي مع وليده

مع عجوزٍ عدت أيامه عدايد
وش تعدّ بمكرماتٍ له عديدة

خلّد لذكراه بأفعاله خلايد
مع سجلٍ بالذّهب فيه اتخليده

مِحكمٍ للرّاي وآراؤه سدايد
متزن بالقول والحكمة سديدة

لو بقول القولْ يملا له جرايدْ
ما تكفّي لعبرتي صفحة جريدة

يومه الموعودْ محدٍ عنه حايد
حكمة المولى ولا به من يحيده

ذي إرادة واحدٍ بالكون رايدْ
الله اللي قال يفعل ما يريده

والبقا براسك يبو متعب سنايد
كلّ مظلومٍ يجي تبقى سنيده

معك ابو خالد عظيمٍ بالفوايد
هو عضيدك كل خيرٍ هو عضيده


شعر: ناصر بن عبدالله الخرعان
الأمانة العامة لمجلس الوزراء